Last updated on December 27th, 2024 at 10:10 am
ಉಬಾರ್: ಮುಲ್ಪದ ಬಸ್ ಉಂತಡೆದ ಬರಿತ ಸಮತಾ ಸ್ವೀಟ್ಸ್ ಅಂಗಡಿಡ್ ಸೂ ಪತೊಂದಿನ ನಡಕೆ ಗುರುವಾರ ರಾತ್ರೆ ನಡತಿತ್ತ್‌ದ್, ಅಂಗಡಿ ಅಲಕ್ಕ ಪೊತ್ತ್‌ದ್ ಸುಡು ಸೂಕರಿಯಾತ್ಂಡ್.
ಅಂಗಡಿಗ್ ಬಾಕಿಲ್ ಪಾಡ್ದ್ ದನಿ ಇಲ್ಲಡೆ ಪೋದಿತ್ತ್‌ದ್, ರಾತ್ರೆ ಅಂಗಡಿದುಲಯಿರ್ದ್ ಪುಗೆ ಬರೊಂದುಪ್ಪುನೆನ್ ತೂಯಿನ ಸಾರ್ವಜನಿಕೆರ್ ಅಪಗನೇ ಅಂಗಡಿದಾರೆಗ್ ತೆರಿಪಾದೆರ್. ಆರ್ ಬತ್ತ್‌ದ್ ಷಟರ್ ದೇರ್ಪುನಗ ಅಂಗಡಿಡೊರ್ಮೆ ಸೂ ಪೊತ್ತೊಂದಿತ್ತ್ಂಡ್. ಎಣ್ಣೆದ ಪಸೆತ ತೆನಸ್‌ಲ್ ಸೂ ಬೊಕಲಾತ್ ಎಚ್ಚ ಪೊತ್ತೆರೆ ನೆವನ ಆಯ ಪನ್ದ್ ಪನೊಂದುಲ್ಲೆರ್.
ಸಾರ್ವಜನಿಕೆರ್ ಒಟ್ಟು ಸೇರ್ದ್ ಸೂ ತೆಕ್ಕಾಯೆರ ಪುನೆಯೆರ್ನ್ಡಲಾ ಅವೆನ್ ಅಂಕೆಗ್ ಕನಯೆರ ಆತಿಜಿ. ಬೊಕ್ಕ ಬೊಲ್ತೇರ್ ಅಂಚೆನೇ ಪುತ್ತೂರ್‌ರ್ದ್ ಬತ್ತಿನ ಅಗ್ನಿಶಾಮಕ ಗಾಡಿಲು ಸೂ ತೆಕ್ಕಾದ. ಅಂಗಡಿಡ್ ಇತ್ತಿನ ಫ್ರಿಡ್ಜ್, ಕಪಾಟ್, ತೆನಸ್‌ಲ್ ಪೂರಾ ಪೊತ್ತ್‌ದ್ ಪೋದಿತ್ತ್‌ದ್ ಲಕ್ಷಗಟ್ಲೆ ರೂಪಾಯಿ ನಷ್ಟ ಆತ್ಂಡ್.
ನಡಕೆಗ್ ಪತ್ತ ನೆವನ ನನಲಾ ತೆರಿದ್ ಬೈದಿಜಿ. ಫ್ರಿಡ್ಜ್‌ರ್ದಾವರ ಆದುಪ್ಪು ಪನ್ದ್ ಪಾತೆರೊಂದುಲ್ಲೆರ್.
ಉಬಾರ್‌ಡ್ ಅಗ್ನಿ ಶಾಮಕದಳೊತ ಸೌಲಭ್ಯೊಗು ಪಾಕ ಸರ್ತಿ ಬಿನ್ನಪು ಮಲ್ತ್ಂಡಲಾ ಈತ್‌ನೇಟ ಒವ್ವೇ ಪ್ರೇಜನ ಆತಿಜಿ. ಉಂದೆಟೆ ಓಲೇ ಸೂತ ಅವಘಡೊಲು ಆಂಡಲಾ ಪುತ್ತೂರು ಅತ್ತ್ಂಡ ಬೊಲ್ತೇರ್‌ರ್ದ್ ಫೈರ್ ಎಂಜಿನ್ ಬರೊಡು. ಅವು ಉಬಾರ್‌ಗ್ ಎತ್ತ್‌ನಗ ಅಲಕ್ಕ ಪೊತ್ತ್‌ದ್ ಪೋದುಪ್ಪುನ ಸಂದರಪ್ಪುಲೇ ಎಚ್ಚ. ಕೋಡೆ ರಾತ್ರೆ ಉಬಾರ್‌ದ ಪಂಚಾಯತ್ ಕಟ್ವಾನೊಡು ಇತ್ತಿನ ಸಮತಾ ಸ್ವೀಟ್ಸ್‌ಡ್ ಸೂತ ಅವಘಡ ನಡತ್‌ದ್ಂಡ್. ಅಂಗಡಿ ಅಲಕ್ಕ ಪೊತ್ತ್‌ದ್ ಪೋತುಂಡು. ಪುತ್ತೂರ್, ಬೊಲ್ತೇರ್‌ರ್ದ್ ಬತ್ತಿನ ಫೈರ್ ಸರ್ವಿಸ್ ಅಂಚೆನೇ ಊರ ಜನೊಕ್ಲೆನ ಸಕಾಯೊಡು ಇಡೀ ಕಟ್ವಾನೊನೇ ಪೊತ್ತ್‌ದ್ ಪೋಪಿನ ತತ್ತ್‌ದ್ಂಡ್. ನೆಲ್ಯಾಡಿ, ಅಲಂಗಾರ್, ರಾಮಕುಂಜ, ಪೆರ್ನೆ, ಉರುವಾಲ್, ಪದ್ಮುಂಜ, ಕಪ್ಪೆಟ್ಟಿ, ಇಳಂತಿಲ, ಮೊಗ್ರು, ಬಂಡಾಡಿ ಈ ಮಾತಾ ಊರುಲೆಗ್ ಸಕಾಯ ಆಪಿಲೆಕ ರಾಷ್ಟೀಯ ಪೆರ್ಸಾದಿದ ಬರಿಟೇ ಉಪ್ಪುನ ಉಬಾರ್‌ಗ್ ಒಂಜಿ ಫೈರ್ ಸರ್ವಿಸ್‌ದ ವ್ಯವಸ್ಥೆ ಮನ್ಪುನೆತ ಬಗೆಟ್ ಜನಪ್ರತಿನಿಧಿಕುಲು ಗೇನ ಕೊರೊಡು.