Last updated on December 10th, 2024 at 03:19 pm
ಬೊಲ್ತೇರ್ : ನಡತೊಂದು ಪೋವೊಂದಿತ್ತಿನ ಪೊಂಜೊವುನ ಬೆರಿಯೆ ಬತ್ತ್‌ದ್ ಪೋಡಿಗೆಕಟ್ಟಾದ್ ಬಂಗಾರ್‌ದ ಕರಿಮಣಿ ಮಾಲೆನ್ ಒಯ್ತ್‌ದ್ (chain snatching) ಪದ್ರಾಡಾತಿನ ನಡಕೆ ಡಿ.9 ದಾನಿ ಬೊಲ್ತೇರ್‌ದ ಕೊಯ್ಯೂರ್‌ಡ್ ನಡತ್‌ದ್ಂಡ್.
ಬೊಲ್ತೇರ್ ತಾಲೂಕ್ದ ಕೊಯ್ಯೂರು ಗ್ರಾಮೊದ ಕೋರಿಯಾರ್ ನಿವಾಸಿ ದಾಮೋಧರ್ ಭಟ್ ಪನ್ಪಿನಾರೆನ ಬೊಡೆದಿ ರಾಜೀವಿ(50) ಪನ್ಪಿನಾರ್ ಡಿ.9 ದಾನಿ ಮಧ್ಯಾಹ್ನ 2:35 ತ ಅಂದಾಜಿಗ್ ಬೊಲ್ತೇರ್‌ಗ್ ಪೋದು ಪಿರ ಇಲ್ಲಗ್ ಬರ್ರ ಕೊಯ್ಯೂರು ಗ್ರಾಮೊದ ಪಾಂಬೇಲ್ ಕ್ರಾಸ್‌ಡ್ ಜತ್ತ್‌ದ್ ಕೋರಿಯಾರ್ ಮಣ್ಣಸಾದಿಡೆ ನಡತೊಂದು ಪೋವೊಂದುಪ್ಪುನಗ ಆರೋಪಿ ಬೊಲ್ತೇರ್ ತಾಲೂಕ್ದ ಕೊಯ್ಯೂರು ಗ್ರಾಮೊದ ಉಮೇಶ್ ಪನ್ಪಿನಾಯೆ ಪಿರವುರ್ದು ಬಲಿತೊಂದು ಬತ್ತ್‌ದ್ ಪೊಂಜೊವುನ ಕೆಕ್ಕಿಲ್‌ನ ಗಟ್ಟಿ ಪತ್ತ್‌ದ್ ಬೊಬ್ಬೆ ಪಾಡೊರ್ಚಿ ಪಂದ್ ಪೋಡಿಪಾದೊ ಕೆಕ್ಕಿಲ್‌ಡಿತ್ತಿನ 32 ಗ್ರಾಂ ಬಂಗಾರ್‌ದ ಕರಿಮಣಿನ್ ಒಯ್ತ್‌ದಿತ್ತ್‌ದ್, ಈ ಪೊರ್ತುಡು ಕೈಟ್ ಗಟ್ಟಿ ಪತ್ತ್‌ದ್ ಕರಿಮಣಿ ಒಯ್ತಿನ ಪೆಟ್ಟ್‌ಗ್ ಕೆಕ್ಕಿಲ್, ತಿಗಲೆಗ್ ಗಡಿಕುಲಾದಿತ್ತ್‌ದ್ ಕರಿಮಣಿ ರಡ್ಡ್ ಪಾಲಾದ್ ಒಂಜಿ ತುಂಡು ಕರಿಮಣಿನ್ ಆರೋಪಿ ಉಮೇಶ್ ಗೌಡೆ ಪತೊಂದು ಗುಡ್ಡೆದಂಚಿ ಬಲ್ತ್‌ದ್ ಪದ್ರಾಡಾತೆ. ಗಡಿಕುಲಾತಿನ ರಾಜೀವಿ ಬೊಲ್ತೇರ್ ತಾಲೂಕು ಸರಕಾರಿ ಆಸ್ಪತ್ರೆಗ್ ದಾಕಲಾದಿತ್ತ್‌ದ್ ಬೊಲ್ತೇರ್ ಪೊಲೀಸ್ ಸ್ಟೇಶನ್‌ಡ್ ಸುಮಾರ್ ಒಂದು ಲಕ್ಷ ಮೌಲ್ಯೊದ 16 ಗ್ರಾಂ ಬಂಗಾರ್ ಕಂಡ್‌ದಿನ ಬಗೆಟ್ 309(6)BNS ಅಡಿಟ್ ಆರೋಪಿ ಉಮೇಶ್ ಗೌಡನ ಮಿತ್ತ್ ಪ್ರಕರಣ ದಾಕಲಾದಿತ್ತ್‌ದ್ ಬೊಲ್ತೇರ್ ಇನ್ಸ್ಪೆಕ್ಟರ್ ನಾಗೇಶ್ ಕದ್ರಿ ಮುತಾಲಿಕೆಡ್ ವಿಶೇಷ ಕೂಟ ಆರೋಪಿನ್ ಪತ್ತೆರೆ ಕಾರ್ಯಾಚರಣೆ ಮಲ್ತೊಂದುಂಡು.