Last updated on October 14th, 2024 at 07:29 am
ಕುಡ್ಲ: ಪೇಂಟೆಡೊರ್ಮೆ ಬೊಲ್ಪುದ ಸಿಂಗಾರೊಡು ಮೆನ್ಕೊಂದಿತ್ತಿನ ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರೊದ “ಕುಡ್ಲ ದಸರಾ” ಶೋಭಾಯಾತ್ರೆ ಸಾರಗಟ್ಲೆ ಭಕ್ತೆರೆ ಸಮ್ಮುಖೊಡು ಐತಾರ ಬಯ್ಯಡ್ ತೊಡಂಗ್‌ದ್, ಸೋಮಾರ ಕಾಂಡೆಮುಟ್ಟ ಬಾರೀ ಗೌಜಿಡ್ ನಡತ್ಂಡ್.
ಕ್ಷೇತ್ರೊದ ನವೀಕರಣೊದ ರೂವಾರಿ, ಕೇಂದ್ರೊದ ಮಾಜಿ ಸಚಿವೆರ್ ಬಿ. ಜನಾರ್ದನ ಪೂಜಾರ್ಲೆನ ಮಾರ್ಗದರ್ಶನೊಡು ನಡತಿನ ಶೋಭಾಯಾತ್ರೆಡ್ ಬರ್ಸದ ನಡುಟ್ಲಾ ಸಾರ ಸಾರ ಜನ ಬತ್ತ್‌ದ್ ಪಾಲ್ ಪಡೆಯೆರ್.
ಕುದ್ರೋಳಿ ಕ್ಷೇತ್ರೊಡು ಮಾರ್ನೆಮಿದ ಪೊರ್ತುಡು ಪೂಜಿಪುನ ಶ್ರೀ ಮಹಾಗಣಪತಿ, ಆದಿಶಕ್ತಿ, ನವದುರ್ಗೆನಕುಲು, ಅಪ್ಪೆ ಶಾರದೆ, ಬ್ರಹ್ಮ ಶ್ರೀ ನಾರಾಯಣ ಗುರುಕ್ಲೆನ ಒರುತೊಟ್ಟುಗು ಮೆರವಣಿಗೆ ನಡತ್ಂಡ್.
ಶ್ರೀ ಕ್ಷೇತ್ರ ಕುದ್ರೋಳಿರ್ದ್ ಐತಾರ ಬಯ್ಯಡ್ ಪಿದಡಿನ ದಸರಾ ಮೆರವಣಿಗೆ ಮಣ್ಣಗುಡ್ಡೆ ಮಾರ್ಗೊಡೆ ಆದ್ ಲೇಡಿಹಿಲ್‌, ನಾರಾಯಣ ಗುರು ಸರ್ಕಲ್, ಲಾಲ್‌ಬಾಗ್‌, ಬಲ್ಲಾಳ್‌ಬಾಗ್‌, ಪಿ.ವಿ.ಎಸ್‌. ಸರ್ಕಲ್, ಕೆ.ಎಸ್‌. ರಾವ್‌ ರೋಡ್, ಹಂಪನಕಟ್ಟೆ, ವಿ.ವಿ. ಕಾಲೇಜು ಸರ್ಕಲ್‌ಡ್ ಬಲಕ್ ತೆಲಾದ್ ಗಣಪತಿ ಹೈಸ್ಕೂಲ್‌ ಮಾರ್ಗೊಡೆ ಆದ್ ಶ್ರೀ ವೆಂಕಟರಮಣ ದೇವಲ್ಯೊದ ಎದುರುಡೆ ಕಾರ್‌ಸ್ಟ್ರೀಟ್‌, ಅಳಕೆಡೆ ಆದ್ ಕುಡ ಶ್ರೀ ಕ್ಷೇತ್ರೊಗು ಎತ್ತ್ಂಡ್. ಪೇಂಟೆದ ಸುಮಾರ್ 9 ಕಿ.ಮೀ. ವ್ಯಾಪ್ತಿಡ್ ಮೆರವಣಿಗೆ ನಡತ್ ಬತ್ತ್ಂಡ್.