Last updated on October 24th, 2024 at 12:05 pm
ಕುಡ್ಲ: ಮಂಗಳೂರು ವಿಶ್ವವಿದ್ಯಾಲಯ ತೊಡಂಗ್‌ದಿನ ತುಳು ಸ್ನಾತಕೋತ್ತರ ಫೀಸ್‌ನ್ ಒರಾನೆ ಏರ್ತ್‌ದಿನೆನ್ ಸಂಸದೆ ಕ್ಯಾ. ಬ್ರಿಜೇಶ್ ಚೌಟೆರ್ ಖಂಡನೆ ಮಲ್ತಿತ್ತ್‌ದ್, ಸರ್ಕಾರ ಇತ್ತೆನೇ ಫೀಸ್ ಕಮ್ಮಿ ಮನ್ಪೆರ ಬೋಡಾಪಿನ ಕ್ರಮ ಗೆತೊನೊಡು ಪಂದ್ ಒತ್ತಾಯ ಮಲ್ತ್‌ದ್ ರಾಜ್ಯೊದ ಉನ್ನತ ಶಿಕ್ಷಣ ಸಚಿವೆ ಡಾ.ಎಂ.ಸಿ. ಸುಧಾಕರ್ರೆಗ್ ಓಲೆ ಬರೆದ್ ಬಿನ್ನೈತೊಂದೆರ್.
ಕುಡ್ಲ ವಿವಿಡ್ ತುಳು ಸ್ನಾತಕೋತ್ತರ ವಿಭಾಗೊದ 2024-25ನೇ ಸಾಲ್‌ದ ಪೊಸ ಬ್ಯಾಚ್‌ದ ಫೀಸ್‌ನ್ 22,410 ರೂ. ಏರ್ಪುನ ಮುಕೇನ ತುಳು ಭಾಷಾಧ್ಯಯನ ಮಲ್ಪನಕಲೆಗ್ ಆರ್ಥಿಕ ಪುದೆ ತುಂಬಾಯಿಲೆಕ ಆತ್ಂಡ್. ಸುರೂಟು ತುಳು ಎಂಎ ಕೋರ್ಸ್‌ಗ್ 15 ಸಾರ ರೂ. ಪ್ರವೇಶ ಶುಲ್ಕ ಇತ್ತ್ಂಡ್. ಆಂಡ ಇತ್ತೆ ಮೂಜಿ ವರ್ಸೊರ್ದು ಬೊಕ್ಕ 22,410 ರೂ.ಗ್ ಏರ್ತಿನೆರ್ದಾವರ ತುಳು ಎಂಎ ಅಧ್ಯಯನೊದ ಉಮೇದ್ ಇತ್ತಿನಕುಲು ಪಿರಜಾರೊಂದುಲ್ಲೆರ್ ಪಂದ್ ಪಂತೆರ್.
ತುಳು ಭಾಷೆಗ್ ಅಧಿಕೃತ ಭಾಷೆದ ಮಾನಾದಿಗೆ ತಿಕ್ಕೆರೆ ಪುನೆಪುಲು ನಡತೊಂದುಪ್ಪುನಗ, ರಾಜ್ಯ ಸರ್ಕಾರ ತುಳು ಭಾಷೆ ಉತ್ತೇಜನೊಗು ಸಕಾಯ ಆಪಿನ ಎಂಎ ಅಧ್ಯಯನ ಕೋರ್ಸ್‌ದ ಫೀಸ್ ಎಚ್ಚ ಮಲ್ದಿನ ಸಮ ಅತ್ತ್. ಸ್ಥಳೀಯ ಭಾಷೆಗ್ ಒತ್ತು ಕೊರ್ಪಿನ ದಿಟ್ಟಿಡ್ ಪ್ರವೇಶ ಶುಲ್ಕೊಡು ರಿಯಾಯಿತಿ ಕೊರೊಡು ಪನ್ಪಿನ ವಿದ್ಯಾರ್ಥಿಲೆನ ಬಿನ್ನಪುಗು ಓಕೊಂದು 2020-21ನೇ ಸಾಲ್‌ರ್ದ್ 4 ಸಾರ ರೂ. ಕಮ್ಮಿ ಮಲ್ತಿತ್ತ್ಂಡ್. ಆಂಡ, 3 ವರ್ಸೊರ್ದು ಬೊಕ್ಕ ವಿವಿ ಫೀಸ್ ಎಚ್ಚ ಮಲ್ತ್‌ದ್ ತುಳು ಭಾಷೆ ಅಧ್ಯಯನ ಮನ್ಪುನಕ್ಲೆಗ್ ಅನ್ಯಾಯ ಮಲ್ದ್ಂಡ್. ಅಂಚಾದ್, ಇತ್ತೆನೇ ಶುಲ್ಕ ರಿಯಾಯಿತಿ ಕೊರ್ಯೆರ ಸರ್ಕಾರ ಕ್ರಮ ಗೆತೊನೊಡು ಪಂದ್ ಕ್ಯಾ. ಚೌಟ ಬಿನ್ನೈತೊಂದೆರ್
ತುಳು ಎಂಎ ವಿಭಾಗೊಗು ಕಮ್ಮಿಡ್ 15 ಜನ ಇತ್ತೆರ್ನ್ಡ ಮಾತ್ರ ವಿವಿ ತುಳು ಸ್ನಾತಕೋತ್ತರ ವಿಭಾಗೊನು ದುಂಬು ಕೊನೊಯೆರ ಸಾಧ್ಯ. ಇಂಚಿನ ಪೋರ್ತುಡು ಒರಾನೃ ಫೀ ಎಚ್ಚ ಮಲ್ತ್ಂಡ ತುಳು ಎಂಎ ಅಧ್ಯಯನೊಗು ಬರ್ಪಿನಕ್ಲೆನ ಸಂಖ್ಯೆಲಾ ಕಮ್ಮಿ ಆಪಿನ ಪೋಡಿಗೆ ಉಂಡು. ಅಂಚಾದ್, ಕುಡ್ಲ ವಿವಿಡ್ ತುಳು ಸ್ನಾತಕೋತ್ತರ ಡಿಗ್ರಿ ತರಗತಿಲು ಯಶಸ್ವಿಯಾದ್ ನಡಪೊಡಾಂಡ, ರಾಜ್ಯ ಸರ್ಕಾರ ನಡುಕು ಬತ್ತ್‌ದ್ ತುಳು ಎಂಎ ಅಧ್ಯಯನ ಪ್ರವೇಶ ಶುಲ್ಕೊನು ದುಂಬುದಂಚನೆ ಕಮ್ಮಿ ಮಲ್ತ್‌ದ್ ವಿದ್ಯಾರ್ಥಿಲೆಗ್ ಅನುಕೂಲ ಮಲ್ತ್ ಕೊರೊಡೂಂದು ಸಚಿವೆ ಡಾ.ಎಂ.ಸಿ ಸುಧಾಕರ್ರೆಗ್ ಬರೆತಿನ ಓಲೆಡ್ ಕ್ಯಾ. ಬ್ರಿಜೇಶ್ ಚೌಟೆರ್ ಒತ್ತಾಯ ಮಲ್ತ್‌ದೆರ್.