Last updated on January 26th, 2025 at 01:49 pm
ಕುಡ್ಲ ಜನವರಿ 26: ಬಾಯಿ ಬರಂದಿನಾಯ ಲೆಕ ನಾಟಕ ಮಲ್ತ್‌ದ್, ನೀರ್ ಕೊರ್ನ ಪ್ರಾಯದ ದಂಪತಿಲೆನ್ ಕೆರ್ದಿತ್ತಿನ ಆರೋಪಿಗ್ ಜೀವಾವಧಿ ಶಿಕ್ಷೆ ಅಂಚೆನೇ 10 ವರ್ಸೊದ ಸಜೆ ಕೊರ್ದು ಕುಡ್ಲದ 2ನೇ ಎಚ್ಚಿಗೆದ ಜಿಲ್ಲಾ ಬೊಕ್ಕ ಸತ್ರ ನ್ಯಾಯಂತಡೆ ತೀರ್ಪು ಕೊರ್ತುಂಡು. 2016ತ ನವೆಂಬರ್ 10-11ತ ರಾತ್ರೆ ವೃದ್ಧ ದಂಪತಿ ವರ್ಕಿ ಕೆ.ವಿ (85) ಬೊಕ್ಕ ಎಲಿಕುಟ್ಟಿ(80) ಪನ್ಪಿನಕಲೆನ್ ರಾಜು ಕಲ್ಲವಡ್ಡರ್ ಕೆರ್ದ್ ಅಕ್ಲೆನ ಇಲ್ಲಡಿತ್ತಿನ ಪಣವು ಬಂಗಾರ್ ಸೇರ್ದ್ 4.50 ಲಕ್ಷ ಮೌಲ್ಯೊದ ಸೊತ್ತುಲೆನ್ ಕಂಡ್‌ದ್ ಪದ್ರಾಡಾದಿತ್ತೆ.
ಗದಗ ಜಿಲ್ಲೆದ ಬಿ.ಸಿ.ಕೇರಿ ನಿವಾಸಿ ರಾಜು ಕಲ್ಲವಡ್ದರ್ ಶಿಕ್ಷೆ ಆತಿನ ಅಪರಾಧಿ. ಉಂಬ್ಯೆ ಬೊಲ್ತೇರ್‌ದ ನೆರಿಯಾ ಗ್ರಾಮದ ಬಾಂಜಾರ್ ಮಲೆ ಪನ್ಪಿನಲ್ಪ ಡ್ಯಾಂ ದಲ್ಪ ಕೂಲಿ ಬೇಲೆ ಮಲ್ತೊಂದಿತ್ತೆ. 2016ತ ನವೆಂಬರ್ 10ತಾನಿ ರಾತ್ರೆ 11ರ್ದ್ ಕಾಂಡೆ 3ತ ನಡುಟು ಬೊಲ್ತೇರ್ ತಾಲೂಕ್ ಚಾರ್ಮಾಡಿ ಗ್ರಾಮೊದ ಕಕ್ಕಿಂಜೆ ಕಲೇರಿಕಲ್ ಪನ್ಪಿನಲ್ಪ ವಾಸ ಇತ್ತಿನ ಪ್ರಾಯದ ದಂಪತಿ ವರ್ಕಿ ಕೆ.ವಿ.(85) ಬೊಕ್ಕ ಎಲಿಕುಟ್ಟಿ (80) ಮೊಕಲ್ನ ಇಲ್ಲಗ್ ಬತ್ತಿತ್ತೆ.
ಬೊಕ್ಕ ಬಾಯಿ ಬರಂದಿಲೆಕ ನಾಟಕ ಮಲ್ತ್‌ದ್, ಕೈಬಾಸೆಡ್ ಪರ್ಯೆರ ನೀರ್ ಕೇನ್ದೆ. ಅವೆರ್ದ್ ಬೊಕ್ಕ ಸಾದಿ ತೋಜಾಲೆ ಪನ್ದ್ ನೆವನ ಕೊರ್ದು ವರ್ಕಿ ಕೆ.ವಿ. ಮೆರೆನ್ ಎದುರು ಲೆತೊಂದು ಪೋದು ಸೋಂಟೆಡ್ ಹಲ್ಲೆ ಮಲ್ತ್‌ದೆ. ಬೊಕ್ಕ ತುತ್ತುದಿತ್ತಿನ ಕಂಬೈಡೇ ಆರೆನ ನಾಲಿ ಕಾಯ್ತ್‌ದ್ ದಮ್ಮು ಕಟ್ಟಾದ್ ಕೆರ್ದಿತ್ತೆ.
ಬೊಕ್ಕ ಇಲ್ಲದುಲಯಿ ಪೊಗ್ಗುದು ಸೊತ್ತುಲೆನ್ ಅಡಿಮೇಲ್ ಮಲ್ತ್ ನಾಡ್‌ದೆ. ಉಂದೆರ್ದಾವರ ಲಕ್ಕಿನ ಎಲಿಕುಟ್ಟಿ ಮೆರೆನ್ಲಾ ಆರೋಪಿ ಸೋಂಟೆಡ್ ಹಲ್ಲೆ ಮಲ್ತ್‌ದ್, ಆರೆನ್ಲಾ ಕುಂಟುಡು ನಾಲಿ ಕಾಯ್ತ್‌ದ್ ದಮ್ಮು ಕಟ್ಟಾದ್ ಕೆರ್ತೆ. ಬೊಕ್ಕ ಇಲ್ಲದ ಗೋದ್ರೇಜ್, ಕಪಾಟ್‌ಲೆನ ಬಾಕಿಲ್ ಪೊಲ್ತ್‌ದ್ ಬಂಗಾರ್, ಕಾಸ್ ಸೇರ್ದ್ ಅಂದಾಜಿ 4,50,000 ರೂ. ಕಂಡ್‌ದಿತ್ತೆ.
ವಿಚಾರಣೆ ಮುಗಿತಿನ ಕುಡ್ಲದ 2ನೇ ಎಚ್ಚಿಗೆದ ಜಿಲ್ಲಾ ಬೊಕ್ಕ ಸತ್ರ (ವಿಶೇಷ) ನ್ಯಾಯಂತಡೆದ ನ್ಯಾಯಾಧೀಶೆದಿ ಪ್ರೀತಿ ಕೆ.ಪಿ. ಪ್ರಕರಣೊದ ಪುರಾಪುಲೆನ್ ಪರಿಗಣಿತ್‌ದ್, ಆರೋಪಿ ತಪ್ಪಿತಸ್ಥೆ ಪನ್ದ್ ತೀರ್ಪು ಕೊರ್ತೆರ್. ಅಂಚೆನೇ ಆರೋಪಿಗ್ ಭಾ.ದಂ.ಸಂ ಕಲಂ 392 ದ ಪ್ರಕಾರ 10 ವರ್ಷೊದ ಕಾಲ ಕಠಿಣ ಸಜೆ ಅಂಚೆನೇ 10 ಸಾವಿರ ರೂ. ದಂಡ ಪಾಡ್ದೆರ್. ಓಲ್ಲ, ದಂಡ ಕಟ್ಟಿಜಿಂಡ 3 ತಿಂಗೊಲ್ದ ಕಠಿಣ ಸಜೆ ಅನುಭವಿಪೊಡು. ಭಾ.ದಂ.ಸಂ ಕಲಂ 302ದಡಿಟ್ ಜೀವಾವಧಿ ಶಿಕ್ಷೆ ಅಂಚೆನೇ 10 ಸಾವಿರ ರೂ. ದಂಡ ಬೊಕ್ಕ ದಂಡ ಕಟ್ಟಿಜಂಡ 3 ತಿಂಗೊಲ್ದ ಕಠಿಣ ಸಜೆನ್ ಕೊರ್ದು ನ್ಯಾಯಾಧೀಶೆರ್ ತೀರ್ಪು ಕೊರ್ತೆರ್.