Last updated on February 26th, 2025 at 09:09 am
ಕುಡ್ಲ, ಫೆ. 25: ನಿಷೇದಿತ ಮಾದಕ ಸೊತ್ತು MDMA ನ್ ಬೆಂಗಳೂರ್‌ರ್ದ್ ಕುಡ್ಲಗ್ ಕನತ್ ಮಾರೊಂದಿತ್ತಿನ ಡ್ರಗ್ ಪೆಡ್ಲರ್ ಒರಿಯನ್ ಕುಡ್ಲ ಸಿಸಿಬಿ ಪೊಲೀಸೆರ್ ದಸ್ತಗಿರಿ ಮಲ್ತ್‌ದ್ 27 ಗ್ರಾಂ ಎಂಡಿಎಂಎ ನ್ ವಶೊಕು ಗೆತೊಂದೆರ್.
ಕೈದಾತಿನ ಆರೋಪಿನ್ ಬಂಟ್ವಾಳ ನಿವಾಸಿ ಆಸೀಫ್ @ ಆಚಿ(32) ಪನ್ದ್ ಗುರ್ತ ಪತ್ತ್‌ದೆರ್. ನಿಷೇದಿತ ಮಾದಕ ಸೊತ್ತು ಆಯಿನ MDMA ನ್ ಬೆಂಗಳೂರ್‌ಡ್ ಗೆತೊಂದು ಕುಡ್ಲಗ್ ಕನತ್‌ದ್ ಪೇಂಟೆಡ್ ಸಾರ್ವಜನಿಕೆರೆಗ್ ಅಂಚೆನೇ ವಿದ್ಯಾರ್ಥಿಲೆಗ್ ಮಾರೊಂದುಪ್ಪುನ ಬಗೆಟ್ ಪತ್ತ ಒಲವು ಇತ್ತಿನ ಕುಡ್ಲ ಸಿಸಿಬಿ ಪೊಲೀಸೆರ್ ಆರೋಪಿನ್ ವಶೊಕು ಗೆತೊಂದೆರ್.
ಕೈದಾತಿನ ಆರೋಪಿರ್ದ್ 1,35,000/- ಮೌಲ್ಯೊದ 27 ಗ್ರಾಂ. ನಿಷೇಧಿತ ಮಾದಕ ಸೊತ್ತು MDMA, ಮೊಬೈಲ್ ಫೋನ್, ಡಿಜಿಟಲ್ ವೇಯಿಂಗ್ ಸ್ಕೇಲ್‌ನ್ ವಶೊಕು ಗೆತೊಂದೆರ್. ವಶ ಮಲ್ದಿನ ಸೊತ್ತುಲೆನ ಒಟ್ಟು ಮೌಲ್ಯ ರೂ. 1,45,500/- ಆವು. ಈ ಬಗೆಟ್ ತೆನ್ಕಾಯಿ ಕುಡ್ಲ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.