Last updated on February 16th, 2025 at 02:37 pm
ಕುಡ್ಲ, ಫೆ.16 : ಕುಡ್ಲ ಕಮೀಷನರೇಟ್ ಸೀಮೆದ ಕಂಕನಾಡಿ ಪೇಂಟೆ ಬೊಕ್ಕ ಬಡಕಾಯಿ ಕುಡ್ಲ ಪೊಲೀಸ್ ಸ್ಟೇಶನ್ ಸೀಮೆಡ್ ಅಕ್ರಮ ಜುಗಾರಿ ಗೊಬ್ಬು ಅಂದರ್ – ಬಾಹರ್ ಗೊಬ್ಬೊಂದಿತ್ತಿನಡೆ ಕುಡ್ಲ ಸಿಸಿಬಿ ಪೊಲೀಸೆರ್ ದಾಳಿ ಮಲ್ತ್‌ದ್ ಒಟ್ಟು 20 ಜನೊನು ದಸ್ತಗಿರಿ ಮಲ್ತ್‌ದ್ 75,920 ರೂ. ಅಂಚೆನೇ ಬೇತೆ ಸೊತ್ತುಲೆನ್ ವಶೊಕು ಗೆತೊಂದೆರ್.
ಸುರುತ ಪ್ರಕರಣೊಡು 2025ತ ಜನವರಿ 13ತಾನಿ ಕಂಕನಾಡಿ ನಗರ ಪೊಲೀಸ್ ಸ್ಟೇಶನ್ ಸೀಮೆದ ಆಡಂಕುದ್ರು ಪನ್ಪಿನವುಲು ಅಕ್ರಮ ಅಂದರ್ – ಬಾಹರ್ ಗೊಬ್ಬೊಂದಿತ್ತಿನ ಬಗೆಟ್ ಪತ್ತ ಒಲವು ಇತ್ತ್‌ದ್ ಕುಡ್ಲ ಸಿಸಿಬಿ ಪೊಲೀಸೆರ್ ದಾಳಿ ಮಲ್ತ್‌ದೆರ್. ದಾಳಿದ ಪೊರ್ತುಡು ಜುಗಾರಿ ಗೊಬ್ಬೊಂದಿತ್ತಿನ ಸತ್ತಾರ್ ಸಾಬ್, ಸಂಜಯ ಸಾಹಿ, ಜಿತೇಂದ್ರ ಚೌಧರಿ, ರಾಮ್ ಪುಕಾರ್, ಅಭಿರಾಮ್ ರಾಯ್, ಕಬುತ್ ರಾಯ್, ಸಮರ್ಜೀತ್, ಮುರುಳಿ ಮಾತೋ ಪನ್ಪಿನಕಲೆನ್ ವಶೊಕು ಗೆತೊಂದು ಅಕಲೆರ್ದ್ ಜುಗಾರಿಗ್ ಗಲಸಿನ 42,800 ರೂ. ಕಾಸ್, ಇಸ್ಪೀಟ್ ಕಾರ್ಡ್ ಬೊಕ್ಕ ಬೇತೆ ಸೊತ್ತುಲೆನ್ ವಶೊಕು ಗೆತೊಂದೆರ್. ಈ ಬಗೆಟ್ ಕಂಕನಾಡಿ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.
ರಡ್ಡನೇ ಪ್ರಕರಣೊಡು 2025ತ ಫೆಬ್ರವರಿ 14ತಾನಿ ಬಡಕಾಯಿ ಕುಡ್ಲ ಪೊಲೀಸ್ ಸ್ಟೇಶನ್ ಸೀಮೆದ ಕಾರ್ ಸ್ಟ್ರೀಟ್‌ದ ಕೈತಲ್ ಒಂಜಿ ಇಲ್ಲಡ್ ಅಕ್ರಮ ಜುಗಾರಿ ಅಂದರ್ – ಬಾಹರ್ ಗೊಬ್ಬೊಂದಿತ್ತಿನ ಬಗೆಟ್ ಪತ್ತ ಒಲವು ಇತ್ತ್‌ದ್ ಕುಡ್ಲ ಸಿಸಿಬಿ ಪೊಲೀಸೆರ್ ದಾಳಿ ಮಲ್ತ್‌ದೆರ್. ಈ ಪೊರ್ತುಡು ಜುಗಾರಿ ಗೊಬ್ಬೊಂದಿತ್ತಿನ ನಾಗರಾಜ್, ಮನೋಜ್ ಕುಮಾರ್, ಸಮೀರ್ ಅಹಮ್ಮದ್, ಸಂತೋಷ್, ಮಂಜುನಾಥ, ಶರತ್ ಕುಮಾರ್, ಉಮ್ಮರ್ ಫಾರೂಕ್, ಅಶೋಕ್ ಡಿಸೋಜ, ನವೀನ್ ಅಂಗಡಿ, ಕಿಶನ್, ನೀಲಪ್ಪ ಮಿಟಿ, ಅಪ್ಸರ್ ಪನ್ಪಿನಕಲೆನ್ ವಶೊಕು ಗೆತೊಂದು ಅಕಲೆರ್ದ್ 33,120 ರೂ. ಕಾಸ್, ಇಸ್ಪೀಟ್ ಕಾರ್ಡ್ ಬೇತೆ ಸೊತ್ತುಲೆನ್ ವಶೊಕು ಗೆತೊಂದೆರ್. ಈ ಬಗೆಟ್ ಬಡಕಾಯಿ ಕುಡ್ಲ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.
ಈ ಕಾರ್ಯಾಚರಣೆಡ್ ಸಿಸಿಬಿ ಘಟಕೊದ ಎಸಿಪಿ ಮನೋಜ್ ಕುಮಾರ್ ನಾಯ್ಕ್ ಮೆರೆನ ಮಾರ್ಗದರ್ಶನೊಡು ಪೊಲೀಸ್ ನಿರೀಕ್ಷಕೆರಾಯಿನ ರಫೀಕ್ ಕೆ ಎಂ ಮೆರೆನ ಮುತಾಲಿಕೆಡ್ ಪಿಎಸ್‌ಐ ನರೇಂದ್ರ, ಶರಣಪ್ಪ ಭಂಡಾರಿ, ಎಎಸ್‌ಐ ರಾಮ ಪೂಜಾರಿ, ಸುಜನ್ ಶೆಟ್ಟಿ ಬೊಕ್ಕ ಸಿಸಿಬಿ ಸಿಬ್ಬಂದಿಲು ಪಾಲ್‌ಪಡೆದಿತ್ತೆರ್.