Last updated on October 1st, 2024 at 02:54 pm
ಕುಡ್ಲ: ಅಕ್ಟೋಬರ್ 01: ತುಳುನಾಡ್‌ಡ್ ಇತ್ತೆ ಇತ್ತೆ ಡಿಜಿಟಲ್ ಅರೆಸ್ಟ್ ಪ್ರಕರಣೊಲು ಎಚ್ಚಾವೊಂದೇ ಇತ್ತ್‌ದ್, ಸೈಬರ್ ಕ್ರೈ ಪ್ರಕರಣೊಲೆನ ಏರ್ತೆಲ್ ಭಾರೀ ಆತಂಕೊಗು ನೆವನ ಆತ್ಂಡ್. ಪಾರ್ಸೆಲ್‌ಡ್ ಡ್ರಗ್ಸ್ ಉಂಡು ಪನ್ದ್ ಪನ್ಡ್‌ದ್ ಒರ್ಯನ್ ಡಿಜಿಟಲ್ ಅರೆಸ್ಟ್ ಮಲ್ತ್‌ದ್ ಆರೆರ್ದ್ ₹39.30 ಲಕ್ಷ ಲಕ್ಕಾದಿನ ಬಗೆಟ್ ಕದ್ರಿದ ಮೂಡಯಿ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.
ಒಯಿಲ್‌ದ ಪ್ರಕಾರ “ಸೆಪ್ಟೆಂಬರ್ 23 ತಾನಿ ಎನ್ನ ಮೊಬೈಲ್‌ಗ್ ಕಾಲ್ ಬತ್ತಿತ್ತ್ಂಡ್. ಡಿಎಚ್‌ಎಲ್ ಕೊರಿಯರ್‌ ಸಂಸ್ಥೆದ ಆಫೀಸ್‌ರ್ದೊ ಶ್ರೇಯಾ ಶರ್ಮಾ ಪಾತೆರೊಂದುಲ್ಲೆ ಪನ್ದ್ ಕಾಲ್ ಮಲ್ತಿನಕುಲು ಪಂಡೆರ್. ಈರೆನ ಪುದರ್‌ಡ್ ಚೀನಾಗ್ ಕಡಪುಡ್ದಿನ ಪಾರ್ಸೆಲ್ ಪೋವಂದೆ ಆಫೀಸ್‌ಡೇ ಒರಿದ್ಂಡ್. ಅವೆಟ್ 5 ಪಾಸ್ಪೋರ್ಟ್‌, ಒಂಜಿ ಲ್ಯಾಪ್‌ಟಾಪ್‌, 400 ಗ್ರಾಂ ಎಂಡಿಎಂಎ ಬೊಕ್ಕ ಕೆಲ ಬ್ಯಾಂಕ್‌ ದಾಖಲೆಲು ಅಂಚೆನೇ ಮೂಜರೆ ಕೆ.ಜಿ. ಕುಂಟು ಉಂಡು ಪಂದ್ ಆ ಜನ ಪಂಡ್ಂಡ್. ಆ ಪಾರ್ಸೆಲ್ ಎನ್ನವತ್ತ್ ಪಂಡಲಾ ಕೇಂಡಿಜೆರ್. ಕಸ್ಟಮ್ಸ್ ಅಧಿಕಾರಿಲು ಈರೆನ್ ಕೈದ್ ಮನ್ಪುವೆರ್ ಪಂದ್ ಪಂಡೆರ್” ಪಂದ್ ಒಯಿಲ್ ಬರೆಪಾದಿನಾರ್ ಆರೋಪ ಮಲ್ದೆರ್ ಪಂದ್ ಪೊಲೀಸೆರ್ ತೆರಿಪಾದೆರ್.
“24ತಾನಿ ಕಾಂಡೆ 9ರ್ದ್ ವಿಡಿಯೋ ಕಾಲ್ ಮುಕೇನ ವಿಚಾರಣೆ ನಡಪುಂಡು ಪಂದ್ ಪಂಡ್‌ದ್, ಯಾನ್ ಏರೆಡಲಾ ಪಾತೆರಂದಿ ಲೆಕ (ಡಿಜಿಟಲ್ ಅರೆಸ್ಟ್) ನಿರ್ಬಂಧ ಪಾಡ್ದಿತ್ತೆರ್. ನಿಷೇಧಿತ ಎಂಡಿಎಂಎ ಸಾಗಾವುನ ಪ್ರಕರಣೊಡು ಅರೆಸ್ಟ್ ಮನ್ಪಂದೆ ಇರಪ್ಪೊಡಾಂಡ ಕಾಸ್ ಕೊರ್ಯೆರ ಬೇಡಿಕೆ ದೀಯೆರ್. ಯಾನ್ ಸುರುಕಕ ₹ 37 ಲಕ್ಷ ಕಟ್ಟ್‌ಯೆ. ಮನದಾನಿ ಎನ್ನ ಸೊತ್ತುಲೆನ ವಿಚಾರಣೆನ್ ಆಡಿಟರ್‌ ಒರಿ ಮನ್ಪುವೆರ್ ಪಂದ್ ನಂಬಾದ್ ಅವೆಕ್ಲಾ ₹2.30 ಲಕ್ಷೊನು ಗೆತೊಂಡೆರ್. ವಿಚಾರಣೆ ಮುಗಿನೆರ್ದ್ ಬೊಕ್ಕ ಗೆತೊಂದಿನ ಆತ್ ಕಾಸ್‌ನ್ಲಾ ಸೆ 28 ಗ್ ಪಿರ ಕೊರ್ಪ ಪಂದ್ ಪಾತೆರ ಕೊರ್ದಿತ್ತೆರ್. ಅವೆರ್ದ್ ಬೊಕ್ಕ ಯಾನ್ ಏತ್ ಕಾಲ್ ಮಲ್ತ್ಂಡಲಾ ದೆತ್ತೊಂದಿಜ್ಜೆರ್” ಪಂದ್‌ದ್ ಒಯಿಲ್ ಬರೆಪಾದಿನಾರ್ ಪಂತೆರ್ ಪಂದ್ ತೆರಿಪಾದೆರ್.