Last updated on January 20th, 2025 at 10:41 am
ಹೊನ್ನಾವರ: ಉತ್ತರ ಕನ್ನಡ ಜಿಲ್ಲೆದ ಹೊನ್ನಾವರದ ಸಾಲ್ಕೋಡು ಗ್ರಾಮೊಡು ಕೃಷ್ಣ ಆಚಾರಿ ಪನ್ಪಿನಾರೆನ ಪೆತ್ತೊದ ತರೆ ಕಡ್ತ್‌ದ್ ಅವೆತ ಒರಿನ ದೇಹೊನು ಕೊಂಡೊದು ಪೋತೆರ್. ಜನವರಿ 18ದಾನಿ ಇಲ್ಲಲ್ದ್ ಮೇಯೆರೆ ಪೋದಿತ್ತಿನ ಪೆತ್ತ ಪೊರ್ತು ಕಂತ್ಂಡಲಾ ಪಿರ ಬೈದಿಜಿ. ಅಂಚಾದ್ ಮನದಾನಿ (ಜನವರಿ 19) ಕಾಂಡೆ ಮಾಲೀಕೆ ಕೃಷ್ಣ ಆಚಾರಿ ಸನೆತ ಪೆತ್ತೊನು ನಾಡೊಂದು ಪೋತೆರ್. ಆ ಪೊರ್ತುಡು ಪೆತ್ತದ ತರೆ ಬೊಕ್ಕ ಕಾರ್ ನೆತ್ತೆರ್‌ದ ಮಡುಟು ತಿಕ್ಕ್‌ದ್ಂಡ್. ಉಂದೆನ್ ತೂದು ಕೃಷ್ಣ ಆಚಾರಿ ಪೋಡಿದ್ ಪೋತೆರ್.
ರಕ್ಕಸೆರ್ ಪೆತ್ತದ ತರೆ ಕಡ್ತ್‌ದ್, ಕಾರ್ ಕಡ್ತ್‌ದ್ ದೇಹೊನು ಮಾತ್ರ ಕೊನೊದು ಪೋತೆರ್. ಮಾಸೊಗು ಬೋಡಾದ್ ಪೆತ್ತೊದ ದೇಹೊನು ಮಾತ್ರ ಕೊನೊತಿನ ತೋಜುಂಡು. ಕಾಡಮುರ್ಗೊಲು ದಾಳಿ ಮಲ್ತಂಡ ಪೆತ್ತೊದ ದೇಹೊದ ಭಾಗೊಲು ಬೇತೆ ಬೇತೆ ಪಾಲಾದ್ ಬೂರುಜ. ಉಂದು ಮಾಸಗ್ ಬೋಡಾದೆ ಮಲ್ದಿನ ಬೇಲೆ ಪಂದ್ ಊರುದಕುಲು ಆರೋಪ ಮಲ್ದೆರ್.
ಊರುಡು ಉಂದೆಕ್ ದುಂಬು ಕೈಕಂಜಿಲು ತೋಜಂದೆ ಆನಗ ಚಿಟ್ಟೆಪಿಲಿ ಕೊನೊದುಪ್ಪೊಡು ಪನ್ದ್ ಎನ್ನ್‌ದ್ ಮನಿಪಂದೆ ಆಪೆದೆರ್. ಆಂಡ ಇತ್ತೆ ಮಾಸೊಗು ಬೋಡಾದ್ ಕೊನೊವೊಂದುಪ್ಪುನ ಇಸಯ ಬೊಲ್ಪುಗು ಬೈದ್ಂಡ್.
ಈ ಪ್ರಕರಣ ಬೊಲ್ಪುಗು ಬರೊಂದಿತ್ತಿಲೆಕನೆ ಕೈಕಂಜಿಲೆನ್ ಕಲೆವೊಂದಿನಕುಲು ಎಂಕ್ಲೆಗ್ ಅಂಚೆನೇ ಎಂಕ್ಲೆನ ತಾಂಕನದ ಪ್ರಾಣಿಲೆಗ್ ರಕ್ಷಣೆ ಕೊರೊಡು ಪನ್ದ್ ಆಗ್ರಹ ಮಲ್ದೆರ್. ಮೇಯೆರೆ ಕಾಡ್‌ಗ್ ಕೊನೊಯೆರಲಾ ಪೋಡಿಗೆ ಆಪುಂಡು. ಪೆತ್ತ ಕಡ್ಪುನಕುಲು ಎಲ್ಲೆ ಎಂಕ್ಲೆಗ್ಲಾ ಕಡ್ಪೆರ್, ದಯದೀದ್ ಪೋಲೀಸೆರ್ ರಕ್ಷಣೆ ಕೊರೊಡು ಪನ್ದ್ ಒತ್ತಾಯ ಮಲ್ದೆರ್.