Last updated on December 21st, 2024 at 01:21 pm
ಬೊಲ್ತೇರ್: ಕಾಲಕಲ್ಜಿಗ- ಇತ್ತೆ ದೈವ ನರ್ತನ ಸೇವೆದ ವಿಚಾರ ಕೋರ್ಟ್‌ದ ಮೊಟ್ಟು ಬರ್ತ್‌ದ್ಂಡ್. ಬೇತೆ ಸಮಾಜೊದ ಜವನೆ ಒರಿ ಗುಳಿಗ ದೈವೊಗು ನರ್ತನ ಸೇವೆ ಮಲ್ದಿನೆಕ್, ಏನಿಕಾಲೊರ್ದು ದೈವ ನರ್ತನ ಮಲ್ತೊಂದು ಬರೊಂದುಪ್ಪುನ ಸಮುದಾಯ ಆಕ್ರೋಶ ತೂಪಾದ್ಂಡ್. ಈ ವಿಚಾರ ಇತ್ತೆ ಕೋರ್ಟ್‌ದ ಮೊಟ್ಟು ಬರ್ತ್‌ದ್ಂಡ್. ಬೊಲ್ತೇರ್ ತಾಲೂಕ್‌ದ ಮೂಡಾಯಿಪಲ್ಕೆ ಆದಿಲಿಂಗೇಶ್ವರ ಕ್ಷೇತ್ರೊಡು ಈ ನಿಯಮೊನು ಕಡತ್‌ದ್ ದೈವ ಕಟ್ಟಿನ ವಿಚಾರ ಇತ್ತೆ ಭಾರೀ ವಿವಾದೊಗು ಸಾದಿ ಮಲ್ತ್ ಕೊರ್ತುಂಡು.
ಕರಿನ ಆಜಿ ವರ್ಸೊರ್ದಿಂಚಿ ಮೂಡಾಯಿಪಲ್ಕೆದ ಆದಿಲಿಂಗೇಶ್ವರ ಕ್ಷೇತ್ರೊಡು ಗುಳಿಗ ದೈವೊದ ಕೋಲ ನಡತೊಂದು ಬರೊಂದುಂಡು. ನೆತ್ತೆರ್ ಗುಳಿಗೆ ಪನ್ಪಿನ ದೈವೊದ ನೇಮೊನು ಮುಲ್ಪ ಮೊಗೇರ ಸಮುದಾಯೊದ ಜವನೆ ಒರಿ ಮನ್ಪುನ ಈ ವಿವಾದೊಗು ನೆವನ ಆತ್ಂಡ್. ಏನಿಕಾಲೊರ್ದು ತುಳುನಾಡೊರ್ಮೆ ದೈವಾರಾಧನೆಡ್ ನಲಿಕೆ, ಪರವ, ಪಂಬದ, ಇಂಚ ನಿರ್ದಿಷ್ಟ ಸಮುದಾಯೊದಕುಲು ದೈವೊಲೆನ ನರ್ತನ ಸೇವೆ ಮನ್ಪುವೆರ್. ಬೇತೆ ವಾ ಜಾತಿದಕುಲ್ಲಾ ಈ ಸೇವೆನ್ ಮನ್ಪೆರ ಬಲ್ಲಿ ಪನ್ಪಿನ ಕಟ್ಟ್ ಕಟ್ಲೆ ಉಂಡು.
ಆಂಡ ಮೂಡಾಯಿಪಲ್ಕೆದ ಚಿತ್ತರಂಜನ್ ಪನ್ಪಿನ ಜವನೆ ಮೊಗೇರ ಸಮುದಾಯೊಗು ಸೇರ್ದಿತ್ತ್ಂಡಲಾ, ಗುಳಿಗ ದೈವೊದಲೆಕ ಅರ್ದಲ ಐತ ಮಲ್ತೊಂದು ನಲ್ತೊಂದುಲ್ಲೆ. ಚಿತ್ತರಂಜನ್ 9 ವರ್ಸೊದ ಆಣ್ ಆದುಪ್ಪುನಗ ಆಯನ ಆರೋಗ್ಯೊಡು ಎಚ್ಚಿಕಮ್ಮಿ ಆದಿತ್ತ್ಂಡ್. ಅವೆರ್ದ್ ಬೊಕ್ಕ ಆಯನ ನಡಕೆಲೆಡ್ ಪಗತೆ ಆದ್, ದೈವೊದ ಆಹ್ವಾಹನೆ ಆಪೆದ್ಂಡ್. ಚಿತ್ತರಂಜನ್ ಇತ್ತಿನ ಇಲ್ಲಡ್ ಲಿಂಗ ಉಂಡಾದ್ ಒಟ್ಟುಗು ಪಾಕ ದೈವೊಲ್ಲಾ ನೆಲೆ ಆತಿನೆರ್ದಾವರ, ಆ ದೈವೊಲೆಗ್ ಆರಾಧನೆ ನಡಪೊಡು ಪನ್ಪಿನ ಸಂದೇಶೊನು ದೈವೊಲು ಚಿತ್ತರಂಜನ್‌ನ ಮುಕೇನ ಕೊರೊಂದಿತ್ತಗೆ. ಅಂಚಾದ್ ಮೂಡಾಯಿಪಲ್ಕೆಡಾ ದೈವೊಲೆಗ್ ಸಾನ ಚಾವಡಿ ಕಟ್ಟಾದ್ ಆರಾಧನೆಗ್ ತೊಡಂಗ್‌ದಿತ್ತೆರ್.
ಉಂದೆಟ್ ನೆತ್ತೆರ್ ಗುಳಿಗ ದೈವ ಬೊಕ್ಕ ಈಶ್ವರ ಗುಳಿಗ ದೈವೊಲೆಗ್ ಮಾತ್ರ ಕೋಲ ಕೊರ್ಪೆರ್. ಈ ದೈವೊಲೆನ ನರ್ತನೊನು ಸ್ವತಹ ಚಿತ್ತರಂಜನ್ ಮಲ್ತೊಂದಿತ್ತ್‌ದ್, ಕರಿನ ಆಜಿ ವರ್ಸೊರ್ದಿಂಚಿ ಪ್ರತೀ ತಿಂಗೊಲ್ದ ಸಂಕ್ರಾತಿದಾನಿ ಈ ಜನ ದೈವೊಲೆನ ನರ್ತನ ಸೇವೆ ಮಲ್ತೊಂದು ಬರೊಂದುಲ್ಲೆರ್. ಆಂಡ ಕರಿನ ಜನವರಿ ತಿಂಗೊಲುಡು ಚಿತ್ತರಂಜನ್ ದೈವೊಲೆನ ಅರ್ದಲ ಐತ ಪಾಡೊಂದು ನರ್ತನ ಮನ್ಪುನ ಪೊರ್ತುಡು ದೈವ ನರ್ತನ ಮನ್ಪುನ ನಲಿಕೆ ಸಮುದಾಯೊದ ಜನ ದೈವೊದ ನರ್ತನ ಸೇವೆಗ್ ಅಡ್ಡ ಬತ್ತ್‌ದೆರ್. ಈ ಸರ್ತಿ ಕುಡ ಡಿಸೆಂಬರ್ 28 ರ್ದ್ 30 ಮುಟ್ಟ ಚಿತ್ತರಂಜನ್ ಗುಳಿಗ ದೈವೊದ ನರ್ತನ ಸೇವೆ ಮಲ್ಪೆರ ಇತ್ತ್‌ದ್, ಈ ಸರ್ತಿಲಾ ನಲಿಕೆ ಸಮುದಾಯ ಅಡ್ಡ ಬರ್ಪಿನ ಪೋಡಿಗೆ ಇತ್ತ್‌ದ್ ರಕ್ಷಣೆಗ್ ನ್ಯಾಯಂತಡೆತಂಚಿ ಪೋತೆರ್.
ದೈವಾರಾಧನೆದ ವಿಚಾರೊಡು ಒವ್ವೇ ಕಟ್ಟ್‌ಕಟ್ಲೆಲೆಡ್ ಪಗತೆ ಆವೊಡಾಂಡ ದೈವೊಲೆನವೇ ಕಾರಡಿಕ್ ಪೋಪುನ ಸಾಮಾನ್ಯ. ಆಂಡ ಇಂಚಿನ ಇಷಯೊಡು ಈ ಸರ್ತಿ ದೈವೊಲೆಡೆ ಪೋವಂದೆ ನ್ಯಾಯಂತಡೆಕ್ ಪೋತಿನ ಉಂದುವೇ ಸುರು.