Last updated on January 28th, 2025 at 12:54 pm
ಪುತ್ತೂರು ಜನವರಿ 28: ಗುವೆಲ್‌ಗ್ ಬೂರ್ದು ಮಿತ್ತ್ ಬರ್ಯೆರಾವಂದೆ ಬಙ್ಙ ಬರೊಂದಿತ್ತಿನ ಪುಚ್ಚೆದ ರಕ್ಷಣೆ ಮನ್ಪೆರೆ ಪೋದಿತ್ತಿನ ಅಗ್ನಿಶಾಮಕದಳೊದ ಸಿಬ್ಬಂದಿಲೆನ ಮಿತ್ತ್ ಪುಚ್ಚೆ ಮಾರಣಾಂತಿಕ ದಾಳಿ ಮಲ್ದಿನ ನಡಕೆ ಪುತ್ತೂರ್‌ದ ತೆಂಕಿಲ ಕ್ರಾಸ್ ದಲ್ಪ ನಡತ್‌ದ್ಂಡ್. ನಡಕೆಡ್ ಅಗ್ನಿಶಾಮಕ ದಳೊದ ಸಿಬ್ಬಂದಿ ಸಿದ್ದರೂಢ ಬೊಕ್ಕ ಮೌನೇಶ್ ಮೊಕಲೆಗ್ ಗಡಿಕುಲಾತ.
ಕೋಡೆ ತೆಂಕಿಲದ ಲಕ್ಷ್ಮೀ ಪನ್ಪಿನಾರೆನ ಇಲ್ಲದ ಗುವೆಲ್‌ಗ್ ಒಂಜಿ ಪುಚ್ಚೆ ಬೂರ್ದಿತ್ತ್ಂಡ್, ಪುಚ್ಚೆ ಮಿತ್ತ್ ಬರ್ಯೆರಾವಂದೆ ಗುವೆಲ್‌ಡೇ ಬಾಕಿ ಆದಿತ್ತ್ಂಡ್. ಅಂಚಾದ್ ಇಲ್ಲದಕುಲು ಅಗ್ನಿಶಾಮಕದಳೊಕು ಒಲವು ಕೊರ್ದಿತ್ತೆರ್. ಇನಿ ಪುಚ್ಚೆದ ರಕ್ಷಣೆಗ್ ಅಗ್ನಿಶಾಮಕ ದಳ ಬತ್ತಿತ್ತ್ಂಡ್, ಗುವೆಲ್‌ದುಲಯಿದ ಒಂಜಿ ಮಾಟೆಡ್ ಪುಚ್ಚೆ ದೆಂಗ್‌ದ್ ಕುಲ್ದಿತ್ತ್ಂಡ್. ಪುಚ್ಚೆನ್ ಬದ್‌ಕಾಯೆರ ಅಗ್ನಿಶಾಮಕ ದಳೊತಕುಲು ಗುವೆಲ್‌ದುಲಯಿ ಜತ್ತ್‌ದೆರ್.
ಗುವೆಲ್‌ಗ್ ಜತ್ತಿನ ಅಗ್ನಿಶಾಮಕ ದಳೊತ ಇರ್ವೆರೆ ಮಿತ್ತ್ ಪುಚ್ಚೆ ಆಟ್ಯಾಕ್ ಮಲ್ದ್ಂಡ್. ಅಂದಾಜಿ ಏಳ್ ನಿಮಿಷ ಮುಟ್ಟ ಸಿಬ್ಬಂದಿನ ಕೈನ್ ಪುಚ್ಚೆ ತುಚ್ಚಿದ್ ಪತ್ತ್‌ದಿತ್ತ್ಂಡ್, ತಂಕೊದ ಪುಚ್ಚೆ ಪೋಡಿದ್ ತುಚ್ಚಿನೆನ್ ಬುಡ್ಪಾಯೆರಾವಂದೆ ಅಗ್ನಿಶಾಮಕದಳೊದ ಸಿಬ್ಬಂದಿ ಬಙ್ಙ ಬತ್ತೆರ್, ಗಾತಿದ ಗಡಿಕುಲಾತಿನ ಸಿದ್ದರೂಢ ಬೊಕ್ಕ ಮೌನೇಶ್ ಮೊಕಲೆಗ್ ಪುತ್ತೂರ್‌ದ ಸರ್ಕಾರಿ ಆಸ್ಪತ್ರೆಡ್ ಮರ್ದ್ ಕೊರ್ತೆರ್.