Last updated on October 11th, 2024 at 03:42 pm
ಕಳತ್ತೂರು ಇಚ್ಲಂಪಾಡಿ ಹಿರಿಯ ಬುನಾದಿ ಶಾಲೆದ ನಿಲೆಟ್ಟ್, ಜೈ ತುಲುನಾಡ್(ರಿ.) ಕಾಸ್ರೋಡ್ ಎಗ್ಗೆ ಬೊಕ ಕೇರಳ ತುಳು ಅಕಾಡೆಮಿದ ಒತ್ತು ಸೇರಿಗೆಡ್ ತುಲು ಲಿಪಿ ಬ್ರಹ್ಮೆ ಡಾ| ಪುಂಡೂರು ವೆಂಕಟರಾಜ ಪುಣಿಂಚತ್ತಾಯರೆನ ಪುಟ್ಟುಪರ್ಬೋ-ವಿಶ್ವ ತುಳು ಲಿಪಿ ದಿನ ಪುವೆಂಪು ನೆಂಪು ಲೇಸ್ ಬೊಕ ಬಲೆ ತುಲು ಲಿಪಿ ಕಲ್ಪುಗ ಕಜ್ಜ ಕೊಟ್ಯದ ಉದಿಪನ ಇಚ್ಲಂಪಾಡಿ ಹಿರಿಯ ಬುನಾದಿ ಶಾಲೆ ಕಳತ್ತೂರು ಕುಂಬಳೆಡ್ 10-10-2024 ಗುರ್ವಾರ ಮಧ್ಯಾಹ್ನ ಪಿಜಿರ್ದ್ 2 ಗಂಟೆಗ್ ನಡತ್ಂಡ್.
ಲೇಸ್‌ದ ಗುರ್ಕಾರ್ಮೆಡ್ ಜೈ ತುಲುನಾಡ್ (ರಿ.) ಕಾಸ್ರೋಡ್ ಎಗ್ಗೆದ ಗುರ್ಕಾರ್ಲು ಶ್ರೀಮತಿ ಕುಶಲಾಕ್ಷಿ ವಿ ಕುಲಾಲ್ ಕಣ್ವತೀರ್ಥ ಇತ್ತೆರ್. ಕೇರಳ ತುಲು ಅಕಾಡೆಮಿದ ಗುರ್ಕಾರ್ಲು ಶ್ರೀ ಜಯಾನಂದೆರ್ ಲೇಸ್ ಉದಿಪನ ಮಂತ್‌ದ್ ತುಲು ಭಾಷೆ ಅಧಿಕೃತ ಭಾಸೆ ಆವೊಡು ಅಯಿಕ್ ಎಣ್ಮನೇ ಪರಿಚ್ಛೇದೊಡ್ ತಾನಮಾನ ತಿಕ್ಕೊಡು, ತುಲು ಭಾಸೆ ಸಂಸ್ಕೃತಿ ಒರಿತೊನುನವು ನಮ್ಮ ಜಬದಾರಿಗೆ ಆದುಂಡು ಪಂಡೆರ್. ಈ ನಿಲೆಟ್ ಜೈ ತುಲುನಾಡ್ ಸಂಘಟನೆದ ಪೊರುಂಬಾಟೊಗು ಎಡ್ಡೆಪ್ಪು ಬಯಕಿಯೆರ್.
ಮಲ್ಲ ಬಿನ್ನೆರಾದ್ ಶಾಲೆದ ವ್ಯವಸ್ಥಾಪಕೆರ್ ಶ್ರೀ ಗಣೇಶ ರಾವ್, ಇ.ಹಿ.ಬು.ಶಾಲೆದ ಮುಖ್ಯ ಶಿಕ್ಷಕೆರ್ ಶ್ರೀ ರಾಧಾಕೃಷ್ಣ ತುಂಗಾ, ಶಾಲೆದ ಪರ ವಿದ್ಯಾರ್ಥಿ ಸಂಘೊದ ಗುರ್ಕಾರ್ಲು ಶ್ರೀ ಹೆಚ್ ಶಿವರಾಮ ಭಟ್, ಕುಂಬ್ಳೆ ಗ್ರಾಮ ಪಂಚಾಯತ್ ಪದುಕೆರ್ ಶ್ರೀಮತಿ ಪುಷ್ಪಲತಾ ಪಿ ಶೆಟ್ಟಿ ಕಾಜೂರು, ಪುವೆಂಪುರೆನ ಮಗೆ, ಸಾಹಿತಿ ಶ್ರೀ ವಿಜಯರಾಜ್ ಪುಣಿಂಚತ್ತಾಯೆರ್, ಶಿಕ್ಷಕ-ರಕ್ಷಕ ಸಂಘೊದ ಗುರ್ಕಾರ್ಲು ಶ್ರೀ ವಸಂತ್ ಚೂರಿತಡ್ಕ, M P T Aದ ಗುರ್ಕಾರ್ಲು ಶ್ರೀಮತಿ ಸುಧಾ ಶೆಟ್ಟಿ, ಶಾರದ ವಿದ್ಯಾಲಯ ಕುಡ್ಲದ ಕಲ್ಪಾದಿಲು ಸತ್ಯಮೂರ್ತಿ ಅರಳಿತ್ತಾಯ ಮುಕುಲು ಎಡ್ಡೆಪ್ಪು ಬಯಕಿಯೆರ್. ಹಳೆ ವಿದ್ಯಾರ್ಥಿ ಸಂಘೊದ ಶ್ರೀ ಹೆಚ್ ಶಿವರಾಮ ಭಟ್ ಡಾ.ಪುಂಡೂರು ವೆಂಕಟರಾಜ ಪುಣಿಂಚತ್ತಾಯೆರೆನ ಬಗೆಟ್ ಪಾತೆರ್ಯೆರ್. ಜೈ ತುಳುನಾಡ್ (ರಿ ) ಕೇಂದ್ರ ಸಮಿತಿದ ಒತ್ತು ಗುರ್ಕಾರ್ಲು ಶ್ರೀಮತಿ. ವಿನೋದ ಪ್ರಸಾದ್ ರೈ ಕಾರಿಂಜ ತುಲು ಲಿಪಿ ಕಜ್ಜಕೊಟ್ಯ ಉದಿಪನ ಮಂತ್‌ದ್ ತುಲು ಲಿಪಿತ ಮಹತ್ವೊದ ಬಗೆಟ್ ತೆರಿಪಾಯೆರ್. ಶಾಲೆದ ಜೋಕುಲೆನ ಸುಗಿಪುದೊಟ್ಟುಗು ಸುರುವಾಯಿನ ಲೇಸ್‌ನ್ ಜೈ ತುಲುನಾಡ್ ರಿ ಕಾಸ್ರೋಡು ಎಗ್ಗೆದ ಕಾರ್ಯಂತೆರ್ ಶ್ರೀ ಹರಿಕಾಂತ ಕಾಸರಗೋಡು ಎದ್ಕೊಂಡೆರ್. ಶಾಲೆದ ಕಲ್ಪಾದಿಲು ಪುವೆಂಪು ವಿರಚಿತ ಭಾವಗೀತೊಲೆನ್ ಪಂಡೆರ್. ಜೈ ತುಲುನಾಡ್‌ದ ಪದುಕೆರ್ ಶ್ರೀ ಶ್ರೀನಿವಾಸ ಆಳ್ವ ಕಳತ್ತೂರು ಲೇಸ್ ಸುಧಾರಿಕೆ ಮಂತ್‌ದ್, ಶಾಲೆದ ಕಲ್ಪಾದಿ ಶ್ರೀ ಸುಧಾಕರ ಸೊಲ್ಮೆ ಸಂದಾಯೆರ್. ಶಾಲೆದ ಜೋಕುಲು ಬೊಕ ಕಲ್ಪಾದಿಲು, ಜೈ ತುಲುನಾಡ್ ಕಾಸ್ರೋಡ್ ಎಗ್ಗೆದ ಪದುಕೆರಾಯಿನ ಉಮೇಶ್ ಸಿರಿಯಾ ಸಹಕಾರ ಮಂತೆರ್. ಅಂಚೆನೆ ಪುವೆಂಪು ವಿರಚಿತ ಕವನ ವಾಚನ ನಡತ್ತ್ಂಡ್. ಶಾಲೆದ ಜೋಕುಲೆಗ್ ಶ್ರೀಮತಿ ವಿನೋದ್ ಪ್ರಸಾದ್ ರೈರೆನ ಪರವಾದ್ ಚೀಪೆ ಪಟ್ಟ್‌ಯೆರ್. ಎಗ್ಗೆದ ಒತ್ತು ಗುರ್ಕಾರ್ಲು ಶ್ರೀ ಪ್ರವೀಶ್ ಕುಲಾಲ್ ಮಾತೆರೆಗ್ಲಾ ತುಲು ಲಿಪಿ ಚಾರ್ಟ್ ಒದಗಾಯೆರ್.