Last updated on January 16th, 2025 at 05:20 pm
ಕಾರ್ಲ, ಜ 16: ಧ್ವನಿವರ್ಧಕೊಲೆನ್ ಗಲಸೆರೆ ಅನು ಗೆತೊನಂದಿನೆರ್ದಾವರ ಯಕ್ಷಗಾನೊನು ಉಂತಾಯೆರೆ ಬತ್ತಿತ್ತಿನ ಪೊಲೀಸೆರೆ ಕ್ರಮೊಕು ಇತ್ತೆ ಎಚ್ಚಿನ ಕಡೆಟ್ ಆಕ್ರೋಶ ತೋಜಿದ್ ಬರೊಂದುಂಡು, ಪೊಲೀಸರ ಕ್ರಮೊನು ಕಾರ್ಲ ಶಾಸಕೆ ಸುನಿಲ್ ಕುಮಾರ್ ಖಂಡಿತ್‌ದೆರ್.
ಈ ಬಗೆಟ್ ಟ್ವೀಟ್ ಮಲ್ದಿನ ಶಾಸಕೆ ಸುನಿಲ್ ಕುಮಾರ್ ಗೃಹ ಸಚಿವೆ ಡಾ.ಜಿ.ಪರಮೇಶ್ವರೆರೇ, ಯಕ್ಷಗಾನೊರ್ದು ಕಾನೂನು ಸುವ್ಯವಸ್ಥೆ ತೆಟ್ಟುಂಡೇ ? ಅತ್ತ್ ಯಕ್ಷಗಾನೊರ್ದು ಏರೆನಲಾ ಮನಸ್‌ಗ್ ಬೇನೆ ಆಪುಂಡೇ ? ಈರ್ ಒರಿ ಸಭ್ಯೆ ಅಂಚೆನೇ ಸುಸಂಸ್ಕೃತ ಜನ ಪನ್ದ್ ಎಂಕುಲು ಮಾತ ಎನ್ನ್‌ದಿತ್ತಿನವೆಏ ಇತ್ತೆ ಸುಳ್ಳಾತ್ಂಡ್. ನಿಕ್ಲೆನ ಅವಧಿಡ್ ಪೊಲೀಸ್ ಇಲಾಖೆ ಅಭಿವ್ಯಕ್ತಿ ಸ್ವಾತಂತ್ರ್ಯೊನು ಇಜ್ಜಂದಿಲೆಕ ಮನ್ಪೆರೆ ಗಡೀ ಗಡೀ ಗಲಕೆ ಆವೊಂದುಂಡು ಪನ್ಪಿನ ಬಾರೀ ಬೆಸರ್‌ದ ಸಂಗತಿ, ವಾಕ್ ಸ್ವಾತಂತ್ರ್ಯ, ಸಂವಿಧಾನ ಇಂಚಿನ ವಿಚಾರೊಲು ಈರೆಗ್ ಭಾಷಣೊಗು ಮಾತ್ರ ಆದ್ ಪೋತುಂಡು.
ಇಜ್ಜಿಂಡ ಕಾರ್ಲ ತಾಲೂಕ್‌ದ ಶಿರ್ಲಾಲ್ ಗ್ರಾಮೊದ ಮುಂಡ್ಲಿಡ್ ನಡತೊಂದಿತ್ತಿನ ಯಕ್ಷಗಾನ ಪ್ರದರ್ಶನೊನು ಅಲ್ಪದ ಕಾಂಗ್ರೆಸ್ ಮುಖಂಡನ ಒಯಿಲ್‌ದ ಮಿತ್ತ್‌ಗೊ ಉಂತಾಯೆರ ಪಿದಡ್ದಿನ ಏತ್ ಸಮ ? ಯಕ್ಷಗಾನ ಕಡಲ ಕರೆತ ಜಿಲ್ಲೆಲೆನ ಪ್ರಾರಂಪರಿಕ ಕಲೆಯಾದಿತ್ತ್‌ದ್ ರಾತ್ರಿ ಇಡೀ ಪ್ರದರ್ಶನ ಆಪುಂಡು. ಆಂಡ ಕಾಂಗ್ರೆಸ್ ನಾಯಕೆ ಒಯಿಲ್ ಕೊರ್ಯೆ ಪನ್ಪಿನ ನೆವನೊಗು ಎಸ್‌ಪಿ ಯೇ ಯಕ್ಷಗಾನ ಉಂತಾಯೆರ ಪೊಲೀಸೆರೆನ್ ಕಡಪುಡ್ದಿನ ಏತ್ ಸಮ?ಆತೇ ಯಾರಂದಿನೆಕೊ ಮನದಾನಿ ಯಕ್ಷಗಾನ ಆಯೋಜಕೆರೆ ಮಿತ್ತ್ ಮೊಕದ್ದಮೆ ದಾಕಲ್ತ್‌ದ್ ನಿಕ್ಲೆನ ಪೊಲೀಸೆರ್ ಎಫ್ ಐಆರ್ ಸರ್ಕಾರ ನಡಪಾಯೆರ ಪಿದಡ್ದೆರಾ?
ಇನಿ ಯಕ್ಷಗಾನ. ಎಲ್ಲೆ ಕಂಬುಲ, ಭೂತಕೋಲ ಇಂಚ ಧಾರ್ಮಿಕ ಆಚರಣೆಲೆನ್ ಕಾಂಗ್ರೆಸ್ ನಾಯಕೆರ್ ಒಯಿಲ್ ಕೊರ್ತೆರ್ ಪನ್ಡ್‌ದ್ ಉಂತಾವರಾ? ರಾಜ್ಯೊದ ಮುಖ್ಯಮಂತ್ರಿ ಆವೊಡು ಪನ್ದ್ ಕನ ಕಟ್ಟೊಂದುಪ್ಪುನ ಈರೆಗ್ ಮೂಲ್ಪದ ಸಾಂಸ್ಕೃತಿಕ ಆಯಾಮೊದ ಬಗೆಟ್ ಕಲ್ಫನೆ ಇಜ್ಜಾ ಅತ್ತ್ ಇಲಾಖೆಯ ಮಿತ್ತ್ ಅಂಕೆ ಇಜ್ಜಾ ? ಪನ್ದ್ ಟ್ವೀಟ್ ಮಲ್ತ್‌ದೆರ್.