Last updated on November 18th, 2024 at 04:19 pm
ಒಡಿಪು: ಮಲ್ಪೆಡ್ ನೀರ್‌ದ ಡ್ರಮ್ದುಲಯಿ ಸಂಶಯಾಸ್ಪದ ರಿತಿಟ್ ಬಸ್ ಡ್ರೈವರ್ ಒರಿಯನ ಮೃತ ದೇಹ ತಿಕ್ಕ್‌ದ್ಂಡ್. ಪಾಳೆಕಟ್ಟೆ ನಿವಾಸಿ ಪ್ರಸಾದ್ (40) ಸಂಶಯಾಸ್ಪದವಾದ್ ತೀರ್ದಿನಾರ್.
ಕೊಡವೂರು ಗ್ರಾಮೊದ ಪಾಳೆಕಟ್ಟೆ ಒಂಜನೇ ಕ್ರಾಸ್‌ಡ್ ನೀರ್ ದಿಂಜದ್ ದೀದಿತ್ತಿನ ಪ್ಲಾಸ್ಟಿಕ್ ಡ್ರಮ್ದುಲಯಿ ಪ್ರಸಾದ್‌ರೆನ ದೇಹ ತಿಕ್ಕ್‌ದ್ಂಡ್. ಮಸ್ತ್ ಪರೊಂದುಲಾ ಇತ್ತಿನ ಮೇರ್, ಸಿಟಿ ಬಸ್ ಡ್ರೈವರ್ ಆದಿತ್ತೆರ್. ಮಾನಸಿಕ ಖಿನ್ನತೆರ್ದ್ ನರಲೊಂದಿತ್ತಿನ ಪ್ರಸಾದ್ ಇಲ್ಲದ ಬರಿಟ್ ಇತ್ತಿನ ನೀರ್ ದಿಂಜದ್ ದೀದಿತ್ತಿನ ಪ್ಲಾಸ್ಟಿಕ್ ಡ್ರಮ್‌ದ ಉಲಯಿ ಸೊಂಟೊರ್ದ್ ಮಿತ್ತ್‌ದ ಭಾಗ ಪಿದಯಿ ಎಕ್ಕಲೊಂದು ಮಿತ್ತ್ ತೂವೊಂದಿತ್ತಿ ಸ್ಥಿತಿಟ್ ತೋಜಿದ್ ಬೈದೆರ್. ತೀರ್ದಿನಾರೆನ ಕೆಕ್ಕಿಲ್, ಮೋನೆಡ್ ನೆತ್ತೆರ್ ಬತ್ತಿತ್ತ್‌ದ್, ಮೋನೆ ಬಾತ್ಹದ್ಂಡ್. ಮೆರೆನ ಮರಣೊದ ನೆವನ ತೆರಿದ್ ಬೈದಿಜಿ. ಈ ಬಗೆಟ್ ಮಲ್ಪೆ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.
ಪ್ರಸಾದೆರೆನ ಸಾವು ಪಾಕ ಸಂಶಯೊಲೆಗ್ ಸಾದಿ ಮಲ್ತ್ ಕೊರ್ದಿತ್ತ್‌ದ್ ಜಿಲ್ಲಾ ಪೋಲೀಸ್ ವರಿಷ್ಠಾಧಿಕಾರಿಲೆಗ್ ಇತ್ತೆನೇ ಉನ್ನತ ಮಟ್ಟೊದ ತನಿಖೆ ಮನ್ಪೊಡು ಪನ್ದ್ ಕರ್ನಾಟಕ ರಾಜ್ಯ ದಲಿತ ಸಂಘರ್ಷ ಸಮಿತಿದ ರಾಜ್ಯ ಸಮಿತಿ ಪದುಕೆ ಜಯನ್ ಮಲ್ಪೆ ಆಗ್ರಹ ಮಲ್ತ್.ದೆರ್. ಮೃತದೇಹೊದ ಪಾಕ ಭಾಗೊಲೆಡ್ ಗಡಿಕುಲಾದಿತ್ತ್‌ದ್ ಸಂಶಯೊ ಬರೊಂದುಂಡು. ಆತ್ಮಹತ್ಯೆ ಪನ್ದ್ ತೋಜುನ ಈ ನಡಕೆಡ್ ಪಾಕ ಸಂಶಯಾಸ್ಪದ ಅಂಶೊಲು ಇಪ್ಪುನೆರ್ದಾವರ ಊರ್‌ದನ ಸುತ್ತಮುತ್ತ ಪೋಡಿಗೆದ ವಾತಾವರಣ ಉಂಡಾತ್ಂಡ್. ತೀರ್ದಿನಾರೆನ ಇಲ್ಲದಕುಲೆಗ್ ಪತ್ತ ಜಡ್ತೆ ಮಲ್ತ್‌ದ್ ನ್ಯಾಯ ಕೊರ್ಪಾವೊಡು ಪನ್ದ್ ಜಿಲ್ಲಾ ಪೋಲೀಸ್ ಆಧೀಕ್ಷಕೆರೆಗ್ ದಲಿತ ಮುಖಂಡೆರಾಯಿನ ವಾಸುದೇವ ಮುದ್ದೂರು, ಗಣೇಶ್ ನೆರ್ಗಿ, ಹರೀಶ್ ಸಲ್ಯಾನ್, ರವಿ ಲಕ್ಷ್ಮೀನಗರ ಆಗ್ರಹ ಮಲ್ದೆರ್.