Last updated on February 13th, 2025 at 02:27 pm
ಹೈದರಾಬಾದ್ ಫೆಬ್ರವರಿ 13: ಪುಚ್ಚೆ ಒಂಜಿ ಮಲ್ದಿನ ಕಿತಾಪತಿಗ್ ರಡ್ಡ್ ಧರ್ಮೊಲೆ ನಡುಟು ಕೊಲಲ ಆಪಿನಡೆ ಮುಟ್ಟ ಎತ್ತಿನ ಪರಿಸ್ಥಿತಿನ್ ಪೊಲೀಸೆರ್ ರಪಕ್ಕ ಕಾರ್ಯಾಚರಣೆ ಮಲ್ತ್‌ದ್ ಸಮ ಮಲ್ದೆರ್.
ಹೈದರಾಬಾದ್‌ದ ತಪ್ಪಚಬುತ್ರದ ಹನುಮಾನ್ ದೇಲಂತಡೆದ ಸುತ್ತುಮದೆಲ್‌ದ ಉಲಯಿದ ಶಿವ ದೇಲಂತಡೆಡ್ ಮಾಸದ ತುಂಡು ತಿಕ್ಕ್‌ದಿತ್ತ್‌ದ್, ಉಂದು ಕೋಡೆ, ಬುಧವಾರ ಉದ್ವಿಗ್ನತೆಗ್ ನೆವನ ಆದಿತ್ತ್ಂಡ್.
ದೇಲಂತಡೆಡ್ ಏರೋ ಹಾಲ್ ಬಗೆಯೆರ ಮಾಸ ದಕ್ಕ್‌ದೆರ್ ಪನ್ದ್ ಆರೋಪಿತ್‌ದ್ ಹಿಂದೂ ಸಂಘಟನೆ ಕಾರ್ಯಕರ್ತೆರ್ ಅಂಚೆನೇ ಮುಟ್ಟದಕುಲು ಪ್ರತಿಭಟನೆ ಮಲ್ತಿತ್ತೆರ್. ಈ ಪೊರ್ತುಡು ಕಾರ್ಯಾಚರಣೆಗ್ ಜತ್ತಿನ ಪೊಲೀಸೆರ್ ಮಾತ್ರ ಶಾಕ್ ಆತೆರ್.
ದೇಲಂತಡೆದ ಸುತ್ತಮುತ್ತದ ಸಿಸಿಟಿವಿ ಪರಿಶೀಲನೆ ಮಲ್ತಿನೇ ಒಂಜಿ ಪುಚ್ಚೆ ಮಾಸದ ತುಂಡುನು ಬಾಯಿಡ್ ತುಚೊಂದು ದೇಲಂತಡೆದ ಉಲಯಿ ಪೊಗ್ಗುದಿನ ತೋಜಿದ್ ಬೈದ್ಂಡ್. ಒಂತೆಲ ಕಡೆಸಾವಂದೆ ಪೊಲೀಸೆರ್ ಒಲವುನು ದೇಲಂತಡೆದ ಆಡಳಿತ ಮಂಡಳಿಗ್ ತೆರಿಪಾದ್ ಪರಿಸ್ಥಿತಿ ಸಮ ಮಲ್ದೆರ್.
ಒಟ್ಟಾರೆ ಪುಚ್ಚೆದ ಕಿತಾಪತಿಗ್ ಮಲ್ಲ ಅನಾಹುತ ಆಪಿನೆನ್ ಪೊಲೀಸೆರ್ ತಪ್ಪಾದೆರ್.