Last updated on October 19th, 2024 at 12:25 pm
ರಾಮಕುಂಜ: ಮಾನ್ಯತೆ ಇತ್ತಿನ ಅನುದಾನದಾಂತಿನ ಶಾಲೆಲೆನ ಸಂಘ, ಕರ್ನಾಟಕ (RUPSA) ಮೊಕುಲು ಕೊರ್ಪಿನ 2024ನೇ ಸಾಲ್‌ದ ರಾಜ್ಯ ಮಟ್ಟೊದ ‘ಉತ್ತಮ ಶಿಕ್ಷಕ ಪ್ರಶಸ್ತಿ’ಗ್ ಕಡಬ ತಾಲೂಕ್‌ದ ಶ್ರೀ ರಾಮಕುಂಜೇಶ್ವರ ಇಂಗ್ಲಿಷ್ ಮೀಡಿಯಂ ಹೈಸ್ಕೂಲ್‌ದ ಟೀಚರ್ ಶ್ರೀಮತಿ ಸರಿತಾ ಜನಾರ್ದನ ಆಲಂಗಾರ್ ಮೇರ್ ಅಜತ್ ಬೈದೆರ್. ಅ.21ಕ್ ಬೆಂಗಳೂರ್‌ಡ್ ನಡಪುನ ಕಾರ್ಯಕ್ರಮೊಟು ಶಿಕ್ಷಣ ಸಚಿವೆರ್ ಮಧು ಬಂಗಾರಪ್ಪೆ ಈ ಪ್ರಶಸ್ತಿ ಕೊರ್ಯೆರ ಉಲ್ಲೆರ್.
ಸರಿತಾ ಜನಾರ್ದನ ಮೆರೆನ M.Sc, D.Ed, B.Ed ಪದವಿಲು ಆದಿತ್ತ್‌ದ್ ರಾಮಕುಂಜದ ಶ್ರೀ ರಾಮಕುಂಜೇಶ್ವರ ಇಂಗ್ಲಿಷ್ ಮೀಡಿಯಂ ಹೈಸ್ಕೂಲ್ಡ್ ಲೆಕ್ಕ ಬೊಕ್ಕ ತುಳು ಕಲ್ಪಾದಿಯಾದ್ ಕರಿನ 17 ವರ್ಸೊರ್ದಿಂಚಿ ಬೆನೊಂದುಲ್ಲೆರ್. ಮೇರ್ ಕಲ್ಪಾವೊಂದುಪ್ಪುನ ಗಣಿತ ಬೊಕ್ಕ ತುಳು ವಿಷಯೊಲೆಡ್ ಕರಿನ 17 ವರ್ಸೊರ್ದಿಂಚಿ SSLC ಪರೀಕ್ಷೆಡ್ ಸಂಸ್ಥೆ 100% ಫಲಿತಾಂಶ ಗೆತೊಂದುಂಡು.
ರಾಜ್ಯೊಡೇ ಕಡೀರ ಸರ್ತಿ ತುಳುನು ಐಚ್ಛಿಕ ಭಾಷೆಯಾದ್ ಕನತಿನ ಅಂಚೆನೇ ಏಪೊಲಾ ಜೋಕುಲೆಗ್ ತುಳು ಪರತಿರಿ-ಪರಪೋಕುದ ವಿಷಯೊಲೆನ್ ತೆರಿಪಾವುನೆಟ್ ದುಂಬು ಇಪ್ಪುನ ಶ್ರೀ ರಾಮಕುಂಜೇಶ್ವರ ಇಂಗ್ಲಿಷ್ ಮೀಡಿಯಂ ಹೈಸ್ಕೂಲ್ಡ್ ಪ್ರತಿವರ್ಷ ನಡಪುನ ಆಟಿ ಅಮಾಸೆ, ಅಟ್ಟೆಮಿ, ಪುದ್ದಾರ್, ತುಡರ ಪರ್ಬ, ಕೆಡ್ಡಸ ಸೇರ್ದ್ ತುಳುನಾಡ್‌ದ ಪ್ರಮುಖ ಆಚರಣೆಲು ಸರಿತಾ ಮೇಡಂನ ಮುತಾಲಿಕೆಡೇ ಗೌಜಿಡ್ ನಡಪುಂಡು. ತುಳುತ ಗಂತ್‌ದ ಗೇನ ಇಪ್ಪುನ ಮೇರ್ ಪಾಕ ಕಾರ್ಯಾಗಾರೊಲೆಡ್ ಸಂಪನ್ಮೂಲ ವ್ಯಕ್ತಿಯಾದ್ಲಾ ಪಾಲ್‌ಪಡೆಪೆರ್. ಕರ್ನಾಟಕ ಸರಕಾರೊದ ತುಳು ಪಠ್ಯಪುಸ್ತಕ ಪರಿಷ್ಕರಣೆ ಸಮಿತಿದ ಪದುಕೆರ್ಲಾ ಆದುಲ್ಲೆರ್.