Last updated on December 21st, 2024 at 09:24 am
ಕುಡ್ಲ: ಪೊಣ್ಣು ಬಾಲೆ ಬೊಕ್ಕ ಮದ್ಮೆ ಆತಿನ ಪೊಂಜೊವು ಬೆಂದ್ರ್ ಕೊಟ್ಯಡ್ ಮೀಪುನೆನ್ ತನ್ನ ಮೊಬೈಲ್‌ಡ್ ವೀಡಿಯೋ ಮಲ್ತಿನ ತೋಟ ಬೆಂಗ್ರೆ ನಿವಾಸಿ ರಂಶೀದ್‌ಗ್ ಕುಡ್ಲದ ಎಚ್ಚಿಗೆದ ಜಿಲ್ಲಾ ಬೊಕ್ಕ ಸತ್ರ ನ್ಯಾಯಂತಡೆ ಎಫ್‌ಟಿಎಸ್‌ಸಿ -1 (ಪೋಕ್ಸೋ) ಐನ್ ವರ್ಸೊದ ಕರ್ಪಿಲ್ಲ ಶಿಕ್ಷೆ ಬೊಕ್ಕ 15 ಸಾರ ದಂಡ ಪಾಡ್ದ್ ತೀರ್ಪು ಕೊರ್ತುಂಡು.
ಪೊಣ್ಣು ಬಾಲೆ ಬೊಕ್ಕ ಪೊಂಜೊವು ಇಲ್ಲದ ಬೆಂದ್ರ್‌ಕೊಟ್ಯಡ್ ಮೀಪುನೆನ್ ಆರೋಪಿ ರಂಶೀದ್‌ 2024ತ ಜುಲೈ 5 ಬೊಕ್ಕ 7ತಾನಿ ರಾತ್ರೆ 8-9 ಗಂಟೆದ ನಡುಟು ತನ್ನ ಮೊಬೈಲ್‌ಡ್ ವೀಡಿಯೋ ಮಲ್ತ್‌ದಿತ್ತೆ. ಜು. 16ತಾನಿ ಕುಡೊಂಜಿ ಇಲ್ಲದ ಟೆರೇಸ್‌‌ದ ಮಿತ್ತ್ ವೀಡಿಯೋ ಮನ್ಪುನ ಉದ್ದೇಶೊಡು ಪೋದಿತ್ತ್‌ದ್ ಅವೆನ್ ಇಲ್ಲದಟುಲು ತೂದು ಆಯೆ ಏರ್ಂದ್ ಲೆತ್ತ್ ಕೇನ್ನಡ, ಆಯೆ ಅಲ್ಪರ್ದ್ ಲಾಗಿದ್ ಬಲ್ತ್‌ದಿತ್ತೆ. ಈ ಪೊರ್ತುಡು ಆಯನ ಮೊಬೈಲ್‌ ತಿರ್ತ್ ಬೂರ್ದ್ಂಡ್. ಮೊಬೈಲ್‌ ವಶಮಲ್ತೊಂಡಿನ ಇಲ್ಲದಕುಲು ಆಯನ್ ನಾಡ್ ಪತ್ತ್‌ದ್ ಆಯನ ಕೈಟೇ ಮೊಬೈಲ್‌ದ ಲಾಕ್‌ ದೆಪ್ಪಾದ್ ತೂನಗ ಬಾತ್‌ರೂಂಡ್ ಮೀಪುನ ವೀಡಿಯೋ ಇತ್ತ್ಂಡ್. ಈ ಬಗೆಟ್ ಜು. 17ತಾನಿ ಪಣಂಬೂರು ಸ್ಟೇಷನ್‌ಡ್ ಒಯಿಲ್ ಬರೆಪಾದಿತ್ತೆರ್.
ಪ್ರಕರಣೊದ ಸುರೂತ ಜಡ್ತೆನ್ ಪಣಂಬೂರು ಸ್ಟೇಶನ್‌ದ ಪಿಎಸ್‌ಐ ರಾಘವೇಂದ್ರೆ ಮೇರ್ ಮಲ್ತಿತ್ತ್‌ದ್, ಪಿಎಸ್‌ಐ ಶ್ರೀಕಲಾ ಮೇರ್ ಜಡ್ತೆ ಪತ್ತ ಮಲ್ತ್‌ದೊ ನ್ಯಾಯಂತಡೆಕ್ ದೋಷಾರೋಪಣೆ ಪಟ್ಟಿ ಸಂದಾದಿತ್ತೆರ್.
ಪ್ರಕರಣೊದ ವಿಚಾರಣೆ ಮಲ್ತಿನ ಕುಡ್ಲದ ಎಚ್ಚಿಗೆದ ಜಿಲ್ಲಾ ಬೊಕ್ಕ ಸತ್ರ ನ್ಯಾಯಂತಡೆ ಎಫ್‌ಟಿಎಸ್‌ಸಿ -1 (ಪೋಕ್ಸೋ)ದ ನ್ಯಾಯಾಧೀಶೆ ವಿನಯ್‌ ದೇವರಾಜ್‌ ಮೇರ್, ರಂಶೀದ್‌‌ನ ಮಿತ್ತ್‌ದ ಆರೋಪ ಸಾಬೀತಾಯಿನೆರ್ದಾವರ ಶಿಕ್ಷೆ ಪಾಡ್ದ್ ತೀರ್ಪು ಕೊರ್ತೆರ್. ಪ್ರಕರಣೊದ ಸಂತ್ರಸ್ತೆರೆಗ್ 1 ಲಕ್ಷ ರೂ. ಪರಿಹಾರ ಕೊರ್ಯೆರ ಜಿಲ್ಲಾ ಕಾನೂನು ಸೇವಾ ಪ್ರಾಧಿಕಾರೊಗು ನ್ಯಾಯಾಧೀಶೆರ್ ನಿರ್ದೇಶನ ಮಲ್ದೆರ್. ಸರಕಾರೊದ ಪರವಾದ್ ವಿಶೇಷ ಪಬ್ಲಿಕ್ ಪ್ರಾಸಿಕ್ಯೂಟರ್ ಸಹನಾ ದೇವಿ ಬೋಳೂರು ವಾದ ಮಲ್ತಿತ್ತೆರ್.