Last updated on November 5th, 2024 at 05:53 pm
ಬಂಟ್ವಾಳ : ತುಂಬೆದ ಶ್ರೀ‌ಮಹಾಲಿಂಗೇಶ್ವರ ದೇಲಂತಡೆದ ಎದುರುದ ಬಾಕಿಲ್‌ದ ಚಿಲ್ಕ ಪೊಲ್ತ್‌ದ್ ಉಲಯಿ ಪೊಗ್ಗುದು ಕಲ್ವೆರ್ ಸುಮಾರ್ 2 ಲಕ್ಷಗ್ಲಾ ಎಚ್ಚಿನ ಮೌಲ್ಯೊದ ಸೊತ್ತುಲೆನ್ ಕಂಡ್‌ದೆರ್ ಪಂದ್ ತೆರಿದ್ ಬೈದ್ಂಡ್.
ದೇವಲ್ಯೊದ ಕಛೇರಿಡಿತ್ತಿನ ಸುಮಾರ್ ಒಂಜರೆ ಕೆ.ಜಿ ದಿನ್ನದ ಮಹಾಲಿಂಗೇಶ್ವರ ದೇವೆರೆನ ಬೊಳ್ಳಿದ ಜಲದ್ರೋಣನ್ ಕಂಡ್‌ದೆರ್. ಅ್ಂದೆತ ಒಟ್ಟುಗು ಕಪಾಟ್, ಕ್ಯಾಶ್ ಡ್ರಾವರ್ ಬೊಕ್ಕ ಕಾಣಿಗೆ ಡಬ್ಬಿಡ್ ಇತ್ತಿನ ಸುಮಾರ್ 50 ಸಾರದಾತ್ ಕಾಸ್‌ನ್ಲಾ ಕಂಡ್‌ದೆರ್ ಪಂದ್ ಪನೊಂದುಲ್ಲೆರ್.
ದೇವಲ್ಯೊದ ಸುತ್ತ ದುಂಬೆಚ್ಚರ್ಗೆದ ಕ್ರಮವಾದ್ ಸಿ.ಸಿ.ಕ್ಯಾಮರಾ ಪಾಡ್ದಿತ್ತ್ಂಡಲಾ ಕಲ್ವೆರ್ ಕ್ಯಾಮರಾದ ಡಿವಿ‌ಆರ್‌ನ್ಲಾ ಬುಡಂದೆ ಲಕ್ಕಾದೆರ್. ಸೋಮಾರ ಕಾಂಡೆ ಬಂಟ್ವಾಳ ಗ್ರಾಮಾಂತರ ಪೋಲೀಸ್ ಸ್ಟೇಷನ್ ಸೀಮೆದ ಪರಂಗಿಪೇಟೆದ ಒಂಜಿ ದೇವಲ್ಯೊಡು ಕಲ್ವೆ ನಡತೊಂದುಪ್ಪುನೆನ್ ಸ್ವತಃ ಅಲ್ಪದ ಭಟ್ರೇ ಸಿ.ಸಿ.ಕ್ಯಾಮರಾಡ್ ತೂತೆರ್, ಆಂಡಲಾ ಕಲ್ವೆರೆಡ ಮಾರಕಾಸ್ತ್ರೊಲು ಇತ್ತಿನೆರ್ದಾವರ ಅಕಲೆನ್ ಉಂತಾಯೆರಾದಿಜ್ಜಂಡ್ ಈ ಕಲ್ವೆದ ವಿಡಿಯೋ ಸಿ.ಸಿ.ಕ್ಯಾಮರಾಡ್ ಕೈದಾತಿನ ಸುದ್ದಿಯಾದಿತ್ತ್ಂಡ್. ಅಂಚಿನ ಒಲಳವ್ವೇ ರೀತಿಯ ಕರಕರಿಲು ಆವಂದಿಲೆಕ ಕಲ್ವೆರ್ ಮಂಡೆಕರ್ಚಿ ಮಲ್ತ್‌ದ್, ಮುಲ್ಪದ ಸಿ.ಸಿ.ಕ್ಯಾಮರಾದ ಪೂಟೇಜ್‌ಲೆನ್ ತುಂಬೊಂದು ಪೋತೆರ್ ಪಂದ್ ಪಾತೆರೊಂದುಲ್ಲೆರ್.
ಕೋಡೆ ಕಾಂಡೆ (ನ.5 ತಾನಿ) ದೇವಲ್ಯೊದ ಸಿಬ್ಬಂದಿಯೊರಿ 6 ಗಂಟೆಗ್ ಬನ್ನಗ ಎದುರುದ ಚಿಲ್ಕ ಪೊಲಿದಿತ್ತ್‌ದ್ ಬಾಕಿಲ್ ದೆತ್ತ್‌ದಿಪ್ಪುನ ಗುಮನೊಗು ಬೈದ್ಂಡ್. ಅಪಗನೇ ಆರ್ ದೇವಲ್ಯೊದ ಆಡಳ್ತ ಮೊಕ್ತೇಸರೆ ಚಂದ್ರಪ್ರಕಾಶ್ ಶೆಟ್ಟಿ ತುಂಬೆ ಮೆರೆಗ್ ತೆರಿಪಾದೆರ್. ಇಂಚಿಪ್ಪೊಗು ಈ ದೇವಲ್ಯೊದ ಬ್ರಹ್ಮಕಲಶ ನಡತಿತ್ತ್ಂಡ್. ಜಾಗೆಗ್ ಬಂಟ್ವಾಳ ಪೋಲೀಸ್ ಇನ್ಸ್ ಪೆಕ್ಟರ್ ಶಿವಕುಮಾರ್, ಎಸ್.ಐ.ಹರೀಶ್, ಶ್ವಾನದಳ ಬೊಕ್ಕ ಬೆರೆಲ್ದಚ್ಚಿ ತಜ್ಞೆರ್ ಬತ್ತಿತ್ತ್‌ದ್ ಜಡ್ತೆ ನಡತೊಂದುಂಡು.