“ಇಲ್ಲಲ್ ವಾ ಬಾಸೆ ಆಂಡಲಾ ಪಾತೆರ್ಲೆ, ಪಿದಯಿಡ್ ಕನ್ನಡ ಪಾತೆರ್ಲೆ”-ಕರ್ನಾಟಕೊದ ಜನಕ್ ಲೆಪ್ಪು ಕೊರ್ನ ಸಿಎಂ ಸಿದ್ದರಾಮಯ್ಯೆ

Last updated on October 7th, 2024 at 08:21 am

ನಿಕುಲು ಇಲ್ಲಡ್ ವಾ ಬಾಸೆ ಆಂಡಲಾ ಪಾತೆರ್ಲೆ, ಆಂಡ ಪಿದಯಿ ವ್ಯಾವಹಾರಿಕವಾದ್ ಕನ್ನಡ ಪಾತೆರ್ಲೆ ಪಂದ್ ಸಿಎಂ ಸಿದ್ದರಾಮಯ್ಯೆ ಪಂಡೆರ್. ಸನಿಯಾರ ರಾಯಚೂರುದ ಕೃಷಿ ವಿಶ್ವವಿದ್ಯಾನಿಲಯೊದ ಕೃಷಿ ಮೇಳ ಮೈದಾನೊಡು ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆ, ಕನ್ನಡ ಅಭಿವೃದ್ಧಿ ಪ್ರಾಧಿಕಾರೊ ‘ಕನ್ನಡ ಸಂಭ್ರಮ 50’ದ ಲೆಕ್ಕೊಡು ಅಟ್ಟನೆ ಮಲ್ತಿತ್ತಿನ ಗೋಕಾಕ್ ಚಳವಳಿ: ಹಿನ್ನೋಟ-ಮುನ್ನೋಟ ಪನ್ಪಿ ಲೇಸ್‌ದ ಉದಿಪನ ಮಲ್ತ್ ಪಾತೆರ್ನ ಸಿಎಂ ಕನ್ನಡ ನೆಲ, ಜಲ, ಸಂಸ್ಕೃತಿ, ಬಾಸೆ, ಭೂಮಿ ಮಾತಲಾ ಕನ್ನಡಮಯ ಆವೊಡು ಪಂಡೆರ್.

ಈ ನೆಲತ ಬಾಸೆ ಕನ್ನಡೊನು ಬುಡುದು ಕೊರ್ಪಿನಾತ್ ಎಡ್ಡೆನ್ನಕುಲಾವೊರ್ಚಿ. ಕರ್ನಾಟಕೊಡು ಇಪ್ಪುನಕುಲು ಮಾತೆರ್ಲಾ ಕನ್ನಡಿಗೆರೇ. ಕನ್ನಡೊನೇ ವ್ಯಾವಹಾರಿಕ, ಆಡಲ್ತೊದ ಬಾಸೆ. ಕನ್ನಡ ಮಾತೆರ್ದ್ ಮಿತ್ತುಪ್ಪಡ್. ರಾಜ್ಯೊಡು ಕನ್ನಡೊನೇ ಸುರೂತ ಬಾಸೆ ಪಂದ್ ಪಂಡೆರ್.

ಇನಿತ ದಿನೊಟು ಕನ್ನಡೊದ ಸ್ಥಿತಿಗತಿನ್ ಬರ್ಪಿ ದಿನೊಟು ಬಾಸೆದ ಪರವಾದ್ ನಿರ್ಧಾರೊಲೆನ್ ಗೆತೊನೊಲಿ ಪನ್ಪಿನೆಕ್ ಸರ್ಕಾರ ಇಂಚಿನ ಮಹತ್ವೊದ ಕನ್ನಡ ಕಜ್ಜೊಲೆನ್ ಅಟ್ಟನೆ ಮಲ್ದ್ಂಡ್. ನನ ಬರ್ಪಿನ ದಿನೊಕ್ಲೆಡ್ ಈ ಚರ್ಚೆಲೆನೇ ನೀತಿ ನಿರೂಪಣೆಗ್ ಗಲಸುನ ಯೋಜನೆ ಪಾಡೊಂದ ಪಂದ್ ಸಿಎಂ ಪಂಡೆರ್.