ಪೆದ್ದಿನಪ್ಪೆನ ಪುನೊತ ಒಟ್ಟುಗೇ ಪತ್ತ್ ದಿನ ಕರಿತಿನ ಪೊಣ್ಣು ಜೋಕುಲು..ದಾದ ಉಂದು ನಡಕೆ..?

Last updated on February 2nd, 2025 at 05:19 pm

ಹೈದರಾಬಾದ್ ಫೆಬ್ರವರಿ 02 : ಅಪ್ಪೆ ತೀರ್ದ್ ಪೋದಿತ್ತ್ಂಡಲಾ ಆರೆನ ಪುನತ ಒಟ್ಟುಗು ಇರ್ವೆರ್ ಪೊಣ್ಣು ಜೋಕುಲು ಸುಮಾರ್ 10 ದಿನ ಕರಿತಿನ ನಡಕೆ ಹೈದ್ರಾಬಾದ್‌ಡ್ ನಡತ್‌ದ್ಂಡ್. ಜನವರಿ 23 ತಾನಿಯೇ ಅಪ್ಪೆ ಜೂವ ಬುಡ್ತೆರ್. ಅಪ್ಪೆನ್ ಕಲೆವೊಂದಿನ ಖಿನ್ನತೆಡ್ ಇರ್ವೆರ್ ಪಲಿಸಂಗಡಿಲಾ ಏರೆಗ್ಲಾ ತೆರಿಪಾವಂದೆ ಅಪ್ಪೆನ ಪುನತೊಟ್ಟುಗು ಸುಮಾರ್ 10 ದಿನ ಕಾಲ ಕರಿತ್‌ದೆರ್.

ಸಿ. ರವಳಿ (25) ಬೊಕ್ಕ ಸಿ. ಯಶ್ವಿತಾ (22) ಪನ್ದ್ ಗುರ್ತ ಪತ್ತ್‌ದಿನ ಪಲಿಸಂಗಡಿಯರ್ಲು, ತನ್ಕುಲೆ ಅಪ್ಪೆ ಸಿ ಲಲಿತಾ (45) ಮೆರೆನೊಟ್ಟುಗು ಹೈದರಾಬಾದ್‌ದ ವಾರಸಿಗುಡಾ ಪ್ರದೇಶೊಡು ಬಾಡಾಯಿದ ಇಲ್ಲಡ್ ಇತ್ತೆರ್.

ಪೊಲೀಸೆರೆ ಪ್ರಕಾರ, ಲಲಿತಾ ಐನ್ ವರ್ಸೊಗು ದುಂಬು ಕಂಡನೆ ಸಿಎಲ್ ರಾಜು ಮೆರೆರ್ದ್ ದೂರ ಆದಿತ್ತೆರ್. ತನ್ನ ಇರ್ವೆರ್ ಜೋಕುಲೆನೊಟ್ಟುಗು ಉಸ್ಮಾನಿಯಾ ವಿಶ್ವವಿದ್ಯಾಲಯೊದ ಬರಿತ ಮಾಣಿಕೇಶ್ವರಿ ನಗರೊಡು ಇತ್ತಿನ ಮೇರ್ ಮೂಜಿ ತಿಂಗೊಲ್ ದುಂಬು ವಾರಸಿಗುಡಾದ ಬೌಧ ನಗರೊದ ಬಾಡಾಯಿದ ಇಲ್ಲಗ್ ಬತ್ತಿತ್ತೆರ್. ಲಲಿತಾ ಇಲ್ಲಡ್ ಇತ್ತೆರ್ನ್ಡ, ರವಳಿ ಗಾರ್ಮೆಂಟ್ಸ್‌ಡ್ ಬೇಲೆ ಮಲ್ತೊಂದಿತ್ತೆರ್, ಯಶ್ವಿತಾ ಈವೆಂಟ್ ಮ್ಯಾನೇಜಿಂಗ್ ಏಜೆನ್ಸಿಡ್ ಬೇರೆ ಮಲ್ತೊಂದಿತ್ತೆರ್.

ಪೊಲೀಸೆರ್ ಇಲ್ಲದ ಬಾಕಿಲ್‌ನ್ ದೆತ್ತ್‌ದ್ ತೂನಗ ಈ ನಡಕೆ ಜನವರಿ 31 ತಾನಿ ಬೊಲ್ಪುಗು ಬೈದ್ಂಡ್. ಇರ್ವೆರ್ ಪೊಣ್ಣು ಜೋಕುಲೆನ 45 ವರ್ಸ ಪ್ರಾಯೊದ ಅಪ್ಪೆ ರಾತ್ರೆ ಜೆತ್ತಿನಾರ್ ಲಕ್ಕ್‌ದಿನೇ ಇಜ್ಜಿ. ಜೋಕುಲು ಲಕ್ಕಾಯೆರ ಪೋನಗ ಆರ್ ತೀರ್ದಿನ ದೃಢ ಆತ್ಂಡ್. ದಮ್ಮು ಉಂತುದಿತ್ತ್‌ದ್, ತಿಗಲೆಲಾ ಆಕೊಂದಿಜ್ಜಂದಿನೆನ್ ತೂದು ಜೋಕುಲು ಅಪ್ಪೆ ತೀರ್ದಲ್ ಪನ್ದ್ ನಿಗಂಟ್ ಮಲ್ತೊಂದೆರ್. ಆಂಡ ಅವೆನ್ ಏರೆಡಲಾ ಪಂಡೊಂದಿಜೆರ್. ಸುಮಾರ್ 10 ದಿನ ಇಲ್ಲದ ಬಾಕಿಲ್ ಪಾಡೊಂದು ಅಪ್ಪೆನ ಪುನತೊಟ್ಟುಗೇ ಇತ್ತೆರ್.

ಅಪ್ಪೆ ತೀರ್ದಿನೆನ್ ತೂದು ಅಲಕ್ಕ ಖಿನ್ನತೆಗ್ ಪೋತಿನ ಪೊಣ್ಣು ಜೋಕುಲು ದುಂಬಗ್ ದಾದ ಮನ್ಪುನು ಪನ್ದ್ ತೆರಿಯಂದೆ ಆರೆನ ಪುನತೊಟ್ಟುಗು ಇಲ್ಲಡೇ ಉಂತುದೆರ್. ಕಡೇಕ್ ನೆರೆಕರೆತಕುಲು ಸುಮಾರ್ ದಿನ ಇಲ್ಲದ ಬಾಕಿಲ್ ಪಾಡ್ದಿನೆನ್ ತೂದು ಸಂಶಯೊಡು ವಿಷಯೊನು ಪೊಲೀಸೆರೆಗ್ ತೆರಿಪಾದೆರ್. ಪೊಲೀಸೆರ್ ಇಲ್ಲಡೆ ಬತ್ತ್‌ದ್ ಬಾಕಿಲ್ ದೆಪ್ಪಾದ್ ತೂನಗ ನಡಕೆ ಬೊಲ್ಪುಗು ಬೈದ್ಂಡ್.