Last updated on February 6th, 2025 at 09:52 am
ಕಲ್ಲಡ್ಕ: ಸೂಪರ್ ಬಜಾರ್ ಒಂಜೆತ ಶಟರ್ ಬೀಗ ಪೊಲ್ತ್‌ದ್ ಸಾರಗಟ್ಲೆ ರೂಪಾಯಿ ಕಂಡ್‌ದಿನ ನಡಕೆ ಕುಡ್ಲ ಬೆಂಗಳೂರು ರಾಷ್ಟ್ರೀಯ ಪೆರ್ಸಾದಿಡ್ ಇಪ್ಪುನ ಕಲ್ಲಡ್ಕ ಪೇಂಟೆಡ್ ಅಂಗಾರೆ ರಾತ್ರೆ ನಡತ್‌ದ್ಂಡ್.
ತೊಕೊಟ್ಟುದ ಕಲ್ಲಾಪು ನಿವಾಸಿ ಅನ್ಸಾರ್ ಪನ್ಪಿನಾರೆನ ಕಲ್ಕಡ್ಕ ಸೂಪರ್ ಬಜಾರ್ ಉಂದಾದಿತ್ತ್‌ದ್, ಅಂಗಾರೆ ರಾತ್ರೆ ಶಟರ್‌ದ ಬೀಗ ಪೊಲ್ತ್‌ದ್ ಉಲಯಿ ಪೊಗ್ಗಿನ ಕಲ್ವೆರ್ ಡ್ರಾಯರ್‌ಡ್ ದೀದಿತ್ತಿನ ರೂ.58 ಸಾರ ಕಾಸ್‌ನ್ ಲಕ್ಕಾದೆರ್. ಒಟ್ಟುಗು ಅಂಗಡಿಡ್ ಇತ್ತಿನ ಸೊತ್ತುಲೆನ್ ಪದ್‌ರ್ದ್ ಪೋತೆರ್ ಪನ್ದ್ ತೆರಿಪಾದೆರ್.
ಕಲ್ಲಡ್ಕ ಪೇಂಟೆಡ್ ಈ ಅಂಗಡಿ ಇತ್ತ್‌ದ್ ರಾಷ್ಟ್ರೀಯ ಪೆರ್ಸಾದಿಗ್ ತಾಗೊಂದೆ ಉಂಡು. ರಾಷ್ಟ್ರೀಯ ಪೆರ್ಸಾದಿಡ್ ರಾತ್ರೆಲಾ ಗಾಡಿಲು ಪೋವೊಂದುಪ್ಪುವ. ಇಂಚ ಇತ್ತ್ಂಡಲಾ ಕಲ್ವೆರ್ ಅಂಗಡಿಗ್ ಪೊಗ್ಗುದೆರ್ ಪನ್ನಗ ಬೇತೆ ಅಂಗಡಿದಕ್ಲೆಗ್ ಮಂಡೆಬೆಚ್ಚ ಸುರು ಆತ್ಂಡ್.
ಸುಮಾರ್ ಮೂಜಿ ತಿಂಗೊಲುಗು ಪಿರವು ಮುಲ್ಪದ ಪುಗರ್ತೆದ ಕೆ.ಟಿ.ಹೋಟೆಲ್‌ಡ್ಲಾ ಕಲ್ವೆ ನಡತಿತ್ತ್‌ದ್, ಕಲ್ವೆದ ದೃಶ್ಯ ಸಿ.ಸಿ.ಟಿ.ವಿಡ್ ಕೈದಾದಿತ್ತ್ಂಡ್. ಇತ್ತೆ ಕುಡ ಕಲ್ಲಡ್ಕಡ್ ಕಲ್ವೆರೆ ಗೊಬ್ಬು ಸುರು ಆದಿತ್ತ್‌ದ್, ಕಲ್ಲಡ್ಕ ಜನೊಕ್ಲೆನ ನಿದ್ರೆ ಹಾಲಾತ್ಂಡ್. ನಡಕೆದ ಬಗೆಟ್ ಬಂಟ್ವಾಳ ನಗರ ಪೋಲೀಸ್ ಠಾಣೆಡ್ ಒಯಿಲ್ ದಾಕಲಾದಿತ್ತ್‌ದ್, ಪೊಲೀಸೆರ್ ಜಾಗೆಗ್ ಬತ್ತ್‌ದ್ ಪರಿಶೀಲನೆ ಮಲ್ದೆರ್.