Last updated on February 17th, 2025 at 08:32 pm
ಬೊಲ್ತೇರ್: ಗುರುವಾಯನಕೆರೆ(ಕೆರೆಮೆಲ್)ರ್ದ್ ಉಬಾರ್ ಮುಟ್ಟದ ಲೋಕೋಪಯೋಗಿ ಇಲಾಖೆಗ್ ಸೇರ್ದಿನ ರೋಡ್ ಅಲಕ್ಕ ಕಂಡಂ ಆದಿತ್ತ್‌ದ್, ಈ ರೋಡ್‌ಡೆ ಗಾಡಿಲೆನ್ ಕೊನೊಯೆರನೇ ಜನ ಪೋಡ್ಯುಲೆಕ ಆತ್ಂಡ್.
ರೋಡ್‌ಡ್ ಅಲ್ಪಲ್ಪ ಗುಂಡಿ ಗುರುಂಪುಲೇ ದಿಂಜಿದ್ ಪೋದು ದಿನೋಲಾ ಪೋಪಿನಕುಲು ಬಾರೀ ಬಙ್ಙ ಬರೊಂದುಲ್ಲೆರ್. ಇಂಚಿಪ್ಪೊಗಾತೆ ಅಲ್ಪಲ್ಪ ಕಣ್ಣ್‌ಕಟ್ಟ್‌ಗ್ ತೇಪೆ ಬೇಲೆ ನಡತಿತ್ತ್‌ದ್, ಗುರಿಕ್ಲೆಗ್ ಕಾಲಿ ಜಲ್ಲಿ ಕಲ್ಲ್ ಪಾಡ್ದಿತ್ತ್‌ದ್ ಅವು ಲಕ್ಕ್‌ದ್ ಪೋದು ಸಾದಿಡೆ ಪರಡ್‌ದ್ಂಡ್. ಕೆಲ ಕಡೆಟ್ ಜನೊಕುಲೇ ಸಾದಿದ ಗುರಿಕ್ಲೆನ್ ಮಣ್ಣ್ ಪಾಡ್ದ್ ಮುಚ್ಚಿದ್ ಸಂಚಾರೊಗು ಒಂಜಿ ಮಟ್ಟ್‌ಗ್ ಅನುಕೂಲ ಆಪಿಲೆಕ ಮಲ್ದೆರ್.
ರೋಡ್ ಬುಲೆಚ್ಚಿಲ್‌ಗ್ ರೂ.6 ಕೋಟಿ: ಇತ್ತೆ ಬೊಲ್ತೇರ್ ಶಾಸಕೆ ಹರೀಶ್ ಪೂಂಜ ಮೆರೆನ ಬಿನ್ನಪುದ ಮಿತ್ತ್ ಸಂಸದೆ ಕ್ಯಾ| ಬ್ರಿಜೇಶ್ ಚೌಟೆರ್ ಕೇಂದ್ರ ಸರ್ಕಾರೊದ ಒಟ್ಟುಗು ಪಾತೆರ್ದ್, ಕೇಂದ್ರ ರೋಡ್ ಮೂಲ ಸೌಕರ್ಯ ನಿಧಿರ್ದ್ ರೋಡ್ ಬುಲೆಚ್ಚಿಲ್‌ಗ್ ರೂ.6 ಕೋಟಿ ಅನುದಾನೊನು ತರ್ಪಾವುನೆಟ್ ಯಶಸ್ವಿಯಾತೆರ್.
ಉಂದೆತ ಶಿಲಾನ್ಯಾಸ ಕಾರ್ಯಕ್ರಮ ಎಲ್ಲೆ ಫೆ.18ದಾನಿ ಕಾಂಡೆ 9.30 ಕ್ಕ್ ಗುರುವಾಯನಕೆರೆ(ಕೆರೆಮೆಲ್)ದ ಕುಲಾಲ ಮಂದಿರೊದ ಕೈತಲ್ ನಡಪುಂಡು. ಶಿಲಾನ್ಯಸೊನು ಸಂಸದೆ ಕ್ಯಾ.ಬ್ರಿಜೇಶ್ ಚೌಟೆರ್ ಮನ್ಪೆರ ಇತ್ತ್‌ದ್, ಶಾಸಕೆ ಹರೀಶ್ ಪೂಂಜೆರ್ ಗುರ್ಕಾರ್ಮೆ ವಯಿತೊನುವೆರ್. ಗ್ರಾಮ ಪಂಚಾಯ್ತಿದ ಗುರ್ಕಾರ್ಲು, ಒತ್ತು ಗುರ್ಕಾರ್ಲು, ಪದುಕೆರ್, ಸಂಘ-ಸಂಸ್ಥೆದಕುಲು, ಅಧಿಕಾರಿ ವರ್ಗೊದಕುಲು ಪಾಲ್‌ಪಡೆಪೆರ್.