Last updated on October 25th, 2024 at 12:45 pm
ಸಕಲೇಶಪುರ: 23/10/2024 ತಾನಿ 12ಗಂಟೆ 33 ನಿಮಿಷೊದ ಅಂದಾಜಿಗ್ ಮಾರ್ನಳ್ಳಿ,ಪೊಲೀಸ್ ಚೆಕ್ ಪಾಯಿಂಟ್‌ಡ್,
ಗೌರವಾನ್ವಿತ ಸಕಲೇಶಪುರ ಸಬ್ ಇನ್ಸ್ಪೆಕ್ಟರ್
ಸದಾಶಿವ ತಿಪ್ಪಾರೆಡ್ಡಿ ಮೇರ್,
ಗಾಡಿಲೆನ್ ಉಂತಾದ್ ದಾಖಲೆಲು ಇಜ್ಜಂದಿನ ಗಾಡಿಲೆಗ್, ಕಾನೂನು ಪಾಲಿಪಂದೆ ಸಮವಸ್ತ್ರ ಇಜ್ಜಂದಿನ ಡ್ರೈವರ್‌ನಕ್ಲೆನ ಮಿತ್ತ್, ಸೀಟ್ ಬೆಲ್ಟ್ ಪಾಡಂದೆ ಗಾಡಿ ಬುಡ್ಪುನಕಲೆನ ಮಿತ್ತ್ ಫೈನ್ ಪಾಡುನ ಬೇಲೆಡ್ ಇತ್ತೆರ್.
ಬೆಂಗಳೂರುರ್ದ್ ಕುಡ್ಲದಂಚಿಗ್ ಪೋಪುನ ಕುಡ್ಲದ ಅಬ್ದುಲ್ ಬ್ಯಾರಿ ಪನ್ಪಿನ ಡ್ರೈವರ್ ಒರಿ, ಸಮವಸ್ತ್ರ ಪಾಡೊಂದು ಬರ್ಪೆರ್. ಸೀಟ್ ಬೆಲ್ಟ್ ಪಾಡ್ದಿಜ ಪಂದ್ ಐನೂದು ರೂಪಾಯಿ ಫೈನ್ ಕಟ್ಟ್ ಪನ್ನಗ, ಡ್ರೈವರ್ ಎನ್ನ ಕೈಟ್ ಕಟ್ಟೆರೆ ಕಾಸ್ ಇಜ್ಜಿ, ಯಾನ್ ಒಂಜಿ ಕಂಪನಿದ ಗಾಡಿದ ಡ್ರೈವರ್, ಈರ್ ಫೈನ್ ಪಾಡ್ದ್ ರಿಸೀಪ್ಟ್ ಕೊರ್ಲೆ ದನಿಕುಲು ಕಟ್ಟುವೆರ್, ಇತ್ತೆ ಕೊರ್ಯೆರ ಕಾಸ್ ಇಜ್ಜಿ ಪಂದ್ ಪನ್ನಗ ಒರಾನೆ ಸಬ್ ಇನ್ಸ್ಪೆಕ್ಟರ್ ಸದಾಶಿವೆರ್ ಈ ವಾ ಊರುದಾಯೆ? ಕುಡ್ಲಡ್ ಪಾತೆರಿ ಲೆಕ ಮುಲ್ಪ ಆಪುಜಿ, ಪಂದ್ ಜೋರು ಮಲ್ತ್‌ದೆರ್. ಕುಡ ಸಮವಸ್ತ್ರ ಪಾಡಂದಿನ ಒರಿ ಪೊಲೀಸ್ ಕಾವ್‌ಸ್ಟೇಬಲ್ ಈ ಡ್ರೈವರ್‌ಗ್ ಪೆದಂಬು ನೆರ್ದ್, ಅಲ್ಪ ಸ್ಟೇಶನ್ ರೂಮ್‌ಗ್ ಕಾಲರ್ ಪತ್ತ್‌ದ್ ಒಯಿತೊಂದು ಪೋದು ಆಕ್‌ದೆರ್ ಪಂದ್ ನ್ಯೂಸ್ ಪೇಡ್(News Pad) ಪನ್ಪಿನ ಯೂಟ್ಯೂಬ್ ಚಾನೆಲ್ ವರದಿ ಮಲ್ದ್ಂಡ್. ಕಣ್ಣ ನೀರ್ ಪಾಡೊಂದು ಪಿದಯಿ ಬತ್ತಿನ ಡ್ರೈವರ್ ಕುಡ ಅವೇ ಪಾತೆರ ಪನ್ಪೆರ್, ಯಾನ್ ಕಾಸ್ ಕೊರ್ನ್ಡ ಕಂಪನಿರ್ದ್ ಎಂಕ್ ತಿಕ್ಕುಜಿ, ಎಂಕ್ ನಷ್ಟ ಆಪುಂಡು, ಅಧಿಕಾರಿಲು ಫೈನ್ ಪಾಡ್ದ್ ಅವೆತ ರಸೀದಿ ಕೊರ್ನ್ಡ ಕಂಪೆನಿ ಕಟ್ಟುಂಡು ಪಂದ್ ಪನ್ತೆರ್.
ಡ್ರೈವರ್ ಅಬ್ದುಲ್ ಬ್ಯಾರಿನ ಒಟ್ಟುಗು ಪಾತೆರ್ನಗ ನಿನ್ನ ಊರ್ ಒವ್ವು ನ್ದ್ ಕೇನುವೆರ್,
ಯಾನ್ ಕುಡ್ಲದಾಯೆ ಪಂದ್ ಪನ್ನಗ ಏಕವಚನೊಡು ಬಜೀ ಬಪ್ಪರ್ ಪೆದಂಬು ಪಾತೆರ್ದ್, “ನಾನು ಹುಬ್ಬಳ್ಳಿ ಅವ್ನು, ನನ್ ಮಗನೇ ನಿನ್ನ ತಳ ಬುಡ ತುಣ್ಣೇ ತುಳ್ಳು ಎಲ್ಲಾ ಬರೋತ್ತೆ, ಅರ್ಥ ಆಯ್ತಾ? ನಿನ್ನ ಉಲ್ಟ ನೇತು ಹಾಕೋದು ನನಿಗ್ ಗೊತ್ತಿದೆ, ನಿನ್ನ ಅಪ್ಪ ನಂಗೆ ಮಾತನಾಡೊ ಗೊತ್ತಿದೆ” ಅಂಚೆನೇ
“ಲೋಫರ್ ಬಡ್ಡಿ ಮಗ ಮಂಗಳೂರಲ್ ಮಾತಡಿದಂಗ್ ಮಾತನಾಡ್ತಾನೆ” ಪನ್ದ್ ಪನ್ತಿನ ವಿಡಿಯೊಡು ಸಮ ಕೇನುಂಡು.
ಗೌರವಾನ್ವಿತ ಬೇಲೆಡುಪ್ಪುನ ಸಬ್ ಇನ್ಸ್ಪೆಕ್ಟರ್ ಇಂಚ ಪಾತೆರುನ ಏತ್ ಸಮ? ತುಳುವೆರ್, ತುಳುನಾಡ್, ತುಳುಭಾಷೆ ಪಂಡ ಮೊಕಲೆಗ್ ಆತ್‌ಲಾ ಸಸಾರನಾ?
ಪೋಲಿಸ್ ಇಲಾಖೆಡ್ ಇಂಚೆನೇ ಪಾತೆರೊಡು ಪನ್ಪಿನ ನಿಯಮ ದಾಲ ಉಂಡಾ?
ಕುಡ್ಲದಕುಲೆನ್ ಇಂಚ ಪೆದಂಬು ಪಾತೆರ್ದ್ ನೆರ್ತಿನ ಖಂಡನೀಯ, ಈ ಬಗೆಟ್ ಮಿತ್ತ್‌ದ ಅಧಿಕಾರಿಲು ಈ ಪೊಲೀಸ್ ಸಬ್ ಇನ್ಸ್ಪೆಕ್ಟರ್‌ನ ಮಿತ್ತ್ ಸರಿಯಾಯಿನ ಕಾನೂನು ಕ್ರಮ ಗೆತೊನೊಡು.
ಸರಕಾರಿ ಅಧಿಕಾರಿಲು ಅಕಲೆನ ಬೇಲೆ ಮನ್ಪುನೆಕ್ ಎಂಕ್ಲೆನ ವಿರೋಧ ಇಜ್ಜಿ, ನಿಯಮ ಪಾಲನೆ ಮನ್ಪಂದಿನ ಡ್ರೈವರ್‌ನ ಮಿತ್ತ್ ಫೈನ್ ಪಾಡುನಲಾ ನೂದೆಕ್ ನೂದು ಸಮ. ಆಂಡ ಆ ವಿಸಯೊಡು ತಿಕ್ಕಿನೇ ಚಾನ್ಸ್ ಪಂದ್ ಒಂಜಿ ಭಾಷೆದ ಬಗೆಟ್ ಬೊರ್ಚಂದಿನ ಪನ್ಪುನೆಕ್ ಎಂಕುಲ ಏಪೊಗುಲಾ ವಿರೋಧ ಮನ್ಪುವ. ಸರಕಾರಿ ಬೇಲೆಡ್ ಇತ್ತ್‌ದ್ ಭಾಷೆ ಭಾಷೆಲು ಕಂಟ್ಯೊನುನ ಲೆಕಂದಿನ ಪಾತೆರ ಪಾತೆರುನಕುಲು ಸಮಾಜೊದ ಎಡ್ಡೆಪ್ಪುನು ಪೊಲಿಪೆರೆ ತೂಪುನತ್ತಂದೆ ಬೇತೆ ದಾಲ ಆತ್ತ್. ಇಂಚಿನಕಲೆನ ಮಿತ್ತ್ ಕಠಿಣ ಕ್ರಮ ಗೆತೊನೊಡು.