Last updated on January 7th, 2025 at 12:09 pm
ಮಲ್ಪೆ: ಮಲ್ಪೆ ಬಂದರ್‌ದ ಜೆಟ್ಟಿಡ್ ಉಂತಾದಿತ್ತಿನ ಮೀನ್ ದಿಂಜಿನ ಬೋಟ್‌ರ್ದ್ ಕಲ್ವೆರ್ ಸುಮಾರ್ 15 ಸಾರ ರೂ. ಬಿಲೆತ ಎಡ್ಡೆ ಜಾತಿದ ಮೀನ್‌ಲೆನ್ ಲಕ್ಕಾಯೆರ ತೂವೊಂದುಪ್ಪುನಗ ಬೋಟ್‌ದ ಕಾರ್ಮಿಕೆರೆ ಕೈಕ್ ತಿಕ್ಕ್‌ದ್ ಬೂರ್ದ್ ಪೊಲಿ ತಿನ್ತಿನ ನಡಕೆ ಸನಿಯಾರ ರಾತ್ರೆ ನಡತ್‌ದ್ಂಡ್.
ಸನಿಯಾರ ರಾತ್ರೆ ಸುಮಾರ್ 12 ಗಂಟೆದ ಅಂದಾಜಿಗ್ ಬಂದರ್‌ಡ್ ಉಂತಾದಿತ್ತಿನ ಬೋಟ್‌ಗ್ ಮೂವೆರ್ ಬತ್ತ್‌ದ್ ಬೋಟ್‌ದ ಕಾರ್ಮಿಕೆರ್ ನಿದೆರ್ದುಪ್ಪುನ ತೂದು ಬೋಟ್‌ದ ಸ್ಟೋರೇಜ್ದ ಬಾಕಿಲ್ ದೆತ್ತ್‌ದ್ ಅವೆತುಲಯಿ ಒರಿಯನ್ ಜಪ್ಪುಡ್ದಿತ್ತೆರ್. ಅಲ್ಪರ್ದ್ ಕಂಡೊಂದುಪ್ಪುನಗ ಬೋಟ್‌ದ ಕಾರ್ಮಿಕೆ ಒರ್ಯಗ್ ಎಚ್ಚರ್ಗೆ ಆದ್ ಬೊಬ್ಬೆ ಪಾಡ್ದೆ. ಬೋಟ್‌ದ ಮಿತ್ತ್ ಇತ್ತಿನ ಇರ್ವೆರ್ ಪದ್ರಾಡಾದಿತ್ತ್‌ದ್, ಒರಿ ಸ್ಟೋರೇಜ್ದ ಉಲಯಿ ತಿಕ್‌ದ್ ಬೂರೊಂದೆ. ಬೋಟ್‌ದ ಕಾರ್ಮಿಕೆರ್ ಆಯನ್ ಪತ್ತ್‌ದ್ ವಿಚಾರಿತ್‌ದ್ ಬೋಟ್‌ದ ದನಿಕ್ ಒಪ್ಯಾದೆರ್. ಈ ಮೂವೆರ್ ಕರ್ನಾಟಕೊದ ಗದಗ ಮೂಲೊದಕುಲು ಪನ್ದ್ ಪನೊನ್ದುಲ್ಲೆರ್.
ಎಚ್ಚ ಆವೊಂದುಂಡು ಮೀನ್ ಕಲ್ವೆ
ಕರಿನ ರಡ್ಡ್ ವರ್ಸೊರ್ದಿಂಚಿ ಮೀನ್ ಕಲ್ವೆ ಎಚ್ಚ ಆವೊಂದಿತ್ತ್‌ದ್, ಕರಿನ ರಡ್ಡ್ ತಿಂಗೊಲುರ್ದು ಉಂದು ನಿಚ್ಚೊಲಾ ನಡತೊಂದುಂಡು. ಇತ್ತೆ ಕೆಲ ಬೋಟ್‌ಲೆಡ್ ಸಿಸಿ ಕೆಮರಾ ಪಾಡ್ದಿನೆರ್ದಾವರ ಕಲ್ವೆ ನಡತೊಂದುಪ್ಪುನವು ಬೊಲ್ಪುಗು ಬರೊಂದುಂಡು.
ಏರ್ ಈ ಮೀನ್ ಕಲ್ವೆರ್?
ಮೀನ್ ಪತ್ತ್‌ದ್ ಬತ್ತಿನ ಬೋಟ್‌ದ ಸ್ಟೋರೇಜ್ದ ಉಲಯಿ ದೀತಿನ ಮೀನ್‌ನ್ ಮಿತ್ತ್‌ಗ್ ದೆತ್ತ್‌ದ್ ಪಾಡುನಕ್ಲೆಗ್ ಕೊಟ್ಟು ಪಾರ್ಟಿ ಪನ್ದ್ ಪನ್ಪೆರ್. ಕೊಟ್ಟು ಪಾರ್ಟಿಡ್ ಇಪ್ಪುನ ಎಚ್ಚಿನಕುಲು ಉತ್ತರ ಕರ್ನಾಟಕ ದಕುಲು. ಮೊಕುಲು ರಾತ್ರೆ 2 ಗಂಟೆಗ್ ಬತ್ತ್‌ದ್ ಬೋಟ್‌ದ ಉಲಯಿತ್ತಿನ ಮೀನ್‌ದ ಬಾಕ್ಸ್‌ ಮಿತ್ತ್ ದೆತ್ತ್‌ದ್ ಅಟ್ಟಿ ದೀಪೆರ್. ಇತ್ತೆ ಕೊಟ್ಟುಗ್ ಎಚ್ಚಾದ್ ಬತ್ತಿನ ಕಾರ್ಮಿಕೆರ್ ಕಂಡುನ ಬೇಲೆ ಮಲ್ತೊಂದುಲ್ಲೆರ್ ಪನ್ದ್ ಬೋಟ್ ಕಾರ್ಮಿಕೆರ್, ಮಾಲಕೆರ್ ಆರೋಪ ಮಲ್ದೆರ್.