Last updated on January 9th, 2025 at 10:17 am
ಸುಳ್ಯ: ಅಪ್ಪೆ ಒರ್ತಿ ತನ್ನ 5 ವರ್ಸ ಪ್ರಾಯೊದ ಬಾಲೆಗ್ ಬೆಚ್ಚ ಬಾಜನಡ್ ಸುಡಿ ದೀದ್ ಬೇನೆ ಮಲ್ದಿನ ಪ್ರಕರಣೊದ ವಿಚಾರಣೆ ನ್ಯಾಯಂತಡೆಟ್ ನಡತ್‌ದ್ ಆರೋಪ ಸಾಬೀತಾದ್ ನ್ಯಾಯಂತಡೆ ಆರೋಪಿಗ್ ಶಿಕ್ಷೆ ಘೋಷಣೆ ಮಲ್ದ್ಂಡ್.
ಕಾವ್ಯಶ್ರೀ ಪನ್ಪಿನಾರ್ 2022ತ ಆ.16ತಾನಿ ಸುಳ್ಯ ಗಾಂಧಿನಗರ ನಾವೂರು ಪನ್ಪಿನಲ್ಪ ತನ್ನ ತಮೆರಿಡ್ ಬೆಚ್ಚ ಪೇರ್‌ದ ಬಾಜನಡ್ ತನ್ನ 5 ವರ್ಸ ಪ್ರಾಯೊದ ಪೊಣ್ಣು ಬಾಲೆದ ಸರ್ರೊದ ಬೇತೆ ಬೇತೆ ಕಡೆಟ್ ಸುಡಿ ದೀದ್ ಬೇನೆ ಮಲ್ತಿತ್ತಲ್. ಈ ಬಗೆಟ್ ಮಹಿಳಾ ಬೊಕ್ಕ ಜೋಕ್ಲೆನ ಸಂರಕ್ಷಣಾಧಿಕಾರಿ ರಶ್ಮಿ ಮೆರೆಗ್ ವಿಷಯ ತೆರಿದ್ ಸುಳ್ಯ ಸ್ಟೇಶನ್‌ಡ್ ಅಪ್ಪೆನ ಮಿತ್ತ್ ಒಯಿಲ್ ಬರೆಪಾದಿತ್ತೆರ್.
ಸುಳ್ಯ ನ್ಯಾಯಂತಡೆಟ್ ವಿಚಾರಣೆ ನಡತಿತ್ತ್‌ದ್ ಪೆರಿಯ ಸಿವಿಲ್‌ ಜಡ್ಜ್ ಬೊಕ್ಕ ಜೆಎಂಎಫ್‌ಸಿ ನ್ಯಾಯಾಧೀಶೆರ್ ಬಿ.ಮೋಹನ್‌ ಬಾಬು ಮೇರ್ ಆಪಾದಿತೆದಿನ್ ದೋಷಿ ಪನ್ದ್ ಘೋಷಣೆ ಮಲ್ದೆರ್. ಅಪಾದಿತೆದಿಗ್ ಒಟ್ಟು 10 ಸಾರ ರೂ. ದಂಡ, ದಂಡ ಕಟ್ಟಿಜಿಂಡ 2 ತಿಂಗೊಲ್ದ ಸಾದಾ ಕರ್ಪಿಲ್ಲ ಶಿಕ್ಷೆದ ತೀರ್ಪು ಕೊರ್ತೆರ್. ಸರಕಾರೊದ ಪರವಾದ್ ಅಸಿಸ್ಟೆಂಟ್ ಪಬ್ಲಿಕ್ ಪ್ರಾಸೆಕ್ಯೂಟರ್ ವಾದ ಮಲ್ತಿತ್ತೆರ್.