ಸರ್ಕಾರಿ ಕಾಮಗಾರಿಲೆಡ್ ಮುಸ್ಲಿಮೆರೆಗ್ ರಿಸರ್ವೇಶನ್: ಕಾಯ್ದೆ ತಿದ್ದೆರೆ ಸಿಎಂ ಸೂಚನೆ

Last updated on November 14th, 2024 at 11:18 am

ಬೆಂಗಳೂರು: ಸರ್ಕಾರೊದ ಸಿವಿಲ್ ಕಾಮಗಾರಿಲೆನ ಕಂತ್ರಾಟ್‌ಡ್ ಮುಸ್ಲಿಮೆರೆಗ್ ರಿಸರ್ವೇಶನ್ ಕೊರ್ಪುನ ಪ್ರಸ್ತಾವನೆ ಸಿಎಂ ಸಿದ್ದರಾಮಯ್ಯೆರೆನ ಸರ್ಕಾರೊದ ಎದುರು ಇತ್ತ್‌ದ್, ಅ್ಂದೆಕ್ ಮುಖ್ಯಮಂತ್ರಿ ಸಿದ್ದರಾಮಯ್ಯೆರ್ ಅನುಮೋದನೆ ಕೊರ್ತೆರ್ ಪನ್ದ್ ಪನ್ದಿತ್ತ್‌ದ್, ಕಾಯ್ದೆನ್ ಬೋಡಾಪಿಲೆಕ ತಿದ್ದೆರೆ ಪಣವುವೈವಾಟ್‌ದ ಇಲಾಖೆಗ್ ಸೂಚನೆ ಕೊರ್ತೆರ್ ಪನ್ದ್ ತೆರಿದ್ ಬೈದ್ಂಡ್.

1 ಕೋಟಿ ರೂ. ಮುಟ್ಟದ ಕಟ್ವಾನೊಲೆನ ಬೇಲೆಲೆನ ಸಾರ್ವಜನಿಕ ಗುತ್ತಿಗೆಡ್ ಮುಸ್ಲಿಂ ಸಮುದಾಯೊಗು ಶೇ. 4 ಮೀಸಲಾತಿ ಕೊರ್ಪುನ ಬಗೆಟ್ ಅಲ್ಪಸಂಖ್ಯಾತೆರೆ ಕಲ್ಯಾಣ ಇಲಾಖೆ ಪ್ರಸ್ತಾವನೆ ಕೊರ್ದಿತ್ತ್ಂಡ್. ಅ್ಂದೆಕ್ ಅನುಮೋದನೆ ಕೊರ್ತಿನ ಸಿಎಂ, ತಿದ್ದೆರೆ ಸೂಚನೆ ಕೊರ್ತೆರ್.


ಬೆಳಗಾವಿಡ್ ನಡಪರೆಗಿಪ್ಪುನ ಚಳಿಗಾಲೊದ ಅಧಿವೇಶನೊಡು ಕಾಯ್ದೆಗ್ ತಿದ್ದುಪಡಿ ಕನತ್‌ದ್ ಮಂಡನೆ ಮನ್ಪೆರ ಸರ್ಕಾರ ದುಂಬಾತ್ಂಡ್. ಇತ್ತೆನೇ ಎಸ್‌ಸಿ ಎಸ್‌ಟಿ ಸಮುದಾಯೊಗು  ಕಂತ್ರಾಟ್‌ಡ್ ಶೇ. 24ತ ರಿಸರ್ವೇಶನ್ ಕೊರ್ತಿನ  ಸರ್ಕಾರ, ಒಬಿಸಿ ಸಮುದಾಯೊಗು ಶೇ. 4 ರಿಸರ್ವೇಶನ್ ಕೊರ್ತುಂಡು. 2A ಅಡಿಟ್ ಶೇ 15 ರಿಸರ್ವೇಶನ್ ಉಂಡು. ಒಟ್ಟು ಸರ್ಕಾರೊದ ಕಾಮಗಾರಿಲೆಡ್ ಶೇ. 43ರಷ್ಟು ರಿಸರ್ವೇಶನ್ ಆತ್ಂಡ್. ಇತ್ತೆ ಮುಸ್ಲಿಂ ಸಮುದಾಯೊಗ್ಲಾ ಸರ್ಕಾರೊದ ಕಾಮಗಾರಿಲೆಡ್ ಶೇ 4 ತಾತ್ ರಿಸರ್ವೇಶನ್ ಕೊರ್ಯೆರ ತೊಡಂಗ್‌ದ್ಂಡ್‌.

ಸಿಎಂಗೆ ಬಿನ್ನಪು ಮಲ್ತಿತ್ತಿನ ಮುಸ್ಲಿಂ ಶಾಸಕೆರ್, ಸಚಿವೆರ್
ಪ್ರವರ್ಗ 2ಬಿ ಅಡಿಟ್ 1 ಕೋಟಿ ರೂ. ಮುಟ್ಟದ ಕಾಮಗಾರಿಲೆಡ್ ಮುಸ್ಲಿಮೆರೆಗ್ ಕೊರೊಡು ಪಂದ್ ಆಗ್ರಹಿತ್‌ದ್ ಮುಸ್ಲಿಂ ಸಚಿವೆರ್ ಬೊಕ್ಕ ಶಾಸಕೆರ್ ಸಿಎಂ ಸಿದ್ದರಾಮಯ್ಯೆರೆಗ್ ಓಲೆ ಬರೆದಿತ್ತೆರ್. ಸಚಿವ ಜಮೀರ್ ಅಹ್ಮದ್ ಖಾನ್, ರಹೀಂ ಖಾನ್, ಸಿಎಂ ರಾಜಕೀಯ ಕಾರ್ಯದರ್ಶಿ ನಸೀರ್ ಅಹ್ಮದ್ ಓಲೆ ಬರೆದಿತ್ತೆರ್. ಈ ಓಲೆಗ್ ಪರಿಷತ್ ಮುಖ್ಯ ಸಚೇತಕೆ ಸಲೀಂ ಅಹ್ಮದ್, ಶಾಸಕೆರಾಯಿನ ತನ್ವೀರ್ ಸೇಠ್, ಅಬ್ದುಲ್ ಜಬ್ಬಾರ್, ಎನ್ ಎ ಹ್ಯಾರಿಸ್, ರಿಜ್ವಾನ್ ಅರ್ಷದ್, ಆಸೀಫ್ ಸೇಠ್, ಖನೀಜಾ ಫಾತಿಮಾ, ಇಕ್ಬಾಲ್ ಹುಸೇನ್, ಬಲ್ಕಿಸ್ ಬಾನು ದಸ್ಕತ್ ಪಾಡ್ದಿತ್ತೆರ್. ಆ ಪ್ರಕಾರೊಡು, ಕಾಯ್ದೆಗ್ ತಿದ್ದುಪಡಿ ಮಲ್ತ್‌ದ್ ಮಂಡನೆ ಮನ್ಪೆರ ಸಿಎಂ ಸಿದ್ದರಾಮಯ್ಯೆ ಸೂಚನೆ ಕೊರ್ತೆರ್.

ಸಂಡೂರು, ಚನ್ನಪಟ್ಟಣ ಬೊಕ್ಕ ಶಿಗ್ಗಾಂವಿ ಉಪಚುನಾವಣೆಗ್ ದುಂಬು ಮುಸ್ಲಿಂ ಓಟು ಗೆಂದೆರ ರಾಜ್ಯ ಸರ್ಕಾರೊದ ಬಜೀ ದೆತ್ತ್ ಪಾಡಿನ ನಡಕೆ ಪನ್ದ್ ಬಿಜೆಪಿ ಶಾಸಕೆ ಬಸನಗೌಡ ಪಾಟೀಲ್ ಯತ್ನಾಳ್ ಟ್ವೀಟ್ ಮಲ್ತ್‌ದ್ ಟೀಕೆ ಮಲ್ದೆರ್.