Last updated on January 16th, 2025 at 07:34 am
ಒಡಿಪು: ಮೈಕ್‌ಗ್ ಅನು ಗೆತೊಂದಿಜೆರ್ ಪನ್ಪಿನ ನೆವನ ಕೊರ್ದು ಯಕ್ಷಗಾನ ಪ್ರದರ್ಶನೊಗು ಅಡ್ಡ ಬತ್ತಿನ ಪ್ರಕರಣ ನಡತ್‌ದ್ಂಡ್. ಪೊಲೀಸೆರೆ ಕ್ರಮೊನು ಜಿಲ್ಲಾ ಎಸ್ಪಿ ಸಮರ್ಥನೆ ಮಲ್ತೊಂದಿತ್ತ್‌ದ್, ಸುಪ್ರೀಂಕೋರ್ಟ್‌ದ ಆದೇಶೊದ ಲೆಕ ಕಾನೂನು ಪಾಲನೆ ಮಲ್ತ್‌ದ ಪನ್ದ್ ಪನ್ತೆರ್.
ಕಾರ್ಲ ತಾಲೂಕ್‌ದ ಅಜೆಕಾರ್ ಪೊಲೀಸ್ ಸ್ಟೇಶನ್ ಸೀಮೆದ ಶಿರ್ಲಾಲ್‌ಡ್ ಈ ನಡಕೆ ನಡತ್‌ದ್ಂಡ್. ಮುಂಡ್ಲಿದ ಈಶ್ವರ ಯಕ್ಷಗಾನ ಮಂಡಳಿರ್ದ್ ಅಟ್ಟನೆ ಆದಿತ್ತಿನ ಯಕ್ಷಗಾನ ಪ್ರದರ್ಶನೊಡು 10 ಗಂಟೆ ಕರಿದ್ ಸೌಂಡ್ ಬಾಕ್ಸ್ ಗಲಸಿನೆಕ್ ಅಜೆಕಾರ್ ಪೋಲೀಸ್ ಉಪನಿರೀಕ್ಷಕೆ ಶುಭಕರ್‌ ಮೆರೆರ್ದ್ ರಾತ್ರೆ ಯಕ್ಷಗಾನ ಪ್ರದರ್ಶನೊಗು ಆಕ್ಷೇಪ ಬೈದ್ಂಡ್. 10 ಗಂಟೆರ್ದ್ ಸೌಂಡ್‌ಬಾಕ್ಸ್ ಗಲಸಿನೆಕ್ ಯಕ್ಷಗಾನ ಪ್ರದರ್ಶನೊಗು ಅಡ್ಡ ಬತ್ತ್‌ದೆರ್. ಆತೇ ಅತ್ತಂದೆ, ಆಯೋಜಕೆರೆನ್ ಅರೆಸ್ಟ್ ಮನ್ಪೆರಲಾ ಪೊಲೀಸೆರ್ ದುಂಬು ಬೈದೆರ್.
ಈ ಪೊರ್ತುಡು ಪಿಸಿರಾಯಿನ ಗ್ರಾಮಸ್ಥೆರ್, ಇಡೀ ಗ್ರಾಮೊದ ಜನೊನು ಅರೆಸ್ಟ್ ಮನ್ಪುಲೆ ಪನ್ದ್ ಹೈಡ್ರಾಮಾ ಮಲ್ತ್‌ದೆರ್. ಕಾರ್ಯಕ್ರಮ ಉಂತಾಯಿಜಿಂಡ ಯಕ್ಷಗಾನ ಮಂಡಳಿ ಅಧ್ಯಕ್ಷನ್ ಕೈದ್ ಮನ್ಪುವ ಪನ್ದ್ ಪೊಲೀಸೆರ್ ಎಚ್ಚರ್ಗೆ ಕೊರ್ತೆರ್. ಈ ಪೊರ್ತುಡು ಗ್ರಾಮಸ್ಥೆರ್ ಬೊಕ್ಕ ಪೊಲೀಸೆರೆ ನಡುಟು ಪಾತೆರೊಗು ಪಾತೆರ ಆತ್ಂಡ್. ಜನವರಿ 10 ತಾನಿ ಪರ್ಮಿಷನ್‌ಗ್ ಪಿಡಿಒ ನಡೆ ಆಯೋಜಕೆರ್ ಪೋದಿತ್ತೆರ್. ಮೂಜಿ ದಿನೊತ ರಜೆ ಇತ್ತಿನೆರ್ದಾವರ ಅನು ತಿಕ್ಕ್‌ದಿಜ್ಜಂಡ್. ಜನವರಿ 13ತಾನಿ ಅನು ಕೇನೊಂದು ಆಯೋಜಕೆರ್ ಅಜೆಕಾರು ಸ್ಟೇಶನ್‌ಗ್ ಪೋದಿತ್ತೆರ್. ಈ ಪೊರ್ತುಡು, ಪಂಚಾಯತ್‌ದ ಪರ್ಮಿಷನ್ ಗೆತೊಂದು ಬಲೆ ಪನ್ದ್ ಪೊಲೀಸೆರ್ ಪನ್ತೆರ್. ಈ ವಿಸಯೊಡು ಯಕ್ಷಗಾನ ಮಂಡಳಿ ಗುರ್ಕಾರೆ ಸದಾನಂದ ಶೆಟ್ರೆನ ಮಿತ್ತ್ ಪ್ರಕರಣ ದಾಕಲಾತ್ಂಡ್. ಮಹಾಲಕ್ಷ್ಮಿ ಸೌಂಡ್ಸ್‌ದ ಅಪ್ಪು ಪನ್ಪಿನಾರೆನ ಮಿತ್ತ್‌ಲಾ ಕೇಸ್‌ ಪಾಡ್ದೆರ್.
ಈ ಬಗೆಟ್ ಸ್ಪಷ್ಟನೆ ಕೊರ್ತಿನ ಎಸ್ಪಿ ಅಜೆಕಾರ್ ಪೊಲೀಸೆರೆ ಒವ್ವೇ ಅನುದಾಂತೆ ಕಾರ್ಯಕ್ರಮ ಅಟ್ಟನೆ ಮಲ್ತಿತ್ತ್‌ದ್, ರಾತ್ರೆದ ಪೊರ್ತುಡು ಸೌಂಡ್ ಬಾಕ್ಸ್ ಗಲಸುನೆರ್ದಾವರ ತೊಂದರೆ ಆವೊಂದುಂಡು ಪನ್ದ್ ಥಸಾರ್ವಜನಿಕೆರೆರ್ದ್ ಕಾಲ್ ಬತ್ತ್‌ದ್ಂಡ್. ಪೊಲೀಸೆರ್ ಪೋದು ವಿಚಾರಿಸಿಪುನಗ ಕಾರ್ಯಕ್ರಮೊಗು ಅನು ಗೆತೊಂದುಜೆರ್, ಸೌಂಡ್ ಬಾಕ್ಸ್ ಗಲಸೆರಲಾ ಅನು ಗೆತೊಂದುಜೆರ್ ಪನ್ದ್ ತೆರಿದ್ ಬೈದ್ಂಡ್. ರಾತ್ರೆ 11.30 ಗಂಟೆಗ್ ಪೊಲೀಸೆರ್ ಧ್ವನಿವರ್ಧಕೊನು ಗಲಸೊರ್ಚಿ ಪನ್ದ್ ಪನ್ಡೆರ್ನ್ಡಲಾ, ಅವೆನ್ ಗೆನ್ಪಂದೆ ಪುಲ್ಯ 4.30 ಗಂಟೆ ಮುಟ್ಟ ಆಟ ಗೊಬ್ಬುದೆರ್. ಅಂಚಾದ್ ಒವ್ವೇ ಅನುದಾಂತೆ ರಾತ್ರೆದ ಪೊರ್ತುಡು ಧ್ವನಿವರ್ಧಕ ಗಲಸ್‌ದ್ ಕಾರ್ಯಕ್ರಮ ಮಲ್ತಿನೆಕ್ ಆಯೋಜಕೆರೆ ಮಿತ್ತ್ ಅಜೆಕಾರ್ ಪೊಲೀಸ್ ಸ್ಟೇಶನ್ ಅಪರಾಧ ಕ್ರಮಾಂಕ 02/25 ಕಲಂ. 292 BNS ಬೊಕ್ಕ 37 KP Act. ದ ಪ್ರಕಾರ ಪ್ರಕರಣ ದಾಕಲಾತ್ಂಡ್ ಪನ್ದ್ ಪನ್ಡೆರ್.