Last updated on January 16th, 2025 at 03:47 pm
ಬೀದರ್‌ದ ಶಿವಾಜಿ ಚೌಕ್‌ಡ್ ಪಟ್ಟ ಪಗೆಲ್‌ಡೇ ಎಟಿಎಂಗ್ ಕಾಸ್ ದಿಂಜಾಯೆರೆ ಬತ್ತಿತ್ತಿನ ಇರ್ವೆರ್ ಸಿಬ್ಬಂದಿಲೆ ಮಿತ್ತ್ ಗುಂಡುದ ದಾಳಿ ಮಲ್ತ್‌ದ್, ಆರೋಪಿಲು ಕಾಸ್‌ದ ಬಾಕ್ಸ್‌ನ್ ತುಂಬೊಂದು ಪದ್ರಾಡಾತೆರ್. ಆರೋಪಿಲೆನ್ ಉಂತಾಯೆರೆ ಅಲ್ಪ ಇತ್ತಿನಕುಲು ಬತ್ತಿನ ಪುನೆಪು ವ್ಯರ್ಥ ಆತ್ಂಡ್.
ಎಟಿಎಂಗ್ ಕಾಸ್ ದಿಂಜಾಯೆರ ಬತ್ತಿನ ಗಾಡಿದ ಮಿತ್ತ್, ಮುಂಚಿದ ಪೊಡಿ ದಕ್ಕ್‌ದ್ ಒರರ್ದ್ ಒರಾನೆ ದುಷ್ಕರ್ಮಿಲು ಗುಂಡುದ ದಾಳಿ ಮಲ್ತ್‌ದೆರ್. ದಾಳಿಗ್ ಗಾಡಿದುಲಯಿ ಇತ್ತಿನ ಒರಿ ಅಲ್ಪನೇ ತೀರ್ದೆರ್.
ದುಷ್ಕರ್ಮಿಲೆನ ದಾಳಿಗ್ ಬಲಿಯಾತಿನ ಜನನ್ ಗಿರಿ ವೆಂಕಟೇಶ್ (ಎಟಿಎಂಲೆಗ್ ಕಾಸ್ ಪಾಡುನ ಸಿಎಂಎಸ್ ಏಜೆನ್ಸಿದ ಸಿಬ್ಬಂದಿ) ಪನ್ದ್ ಗುರ್ತ ಪತ್ತ್‌ದೆರ್.
ಗಿರಿ ವೆಂಕಟೇಶ್ ಅಲ್ಪನೇ ಪೆರಣ ಕಲೆವೊಂಡಿಲೆಕನೆ ಗಾಡಿಡಿತ್ತಿನ ಕಾಸ್‌ದ ಬಾಕ್ಸ್‌ನ್ ಬೈಕ್‌‌ಡ್ ದೀವೊಂದು ದುಷ್ಕರ್ಮಿಲು ಪದ್ರಾಡಾತೆರ್. ಅಲ್ಪದಕುಲು ಕಲ್ಲ್ ದಕ್ಕ್‌ದ್, ದುರ್ಷರ್ಮಿಲೆನ್ ಉಂತಾಯೆರ ತೂಯೆರ್ನ್ಡಲಾ ದಾಲ ಪ್ರೇಜನ ಆತಿಜಿ. ಈ ನಡಕೆ ಮೊಬೈಲ್‌ಡ್ ರೆಕಾರ್ಡ್ ಆತ್ಂಡ್.
ನಡಕೆಡ್ ಪೆಟ್ಟಾದಿತ್ತಿನ ಶಿವಕುಮಾರ್ (26) ಮೆರೆನ್ ಮರ್ದ್‌ಗ್ ಬೀದರ್‌ದ ಬಿಮ್ಸ್ ಆಸ್ಪತ್ರೆಗ್ ದಾಕಲ್ ಮಲ್ತಿತ್ತೆರ್. ಆಂಡ, ಮರ್ದ್ ಪಲಿಪಂದೆ ಆರ್‌ಲಾ ತೀರ್ದೆರ್. ಇತ್ತೆ ಆರೋಪಿಲೆಗ್ ಬೀದರ್ ಪೊಲೀಸೆರ್ ಬೇಪು ಪಾಡ್ದೆರ್. ಬೈಕ್‌ದ ನಂಬರ್ ಟ್ರೇಸ್ ಮಲ್ತೊಂದುಲ್ಲೆರ್.
ಎಟಿಎಂ ಗಾಡಿಡ್ ಒಟ್ಟು 87 ರೂ. ಲಕ್ಷ ಕಾಸ್ ಇತ್ತಿನೆತ ಬಗೆಟ್ ಒಲವು ತಿಕ್ಕ್‌ದ್ಂಡ್. 5 ಲಕ್ಷ ರೂ. ಕಾಸ್‌ನ್ ಅಲ್ಪನೇ ಬುಡ್ದ್ ಪೋತೆರ್. 83 ಲಕ್ಷ ರೂ. ಕಾಸ್ ಕಂಡ್‌ದ್ ಕೊನೊತೆರ್ ಪನ್ದ್ ತೆರಿದ್ ಬೈದ್ಂಡ್.