Last updated on December 17th, 2024 at 09:35 am
ಒಡಿಪು: ತುಳುನಾಡ ದೈವೊಲೆನ ಕಾರ್ನಿಕೊನು ತೋಜಾವುನ ನಡಕೆಲೆ ಪಟ್ಟಿಗ್ ಈ ನಡಕೆಲಾ ಸೇರ್ದ್ಂಡ್. 28 ವರ್ಸೊಗು ದುಂಬು ಇಲ್ಲ್ ಬುಡ್ದ್ ಪೋದಿತ್ತಿನ ಮಗೆ ಪಿರ ಇಲ್ಲ್ ಸೇರ್ದೆ. ನಂಬಿನ ದೈವೊಲೆನ ನುಡಿ ಅಂಚೆನೇ ಸಾಮಾಜಿಕ ಬಲೆತ್ತಾನೊರ್ದಾವರ ಮಗೆ ಪೌರ ತನ್ನ ಅಪ್ಪೆಅಮ್ಮನ್ ಸೇರ್ದೆ.
ಈ ನಡಕೆ ನಡತ್‌ದಿನ ಹೆಬ್ರಿ ತಾಲೂಕ್‌ದ ವರಂಗ ಗ್ರಾಮೊದ ಪೊಸಬೊಟ್ಟು ಪನ್ಪಿನವುಲು. ಮುಲ್ಪದ ಸುಮಾರ್ 6 ದಶಕೊರ್ದಿಂಚಿ ದೈವೊಲ್ನ ಚಾಕಿರಿ ಮಲ್ತೊಂದುಪ್ಪುನ ಸುಂದರ ಪೂಜಾರಿ (80) ಮೆರೆನ ಮಗೆ ಭೋಜೆ 28 ವರ್ಸ ಕರಿದ್ ಪಿರ ಇಲ್ಲಡೆ ಬತ್ತ್‌ದೆರ್. ಅಪಗ ಒವ್ವಾ ಇಸಯೊಡು ಪಿಸಿರಾದ್ ಇಲ್ಲ್ ಜತ್ತ್‌ದ್ ಪೋತಿನ ಮಗನ ಬಗೆಟ್ ಸುಂದರ ಪೂಜಾರ್ಲು ಬೊಕ್ಕಾರೆನ ಬೊಡೆದಿ ಸುಶೀಲ ನಿಚ್ಚೊಲಾ ಮಗೆ ಇನಿ ಬರ್ಪೆ ಎಲ್ಲೆ ಬರ್ಪೆ ಪನ್ದ್ ಕಾತೊಂದಿತ್ತೆರ್. ಆನ್ಡ ಮಗೆ ಒಲ್ಪ ಉಲ್ಲೆ ಏಪ ಬರ್ಪೆ ಪನ್ಪಿನ ಎಲ್ಯ ಅಂದಾಜಿಲಾ ಇಜ್ಜಂಡ್. ಸಯ್ಯೆರೆ ದುಂಬು ಒರಾಂಡಲಾ ಮಗನ್ ತೂದು ಪೋಪ ಪನ್ಪಿನ ನಂಬೊಲ್ಗೆಡ್ ತನ್ಕುಲು ನಂಬಿನ ದೈವೊಲೆಗ್ ಕೈಮುಗಿಯೊಂದಿತ್ತೆರ್. ಕರಿನ ವರ್ಸೊದ ಬೈದೆರ್ಲೆ ಕೋಲದ ಕಲೊಟು ಸತ್ಯೊಲೆಡ ನಟ್ಟ್‌ದಿತ್ತೆರ್.
ಸತ್ಯೊಲು ಒಂಜಿ ವರ್ಸೊದುಲಯಿ ಎಂಕುಲು ಬರ್ಪಾವ ಪನ್ದ್ ಅಭಯ ಕೊರ್ದಿತ್ತೆರ್. ದೈವೊಲೆನ ಅಭಯದ ಲೆಕನೇ ಅವ್ವೇ ಪೊರ್ತುಡು ಉಡುಪಿ ಕಂಡೀರಾ ಪುಗರ್ತೆದ ಮಂಜುನಾಥ ಕಾಮತ್ ಮೇರ್, ಈ ಪೆರಿಯಾಕ್ಲೆನ ಬೇನೆ ಬೆಸರ್‌ನ್ ಫೇಸ್‌ಬುಕ್, ಯೂಟ್ಯೂಬ್‌ಡ್ ಪಟ್ಟ್‌ದಿತ್ತೆರ್. ಪ್ರಾಯದ ದಂಪತಿಲೆನ ಕಣ್ಣನೀರ್‌ನ್ ತೂಯಿನ ಹುಬಳ್ಳಿಡ್ ತನ್ನಾತೆಗೆ ತಾನ್ ಹೊಟೇಲ್ ಬೇಲೆ ಮಲ್ತೊಂದಿತ್ತಿನ ಭೋಜ ಮೆರೆನ ಮನಸ್ ತಿರ್ಗ್‌ದ್, ಊರ್‌ಗ್ ಪಿರ ಬತ್ತೆರ್, ಪೆದ್ದಿನಕ್ಲೆ ಕಾರ್‌ಗಡ್ಡ ಬೂರ್ಯೆರ್. ಎಲ್ಯೆರ್ದೇ ಮಗನ ಕೈಟ್ ಇತ್ತಿನ ಸೆರೆನ್ ತೂದು ಆಯೆನೇ ಎಂಕ್ಲೆನ ಮಗೆ ಪನ್ದ್ ಪತ್ತ ಮಲ್ತೊಂದು ಸುಂದರ ಪೂಜಾರ್ಲು ಬೊಕ್ಕ ಬೊಡೆದಿ ದೈವೊಲೆಗ್ ಕೈ ಮುಗಿಯೆರ್.
ಆ ದಿನ ಇಲ್ಲಡ್ ಕುಸಿಕ್ ಕೋಡಿ ಇಜ್ಜಂಡ್. ಉಂದಾದ್ ನಾಲೈನ್ ದಿ ಕರಿದ್ ಭೋಜೆರ್ ಕುಡ ಹುಬ್ಬಳ್ಳಿಗ್ ಪೋಯೆರ್. ವಾರ ಕರೀನೆ ಬೆರ್ಮೆರೆಡೊಪ್ಪಾಯೆರ್ದುಂಬೊರ ಮಗನ್ ತೂಯೆರ ಕಾತೊಂದಿತ್ತಿನ ಅಪ್ಪೆ ಸುಶೀಲ ಉಸಾರ್ ತತ್ತ್‌ದ್ ರಡ್ಡ್ ವಾರೊಗು ದುಂಬಾತೆ ತೀರ್ದೆರ್. ಇಸಯ ತೆರಿನೇ ಕುಡ ಪಾರ್ ಬತ್ತಿನ ಮಗೆ ಭೋಜೆ ಅಪ್ಪೆನ ಅಂತ್ಯ ಸಂಸ್ಕಾರನ್ ಮಲ್ತ್‌ದೆರ್.