Last updated on November 20th, 2024 at 02:32 pm
ಕುಡ್ಲ ನವೆಂಬರ್ 20: ಕುಡ್ಲದ ಮಲ್ಲ ಟ್ರಾಫಿಕ್‌ದ ಜಾಗೆ ಆಯಿನ ನಂತೂರ್‌ಡ್ ಪ್ಲೈಓವರ್‌ದ ಬೇಲೆ ನನ ದಾನ್ನ ತೊಡಂಗೊಡು ಪನ್ನಗ ಇತ್ತೆ ಕುಡೊಂಜಿ ಪೊಸ ತಲೆಪು ಎದುರಾತ್ಂಡ್. ಮಿಯಾವಾಕಿ ಕಾಡ್‌ನ್ ಕಡ್ಪಂದಿಲೆಕ ಹೈಕೋರ್ಟ್‌ ಕೊರ್ತಿನ ತಡೆಯಾಜ್ಞೆರ್ದ್ ಕುಡ ಕಾಮಗಾರಿ ಟೊಂಕ ಪಾಡೊಂದು ಪೋಪಿಲೆಕ ಆತ್ಂಡೊ. ಈ ಕಾಡ್ ಬುಲೆಪಾವೆರ ಮಹಾನಗರಪಾಲಿಕೆನೇ ಪರ್ಮಿಶನ್ ಕೊರ್ದಿತ್ತ್‌ದ್, ಇತ್ತೆ ಪಾಲಿಕೆಗ್ ನಿಂಗೆರಾವಂದಿ ನಂಗ್ ಲೆಕ ಆತ್ಂಡ್.
ಕುಡ್ರದ ಜನೊಕ್ಲೆನ ದಶಕೊಲೆನ ಸಮಸ್ಯೆ ನಂತೂರು ಸರ್ಕಲ್, ಮುಲ್ಪ ಟ್ರಾಫಿಕ್ ಜಾಮ್‌ಗ್ ತಿಕ್ಕಂದೆ ಇಪ್ಪುನಕುಲು ಬಾರೀ ಕಮ್ಮಿ, ಪಾಕ ಜನ ಮುಲ್ಪ ಜೂವೊಲಾ ಕಲೆವೊಂದೆರ್. ರಾಷ್ಟ್ರೀಯ ಪೆರ್ಸಾದಿಲು ಇಪ್ಪುನ ಈ ಸರ್ಕಲ್‌ಡ್ ಪ್ಲೈಓವರ್ ಅತ್ತ್ಂಡ ಓವರ್ ಪಾಸ್‌ಗ್ ಪಾಕ ಸಮೆರ್ದಿಂಚಿ ಬೇಡಿಕೆ ಇತ್ತ್ಂಡ್. ಇತ್ತೆ ಅವೆತ ಬೇಲೆ ಸುರು ಆತ್ಂಡ್, ಆಂಡ ಮಂಗಳೂರು ಮಹಾನಗರ ಪಾಲಿಕೆ ಮಲ್ದಿನ ಒಂಜಿ ತಪ್ಪುರ್ದಾವರ ಇತ್ತೆ ಕುಡ ಬೇಲೆ ಉಂತಾವುನ ಅರ್ಕ್‌ಗ್ ಬೈದ್ಂಡ್. ನಂತೂರ್‌ಡ್ ಇತ್ತೆನೇ ಬೇಲೆ ಸುರುವಾದ್ ಆತ್ಂಡ್. ರಾಷ್ಟ್ರೀಯ ಪೆರ್ಸಾದಿ ಪ್ರಾಧಿಕಾರ ಅಲ್ಪದ ಮರೊಕ್ಲೆನ್, ಮೂಜಿ ಕಡೆತ ಗುಡ್ಡೆಲೆನ್ ಜರ್ತೊಂದುಪ್ಪುನಗನೇ, ದುಂಬುದ ವಿಚಾರಣೆ ಮುಟ್ಟ ಮಿಯಾವಾಕಿ ಕಾಡ್ ಕಡ್ಪಂದಿಲೆಕ ಪ್ರಾಧಿಕಾರೊಗು ಅ.9ತಾನಿ ಹೈಕೋರ್ಟ್‌ ತಡೆಯಾಜ್ಞೆ ಕೊರ್ತುಂಡು.
ಕುಡ್ಲದ ವನ ಚಾರಿಟೆಬಲ್‌ ಟ್ರಸ್ಟ್‌ಗ್ ಕಾಡ್ ಬುಲೆಪಾಯೆರ ಸಿಂಜಿನ್‌ ಇಂಟರ್‌ನ್ಯಾಷನಲ್‌ಡ್ ಬೊಕ್ಕ ಬಯೋಕಾನ್‌ ಫೌಂಡೇಶನ್‌ ಪ್ರಾಯೋಜಕತ್ವ ಮಲ್ತಿತ್ತ್‌ದ್, ಈ ಸಂಸ್ಥೆಲೇ ಕಾಡ್ ಕಡ್ಪುನ ನೋಟಿಸ್‌‌ದ ವಿರುದ್ಧ ರಿಟ್‌ ಅರ್ಜಿ ಪಾಡ್ದಿತ್ತೆರ್. 2001ಟ್ ತೊರತ್ತಲ್-ಬಿ.ಸಿ.ರೋಡ್‌ ರಾಷ್ಟ್ರೀಯ ಪೆರ್ಸಾದಿ ಚತುಷ್ಪಥ ಬೇಲೆದ ಪೊರ್ತುಡು ನಂತೂರ್‌ಡ್ ಮಿತ್ತಸಂಕೊದ ಯೋಜನೆ ಇತ್ತ್ಂಡಲಾ, ಪರಿಶಿಷ್ಟೆರೆ ಇಲ್ಲ್ ದೆಪ್ಪುನ, ಭೂಗತ ಕರೆಂಟ್ ಕೇಬಲ್‌ ದೆಪ್ಪಾವಂದಿನೆರ್ದಾವರ ಯೋಜನೆ ಕ್ಯಾನ್ಸಲ್ ಆದಿತ್ತ್ಂಡ್. ಮಿತ್ತಸಂಕೊದ ಪ್ರಸ್ತಾಪ ಇತ್ತ್ಂಡಲಾ, 2021 ಟ್ ಮಿಯಾವಾಕಿ ಅರಣ್ಯ ನಿರ್ಮಾಣೊಗು ಮಹಾನಗರ ಪಾಲಿಕೆ ಅನುಮತಿ ಕೊರ್ದಿತ್ತ್‌ದ್, 2022ತ ಜೂ.5ರ ಪಸಂದ್ರ ದಿನೊತಾನಿ ಉದಿಪನ ಮಲ್ತಿತ್ತೆರ್. ಸಾರೊರ್ದುಲಾ ಎಚ್ಚ ದೈಕುಲೆನ್ ನಡ್ತೆರ್.
ನಂತೂರು ಜಂಕ್ಷನ್‌ಡ್ ಶೇ.90 ಭೂಸ್ವಾಧೀನ ಮಲ್ತ್‌ದ್, ಅಕ್ಟೋಬರ್‌ಡ್ ಓವರ್‌ಪಾಸ್‌ ಬೇಲೆ ಸುರು ಮನ್ಪೊಡಾಂಡ್. ಶೇ.83 ಜಾಗೆ ತಿಕ್ಕ್‌ದ್ಂಡ್. ಪಾಲಿಕೆ ಅನು ಗೆತೊಂದು ಮಲ್ದಿನ ಮಿಯಾವಾಕಿ ಕಾಡ್ ಕಡ್ಪೆರ ಕೋರ್ಟ್‌ ತಡೆಯಾಜ್ಞೆ ಕೊರ್ತಿನೆರ್ದಾವರ ಕಾಮಗಾರಿ ಮೆಲ್ಲ ಆತ್ಂಡ್. ನ್ಯಾಯಂತಡೆಕ್ ಮನವರಿಕೆ ಮಲ್ತ್‌ದ್, ಆದೇಶ ಬತ್ತಿ ಬೊಕ್ಕ ಕಾಮಗಾರಿ ತೇದಿಗ್ ದಸ್ಕತ್ ಪಾಡಿ ಬೊಕ್ಕ 24 ತಿಂಗೊಲುಡು ಮುಗಿಪುನ ಯೋಜನೆ ಉಂಡು ಪನ್ದ್ ರಾಷ್ಟ್ರೀಯ ಪೆರ್ಸಾದಿ ಪ್ರಾಧಿಕಾರೊದ ಅಧಿಕಾರಿಲು ತೆರಿಪಾದೆರ್.