Last updated on October 7th, 2024 at 10:50 am
ಶ್ರೀನಿಕೇತನ ವಸ್ತುಸಂಗ್ರಹಾಲಯ & ಕೆಳದಿ ರಾಣಿ ಚೆನ್ನಮ್ಮಾಜಿ ಅಧ್ಯಯನ ಪೀಠ, ಕುಕ್ಕೆ ಸುಬ್ರಹ್ಮಣ್ಯ, ಪ್ರಾಚ್ಯಸಂಚಯ ಸಂಶೋಧನ ಕೇಂದ್ರ, ಒಡಿಪು ಬೊಕ್ಕ ಉಡುಪಿಗೆ ಬನ್ನಿ-ಯೂಟ್ಯೂಬ್ ಚಾನೆಲ್ ಮೊಕ್ಲೆನ ಒಟ್ಟುಸೇರಿಗೆಡ್ ‘ಪ್ರಾಚ್ಯ: ತೌಳವ ಕರ್ಣಾಟ’ ಪನ್ಪಿ ತರೆ ಬರವುದಡಿಟ್ ಶಿರ್ವದ ಮಾನ್ಯೊಟ್ಟು ಪನ್ಪಿ ಜಾಗೆಡ್ ಉಪ್ಪುನ ಪಿರಾಕ್ದ ಪುಷ್ಕರಣಿ (ದೇವೆರೆ ಕೆದು)ನ್ ನಿರ್ಮಲ ಮಲ್ಪುನ ಕಜ್ಜೊ 06-10-2024ನೇ ಐತಾರದಾನಿ ನಡತ್ಂಡ್.
ಈ ಕಜ್ಜೊದ ಉದಿಪನೊನ್ ಪುಷ್ಕರಣಿ ಉಪ್ಪುನ ಜಾಗೆದ ಗುರ್ಕಾರೆ ಆಯಿನ ಶ್ರೀ ಬಾಲಕೃಷ್ಣ ಉಪಾಧ್ಯಾಯ ಮೇರ್ನ ಮುತಾಲಿಕೆಡ್ ಸಮಾಜೊ ಸೇವಕೆರ್ ಆಯಿನ ಶ್ರೀ ವಿಶ್ವನಾಥ್ ಶೆಣೈ ಮೇರ್ ನಡಪುಡ್ದುಕೊರಿಯೆರ್. ಈ ಕಜ್ಜೊದ ಮುಖ್ಯ ಸಂಯೋಜಕೇರಾಯಿನ ಶ್ರೀನಿಕೇತನ ವಸ್ತುಸಂಗ್ರಹಾಲಯ & ಕೆಳದಿ ರಾಣಿ ಚೆನ್ನಮ್ಮಾಜಿ ಅಧ್ಯಯನ ಪೀಠ-ಕುಕ್ಕೆ ಸುಬ್ರಹ್ಮಣ್ಯ ನೆತ್ತ ಉಪನಿರ್ದೇಶಕರಾಯಿನ ಶ್ರುತೇಶ್ ಆಚಾರ್ಯ ಮೂಡುಬೆಳ್ಳೆ ಮೇರ್ನ ಒಟ್ಟು ಸಹ ಸಂಯೋಜಕೇರಾಯಿನ ಪ್ರಾಚ್ಯಸಂಚಯ ಸಂಶೋಧನ ಕೇಂದ್ರ-ಒಡಿಪು ನೆತ್ತ ಅಧ್ಯಯನ ನಿರ್ದೇಶಕೆರಾಯಿನ ಪ್ರೊ. ಎಸ್.ಎ ಕೃಷ್ಣಯ್ಯ ಬೊಕ್ಕ ಉಡುಪಿಗೆ ಬನ್ನಿ-ಯೂಟ್ಯೂಬ್ ಚಾನೆಲ್ ನೆತ್ತ ಸ್ಥಾಪಕೆರಾಯಿನ ಡಾ. ಗಣೇಶ್ ಪ್ರಸಾದ್ ಜಿ. ನಾಯಕ್ ಇತ್ತೆರ್.
ಪರಿತಿರಿನ್ ಒರಿಪಾವುನ ಕಜ್ಜೊಲು ನನಾತ್ ನಡಪೊಡು ಬೊಕ್ಕ ಪ್ರಾಚ್ಯ: ತೌಳವ ಕರ್ಣಾಟದ ಇಂಚಿನ ಅಭಿಯಾನೊಲೆಗ್ ಮಾತೆರ್ಲ ಬೆರಿಸಾಯೋ ಕೊರೊಡು ಪಂದ್ ಕ್ರೆಡಿಟ್ ಕೊ- ಆಪರೇಟಿವ್ ಬ್ಯಾಂಕ್, ಒಡಿಪುದ ವ್ಯವಸ್ಥಾಪಕೆರಾಯಿನ ಶ್ರೀ ಉಮೇಶ್ ಆಚಾರ್ಯ ಮೇರ್ ಪನ್ಡೆರ್.
ಪುಷ್ಕರಣಿನ್ ಒರಿಪಾವುನ ಒಟ್ಟುಗು ಪಸಂದ್ರೊನ್ಲಾ ಜಾಗೃತೆ ಮಲ್ತೊನೋಡ್ ಅಂಚೆನೇ ಪ್ರಾಚ್ಯ: ತೌಳವ ಕರ್ಣಾಟ ನೆತ್ತ ಉದ್ದೇಶ, ನನದ ಯೋಜನೆಲೆನ ಬಗ್ಗೆ ಪ್ರೊ. ಎಸ್.ಎ ಕೃಷ್ಣಯ್ಯ ಮೇರ್ ಪೊಲಬು ಕೊರಿಯೆರ್.
ಮಾನ್ಯೊಟ್ಟುಡು ಉಪ್ಪುನ ಈ ಪುಷ್ಕರಣಿ (ದೇವೆರೆ ಕೆದು) ಶಿರ್ವ ಗ್ರಾಮೊಡೇ ಪಿರಾಕ್ದ, ಅಂಚನೆ ಸುಮಾರ್ 13-14 ನೆ ಶತಮಾನೊಗು ಸೇರುಂಡ್ ಪಂದ್ ಅಧ್ಯಯನೊರ್ದ್ ತೋಜಿದ್ ಬೈದ್ಂಡ್. ಈ ಪುಷ್ಕರಣಿ ಒರಿಪಾವುನ ಕಜ್ಜೊ ಊರುದಕುಲ್, ಪರಿತಿರಿದ ಕಲ್ಪಾದಿ ಕಲ್ಪಾರ್ಥಿಲು, ಪರಿತಿರಿದ ಆಸಕ್ತೆರ್, ಸಂಘಟನೆದಕ್ಲ ಬೆರಿಸಾಯೋಡ್ ನಡತಂಡ್. ಅಂಚನೇ ಮಲ್ಪನೇ ಉಪ್ಪುನ 14ನೆ ಶತಮಾನೊದ ಅಪರಿಪೂರ್ಣ ಶಾಸನ ಕಲ್ಲ್‌ದ ಜಾಗೃತೆ ಮಲ್ಪುನ ಕಜ್ಜೊಲ ನಡತ್ಂಡ್.
ಕಜ್ಜೊದ ನಿರೂಪಣೆನ್ ಕು. ಆರ್. ಶ್ರಾವ್ಯಾ ಮೇರ್ ನಡಪುಡ್ದುಕೊರಿಯೆರ್.