Last updated on November 12th, 2024 at 01:40 pm
ಕಡಬ: ಮೊಬೈಲ್ ಅಂಗಡಿಯೊಂಜೆಟ್ ಕಲ್ವೆ ಒರಿ ಕಸ್ಟಮರ್ ಲೆಕ ಬತ್ತ್‌ದ್ ಮೊಬೈಲ್ ಲಕ್ಕಾದಿನ ನಡಕೆ ಕಡಬದ ಪೇಂಟೆದ ಮೊಬೈಲ್ ಅಂಗಡಿಯೊಂಜೆಟ್ ನಡತ್‌ದ್ಂಡ್. ಇತ್ತೆ ಆ ಕಲ್ವೆದ ವೀಡಿಯೋ ಸೋಷಿಯಲ್ ಮೀಡಿಯಾಡ್ ವೈರಲ್‌ಲಾ ಆತ್ಂಡ್.
ನ.9ದಾನಿ ನಡಕೆ ನಡತಿತ್ತ್‌ದ್ ಇತ್ತೆ ವೀಡಿಯೋ ವೈರಲ್ ಆವೊಂದುಂಡು. ಮೊಬೈಲ್ ಅಂಗಡಿ ದನಿ ಬೇಲೆದ ಮಿತ್ತ್ ಪಿದಯಿ ಪೋದಿತ್ತೆರ್. ಈ ಪೊರ್ತುಡು ಅಂಗಡಿಡ್ ಇತ್ತಿನ ಸಿಬ್ಬಂದಿ ಕುಡೊರಿ ಕಸ್ಟಮರ್‌ದ ಪಾತೆರೊಂದಿತ್ತೆರ್. ಆ ಪೊರ್ತುಡು ಅಂಗಡಿಗ್ ಬತ್ತಿನ ಜವನೆ ಅಂಗಡಿಡ್ ದೀದಿತ್ತಿನ ಮೊಬೈಲ್‌ನ್ ಕಿಸೆಕ್ ದಿಂಜಾವೊಂದು ಪದ್ರಾಡಾತೆ.
ಬಜಕರೆತ ಜನ ಒರಿ ಸೇಲ್ ಮನ್ಪೆರೆ ಆ ಪೋನ್ ಕೊರ್ದಿತ್ತ್‌ದ್ ಈ ಬಗೆಟ್ ವಿಚಾರಿಪೆರ ಬತ್ತಿನಗ ಮೊಬೈಲ್ ಇಜ್ಜಂದಿನ ತೆರಿದ್ಂಡ್. ಅಪಗನೇ ಸಿಸಿಟಿವಿ ಪರಿಶೀಲಿಪುನಗ ಬೊಳ್ಳೂರು ಮುಟ್ಟದ ಜವನೆ ಮೊಬೈಲ್ ಲಕ್ಕಾದಿನ ತೆರಿದ್ ಬೈದ್ಂಡ್. ಅಲ್ಪದಕಲೆನ ಸಕಾಯೊಡು ಆಯನ ಇಲ್ಲಡೆ ಪೋದು ವಿಚಾರಿಪುನಗ ಆಯೆ ಇಜ್ಜಂದಿನೆನ್ ತೂದು ಪೊಲೀಸ್ ಒಯಿಲ್ ಕೊರ್ಪುನ ಎಚ್ಚರ್ಗೆ ಕೊರ್ದಿತ್ತೆರ್. ರಡ್ಡ್ ದಿನ ಕರಿದ್ ಕಡಬದ ಗೂಡಂಗಡಿಯೊಂಜೆಟ್ ಮೊಬೈಲ್ ದೀದ್ ಒಲವು ಕೊರ್ದು ಪೋತೆ ಪಂಡ್‌ದ್ ತೆರಿದ್ ಬೈದ್ಂಡ್.
ಅ್ಂಬ್ಯೆ ಕೆಲ ದಿನೊಕು ದುಂಬು ಕುಡೊಂಜಿ ಮೊಬೈಲ್ ಶಾಪ್‌ರ್ದ್ ಮೆಮೋರಿ ಕಾರ್ಡ್ ಕಂಡ್‌ದಿತ್ತೆ. ಅವೆಕ್ ದುಂಬು ಬೈಕ್ ಲಕ್ಕಾದ್ ತಿಕ್ಕ್‌ದ್ ಬೂರ್ದಿತ್ತೆ. ಆತೇ ಅತ್ತಂದೆ ಒಂಜಿ ಮದಿಮೆದಿಲ್ಲಡ್ಲಾ ಕಂಡೆರ ಪುನೆಪು ಬತ್ತ್‌ದ್, ತಿಕ್ಕ್‌ದ್ ಬೂರ್ದಿತ್ತೆ ಪಂದ್ ಅಲ್ಪದಕುಲು ತೆರಿಪಾದೆರ್.