Last updated on January 9th, 2025 at 02:30 pm
ಲಕ್ನೋ: ಪೊಂಜೊವು ಒರ್ತಿ ತನ್ನ ಕಂಡನೆ, ಆಜಿ ಜೋಕುಲೆನ್ ಬುಡ್ದ್ ನಟ್ಟುನಾಯನ ಒಟ್ಟುಗು ಬಲ್ತ್ ಪೋತಿನ ನಡಕೆ ಉತ್ತರ ಪ್ರದೇಶೊದ ಹರ್ದೋಯ್ ಜಿಲ್ಲೆಡ್ ನಡತಿನ ವರದಿಯಾತ್ಂಡ್.
ಪೊಂಜೊವುನ ಕಂಡನೆ ರಾಜು ಈ ಬಗೆಟ್ ಭಾರತೀಯ ನ್ಯಾಯ ಸಂಹಿತೆದ ಸೆಕ್ಷನ್ 87 ದ ಅಡಿಟ್ ಪೊಲೀಸ್ ಕೇಸ್ ದಾಕಲ್ತ್‌ದೆರ್.
ದಾದ ಉಂದು ನಡಕೆ?: ಕರಿನ ಕೆಲ ವರ್ಸೊರ್ದು ಯಾನ್ ಬೊಕ್ಕ ಎನ್ನ ಬೊಡೆದಿ ರಾಜೇಶ್ವರಿ ಎಂಕ್ಲೆನ ಆಜಿ ಜೋಕುಲೆನೊಟ್ಟು ಹರ್ದೋಯ್‌ದ ಹರ್ಪಾಲ್‌ಪುರ ಪ್ರದೇಶೊಡು ಉಲ್ಲ. ಕೆಲ ಸಮೆರ್ದಿಂಚಿ 45 ವರ್ಷೊದ ನನ್ಹೆ ಪಂಡಿತ್ ಪನ್ಪಿನ ನಟ್ಟುನಾಯೆ ಗಡಿಗಡಿ ನಟ್ಟೆರೆ ಇಲ್ಲ ಬರಿಕ್ ಬರೊಂದಿತ್ತೆ. ಈ ಪೊರ್ತುಡು ಪಂಡಿತ್ ಅಪಗಪಗ ಎನ್ನ ಬೊಡೆದಿ ರಾಜೇಶ್ವರಿಡ ಪಾತೆರೆದೆ. ದಿನೋಲಾ ಇರ್ವೆರ್ ಪಾತೆರೊಂದು ಪಾತೆರೊಂದು ಮುಟ್ಟ ಆದಿತ್ತೆರ್. ನಟ್ಟುನಾಯೆ ನನ್ಹೆ ಫೋನ್‌ಡ್ಲಾ ರಾಜೇಶ್ವರಿಡ ಪಾತೆರೆದೆ ಪನ್ದ್ ಒಯಿಲ್‌ಡ್ ರಾಜು ಬರೆಪಾದೆರ್.
”ಜನವರಿ 3ದಾನಿ ಮಧ್ಯಾಹ್ನ 2 ಗಂಟೆದ ಅಂದಾಜಿಗ್ ಎನ್ನ ಬೊಡೆದಿ ರಾಜೇಶ್ವರಿ, ಎಂಕ್ಲೃನ ಮಗಲ್ ಖುಷ್ಬೂಗ್ ಜವುಲಿ, ನಟ್ಟಿಕಾಯಿ ಗೆತೊನ್ರ ಪೇಂಟೆಗ್ ಪೋದು ಬರ್ಪೇನ್ದ್ ಪನ್ಡ್‌ದ್ ಪೋದಿತ್ತಲ್. ಆಲ್ ಪಿರಬರಂದೆ ಇತ್ತಿನೆನ್ ತೂದು ಮಾತ ಕಡೆಟ್ ನಾಡ್‌ದಿತ್ತೆ. ಯಾನ್ ಎರ್ಮೆ ಮಾರ್ದಿನ ಕಾಸ್‌ದೊಟ್ಟುಗು ಎನ್ನ ಬೊಡೆದಿ ಇಲ್ಲರ್ದ್ ಪಿದಯಿ ಪೋದಿತ್ತಲ್. ನನ್ಹೆ ಪಂಡಿತ್ ಆಲೆನ್ ಲೆತೊಂದು ಪೋತೆ ಪನ್ದ್ ಎಂಕ್ ಸಂಶಯ ಉಂಡು” ಪನ್ದ್ ರಾಜು ಒಯಿಲ್‌ಡ್ ತೆರಿಪಾದೆರ್.
ಆಂಡ, ಈ ಇಸಯ ಮಲ್ಲ ಸುದ್ದಿ ಆಯಿಲೆಕನೆ ಪೋಲೀಸೆರೆಗ್ ರಾಜೇಶ್ವರಿ ಯಾನ್ ಏರೆನೊಟ್ಟುಗ್ಲಾ ಬಲ್ದಿಜಿ, ಇಲ್ಲಡ್ ಕಂಡನ್ಯನ ಕಿರುಕುಳೊನು ತಡೆಯೆರಾವಂದೆ ಇಲ್ಲ್ ಬುಡ್ದ್ ಎನ್ನ ಸಂಬಂಧಿಕೆರೆ ಇಲ್ಲಗ್ ಪೋದಿತ್ತೆ ಪನ್ದ್ ತೆರಿಪಾದೆರ್.