Last updated on October 12th, 2024 at 02:20 pm
ತುಳು ತುಳುನಾಡ್ ದ ಜೀವದ ಬಾಸೆ. ತುಳುನಾಡ್ದ ಜನಪದ, ಪರಪೋಕು, ಪರತಿರಿ, ಭಾಷೆದ ಗೇನ ಪಡೆಯೊನರೆ ವಿದ್ಯಾರ್ಥಿಲು ತುಳು ಎಂ.ಎ ಮಲ್ಪುವೆರೆ ಸಿವಾಯಿ ಎಂ.ಎ ಮಲ್ತ್ ಒವ್ವಾ ಬೇಲೆ ತಿಕ್ಕುಂಡು ಪನ್ಪಿನ ಅಂಗಲಪ್ಪುಡು ಅತ್ತ್. ಆಂಡ ತುಳುನಾಡ್ ಡೇ ಉಪ್ಪುನ ತುಳುನು ಒರಿಪಾವೊಡಾಯಿನ ಮಂಗಳೂರು ವಿಶ್ವವಿದ್ಯಾಲಯೊಡು ಒರಾನೆ ತುಳು ಎಂ.ಎದ ಫೀಸ್ ಡಬಲ್ ಮಲ್ತ್ ಜೋಕುಲೆಗ್ ಪುದೆ ದೀತೆರ್ ಪನ್ದ್ ತುಳು ಎಂ.ಎ ಪರವಿದ್ಯಾರ್ಥಿಲೆನ ಸಂಘದ ಗುರ್ಕಾರೆ ಸುಭಾಶ್ಚಂದ್ರ ಕಣ್ವತೀರ್ಥ ಪನ್ಡೆರ್.
ಸುರುಟು 15 ಸಾರ ಫೀಸ್ ಇತ್ತ್ಂಡ್. ಸ್ಥಳೀಯ ಭಾಷಾ ಅಧ್ಯಯನೊಗು ರಿಯಾಯತಿ ಕೊರೊಡು ಪನ್ದ್ ಮನವಿ ಮಲ್ತಿನೆಕ್ಕ್ ಈ ಫೀಸ್ ಬೊಕ್ಕ 2021ರ್ದ್ 11 ಸಾರ ಆಂಡ್. ಇತ್ತೆ ಒರಾನೆ ಉಂದೆನ್ 22 ಸಾರ ಮಲ್ದೆರ್ ಪನ್ದ್ ಪನ್ಡೆರ್.
ಉಂದು ಮಾತ್ರ ಅತ್ತಂದೆ ತುಳು ಎಂ.ಎನ್ ದುಂಬುಕೊನೊಡಾಂಡ ಕಮ್ಮಿರ್ದ್ ಕಮ್ಮಿ 15 ಜನ ವಿದ್ಯಾರ್ಥಿಲು ಬೋಡು ಪನ್ಪಿ ಮಾನದಂಡೊನು ಕಡ್ಡಾಯ ಮಲ್ದೆರ್. ಉಂದು ತುಳುಭಾಷೆದ ಅದ್ಯಯನೊಗು ಮಲ್ಲ ಮುಳ್ಳಾದುಂಡು. ತುಳು ಭಾಷೆಗ್ ಅಧಿಕೃತ ಸ್ಥಾನಮಾನ ಬೋಡು ಪನ್ದ್ ತುಳುನಾಡರ್ಮೆ ಪೊರುಂಬಾಟ ನಡಪುನಗ ತುಳು ಭಾಷೆದ ಉನ್ನತ ಶಿಕ್ಷಣ ಸೌಲಭ್ಯೊನೇ ಉಂತಾವುನ ಪುನೆಪು ನಡತೊಂದುಂಡು. ಈ ಬಗೆಟ್ ಕುಡ್ಲ ವಿವಿದ ಕುಲಪತಿ ಅಂಚೆನೆ ಸಿಂಡಿಕೇಟ್ ಸದಸ್ಯೆರೆಗ್ಲಾ ತೆರಿಪಾದ ಪನ್ದ್ ಪನ್ತೆರ್.
ತುಳು ಎಂ.ಎ ಒರಿಯೊಡಾಂಡ, ತುಳು ಎಂ.ಎ ಕಲ್ಪರೆ ಮನಸ್ ಉಪ್ಪುನ ಜೋಕುಲೆಗ್ ದಾನಿಲು ಸಕಾಯ ಮಲ್ಪೊಡು. ಭಾಷಾ ಅಧ್ಯಯನೊಗು ಸಮಸ್ಯೆ ಆವಂದಿಲೆಕ್ಕ ಶಾಸಕೆರ್, ಸಂಸದೆರ್ ಕ್ರಮ ದೆತೊನೊಡು ಮಾತ್ರ ಅತ್ತಂದೆ ಮಂಗಳೂರು ವಿವಿಡ್ ಪನವುದ ಸಮಸ್ಯೆ ಉಂಡು ಪನ್ದ್ ತುಳು ಎಂ.ಎನ್ ಮುಗಿಪರೆ ತೂಪಿನ ಏತ್ ಸಮ ಪನ್ದ್ ಆರ್ ಕೇನ್ಡೆರ್.