Last updated on November 29th, 2024 at 01:30 pm
ಕುಡ್ಲ : ಕುಡ್ಲ ಪೊಲೀಸ್ ಕಮೀಷನರ್ ಜನಪರ ಪ್ರತಿಭಟನೆಲೆನ್ ನಿರಾಕರಿತ್‌ದ್ ಪ್ರಜಾಪ್ರಭುತ್ವೊದ ಹಕ್ಕುನ್ ತೊರ್ತೊಂದುಲ್ಲೆರ್ ಪನ್ದ್ ಆರೋಪಿತ್‌ದ್ ಆಯುಕ್ತೆರನ್ ಅಡಿಲಕ್ಕಾಯೆರ (ವರ್ಗಾವಣೆ ಮನ್ಪೆರ) ಒತ್ತಾಯ ಮಲ್ತ್‌ದ್ DYFI ದ.ಕ ಜಿಲ್ಲಾ ಸಮಿತಿ ಗುರುವಾರ ಪೇಂಟೆದ ರಾವ್ ಆಂಡ್ ರಾವ್ ಸರ್ಕಲ್‌ದಲ್ಪ ರೋಡ್ ಬ್ಲಾಕ್ ಮಲ್ತ್‌ದ್ ಪ್ರತಿಭಟನೆಗ್ ದುಂಬಾಂಡ್.
ಕಮೀಷನರ್ ಅಗ್ರವಾಲ್ ಹಟಾವೋ ಮಂಗಳೂರು ಭಚಾವೋ ಪನ್ದ್ ಘೋಷಣೆಲೆನ್ ಲೆತ್ತೊಂದು ಸಾದಿ ತಡೆಪೆರ ದುಂಬಾಯಿನ ಡಿವೈಎಫ್ಐ ಕಾರ್ಯಕರ್ತೆರೆನ್ ಪಾಕ ಸಂಖ್ಯೆಡ್ ಇತ್ತಿನ ಪೊಲೀಸೆರ್ ಉಂತಾಯೆರ ತೂಯೆರ್. ಡಿವೈಎಫ್ಐ ಕಾರ್ಯಕರ್ತೆರೆನ್ ಕೈದ್ ಮಲ್ಪುನ ಪೊರ್ತುಡು ಪೊಲೀಸೆರೆ ನಡುಟು ಮಚ್‌ಮಚ್ ನಡತ್ಂಡ್. ಸುಮಾರ್ 50 ರ್ದ್‌ಲಾ ಎಚ್ಚ ಡಿವೈಎಫ್ಐ ನಾಯಕೆರೆ ಒಟ್ಟು ಕಾರ್ಯಕರ್ತೆರೆನ್ ಕೈದ್ ಮಲ್ತೆರ್.
ಡಿವೈಎಫ್ಐ ದ.ಕ ಜಿಲ್ಲಾ ಕಾರ್ಯದರ್ಶಿ ಸಂತೋಷ್ ಬಜಾಲ್ ಪಾತೆರ್ದ್ ಪೊಲೀಸ್ ಆಯುಕ್ತೆರಾಯಿನ ಅಗ್ರವಾಲ್‌ನ್ ನಿಯೋಜನೆ ಮಲ್ದಿನ ಅಕ್ರಮೊಲೆನ್ ಉಂತಾಯೆರ ಅತ್ತಂದೆ ಪೊರ್ಮ್ಬಾಟಗಾರೆರೆನ್ ಉಂತಾಯೆರ ಅತ್ತ. ನಗರೊಡು ಮಟ್ಕಾ, ವೇಶ್ಯಾವಾಟಿಕೆ, ಇಸ್ಪೀಟ್ ಕ್ಲಬ್, ಪೊಯ್ಯೆದ ಸೇರ್ದ್ ಅಕ್ರಮ ದಂಧೆಲು ರಾಜಾರೋಷವಾದ್ ನಡತೊಂದಿತ್ತ್ಂಡಲಾ ಈ ಬಗೆಟ್ ಕ್ರಮಗೆತೊನಂದಿನ ಅಂಕೆಗ್ ಕನವಂದಿನ ಕಮೀಷನರ್ ಜನಪರವಾದ್ ನಡಪುನ ಚಳುವಳಿಲೆನ್, ಪೊರ್ಮ್ನಿಬಾಟಗಾರೆರೆನ್ ಅಂಕೆಡ್ ದೀಯೆರ ತೂಪುನೆನ್ ತೂನಗ ಮೇರ್ ಏರೆನ ಪರವಾದ್ ಬೇಲೆ ಮಲ್ತೊಂದುಲ್ಲೆರ್ ಪನ್ಪಿನ ಸ್ಪಷ್ಟವಾದುಂಡು. ಇಂಚಿನ ಕಮೀಷನರ್ ಕುಡ್ಲಗ್ ಕಪ್ಪು ಚುಕ್ಕೆ. ಸರಕಾರ ಇತ್ತೆನೇ ಕಮೀಷನರ್ ಅನುಪಮ್ ಅಗ್ರವಾಲ್‌ನ್ ಟ್ರಾನ್ಸ್‌ಫರ್ ಮನ್ಪೊಡು. ಇಜಿಂಡ ಡಿವೈಎಫ್ಐ ಪೊರ್ಮ್ಬಾಟ ಜೋರು ಮನ್ಪುಂಡು ಪನ್ದ್ ಪನ್ಡೆರ್. ಡಿವೈಎಫ್ಐ ದ.ಕ ಜಿಲ್ಲಾಧಕ್ಷೆರಾಯಿನ ಬಿ.ಕೆ ಇಮ್ತಿಯಾಜ್ ಪಾತೆರ್ದ್ ಕಮಿಷನರ್‌‌ನ ಮಿತ್ತ್ ಕ್ರಮ ಗೆತೊನಿಜಿಂಡ ಜಿಲ್ಲೆಗ್ ಬರ್ಪಿನ ಮುಖ್ಯಮಂತ್ರಿಗ್ ಕಪ್ಪುಬಾವುಟ ತೋಜಾವ. ಸರಕಾರ ಇತ್ತೆನೇ ಪೊಲೀಸ್ ಕಮಿಷನರ್‌ನ್ ಅಡಿಲಕ್ಕಾವೊಡು ಇಜಿಂಡ ಪೊರ್ಮ್ಬಾಟ ಜೋರು ಮನ್ಪ ಪನ್ದ್ ಪನ್ಡೆರ್.