Last updated on November 29th, 2024 at 03:21 pm
ಪುತ್ತೂರು ನವೆಂಬರ್ 29: ರಡ್ಡರೆ ವರ್ಸೊಗು ದುಂಬು ನಡತಿನ ಎಡ್ತೆಗ್ ಸಂಬಂಧಿತ್ದ್ ಎಡ್ತಿನಾಯಗ್ ದಂಡ ಪಾಡ್ದ್, ಬೈಕ್ ಏರೆನ ಪುದರ್‌ಡ್ ಇತ್ತ್ಂಡ ಆಯಗ್ 2 ವರ್ಸ ಜೈಲ್ ಶಿಕ್ಷೆ ಕೊರ್ದು ಪುತ್ತೂರು ನ್ಯಾಯಂತಡೆ ಆದೇಶ ಮಲ್ದ್ಂಡ್.
ನೆಟ್ಟಣಿಗೆ ಮುಡ್ನೂರು ಗ್ರಾಮೊದ ಕೊಟ್ಯಾಡಿಡ್ 2022ರ ಫೆ.27ತಾನಿ ಕೇರಳದ ಮುಳಿಯೂರು ನಿವಾಸಿ ಶಾಹಿದ್ ಪನ್ಪಿನಾಯೆ ಬುಡೊಂದು ಪೋವೊಂದಿತ್ತಿನ ಕೇರಳ ರಿಜಿಸ್ಟ್ರೇಷನ್‌ದ ಬೈಕ್, ಸಾದಿ ಬರಿಟ್ ಉಂತುದಿತ್ತಿನ ಕೊಟ್ಯಾಡಿದ ದುಗ್ಗಮ್ಮ (55) ಪನ್ಪಿನಾರೆಗ್ ಎಡ್ತ್‌ದಿತ್ತ್ಂಡ್. ನಡಕೆಡ್ ದುಗ್ಗಮ್ಮ ತೀರ್ದಿತ್ತೆರ್. ಬೈಕ್‌ಡ್ ಪಿರವು ಕುಲ್ದಿತ್ತಿನ ನೆಬಿಸಾ ಪನ್ಪಿನಾರೆಗ್ ಗಡಿಕುಲಾದಿತ್ತ.
ನಡಕೆಗ್ ಸಂಬಂಧಿತ್ದ್ ಸಂಪ್ಯ ಸ್ಟೇಶನ್ ಪೊಲೀಸೆರ್ ಜಡ್ತೆ ಮಲ್ತಿನಪಗ ಬೈಕ್ ಬುಡೊಂದಿತ್ತಿನ ಶಾಹಿದ್‌ಡ ಲೈಸೆನ್ಸ್ ಇಜ್ಜಿ ಪನ್ಪಿನ ತೆರಿದ್ ಬತ್ತಿತ್ತ್ಂಡ್. ಅಂಚಾದ್ ಬೈಕ್‌ದ ದನಿ ಮುಳಿಯಾರು ನಿವಾಸಿ ಮಹಮ್ಮದ್ ಶಾಕೀರ್‌ನ ಮಿತ್ತ್‌ಲಾ ಪ್ರಕರಣ ದಾಕಲ್ತೊಂದಿತ್ತೆರ್. ಆರೋಪಿಲಿರ್ವೆರೆನ ಮಿತ್ತ್ ನ್ಯಾಯಂತಡೆಕ್ ದೋಷಾರೋಪಣಾ ಪಟ್ಟಿ ಸಂದಾದಿತ್ತೆರ್.
ವಿಚಾರಣೆ ಮಲ್ತಿನ ಪುತ್ತೂರ್‌ದ ಎಚ್ಚಿಗೆದ ಪೆರಿಯ ವ್ಯಾವಹಾರಿಕ ನ್ಯಾಯಾಧೀಶೆ ದೇವರಾಜ್ ವೈ.ಎಚ್‌. ಮೇರ್, ಬೈಕ್ ಬುಡೊಂದಿತ್ತಿನ ಶಾಹಿದ್‌ಗ್ ₹ 5 ಸಾವಿರ ದಂಡ, ಬೈಕ್‌ದ ದನಿ ಮಹಮ್ಮದ್ ಶಾಕೀರ್‌ಗ್ 2 ವರ್ಷ ಜೈಲ್, ₹ 5 ಸಾವಿರ ದಂಡ ಪಾಡ್ದೆರ್. ಪ್ರಾಸಿಕ್ಯೂಷನ್ ಪರವಾದ್ ಅಸಿಸ್ಟೆಂಟ್ ಪಬ್ಲಿಕ್ ಪ್ರಾಸೆಕ್ಯೂಟರ್ ಚೇತನಾದೇವಿ ವಾದ ಮಲ್ತಿತ್ತೆರ್.