Last updated on February 10th, 2025 at 02:15 pm
ಕಾರ್ಲ, ಫೆ.10 : ಕುದುರೆಮುಖ ವನ್ಯಜೀವಿ ವಲಯೊದ ಮೂರ್ಲಿಕರಪ್ಪ ಕೈತಲ್ದ ನೂರಾಲ್‌ಬೊಟ್ಟು ಗ್ರಾಮೊಡು ಬೋಂಟೆಗ್ ಪಿದಡ್ದಿನ ಇರ್ವೆರೆನ್ ಕಾರ್ಲ ವನ್ಯಜೀವಿ ವಿಭಾಗೊದ ಅರಣ್ಯಾಧಿಕಾರಿಲು ಕೈದ್ ಮಲ್ದೆರ್.
ಕೈದಾತಿನಕಲೆನ್ ಅಲ್ಪದಕುಲೇ ಆಯಿನ ಪ್ರಶಾಂತ್ ಪೂಜಾರಿ ಬೊಕ್ಕ ಅಶೋಕ್ ಪೂಜಾರಿ ಪನ್ದ್ ಗುರ್ತ ಪತ್ತ್‌ದೆರ್. ಅಧಿಕಾರಿಲು ಬೆಡಿ, 21 ಗುಂಡಲು, ಸರ್ಚ್‌ಲೈಟ್, ರಡ್ಡ್ ಮೊಬೈಲ್ ಫೋನ್‌, ಆರೋಪಿಲು ಗಲಸ್‌ದಿನ ಕಾರ್ ಬೊಕ್ಕ ಆಟೋರಿಕ್ಷಾನ್ ವಶೊಕು ಗೆತೊಂದೆರ್.
ಕೈದ್ ಮಲ್ದಿನ ಆರೋಪಿಲೆನ್ ನ್ಯಾಯಾಂಗ ಕೈದ್‌ಗ್ ಒಪ್ಯಾದೆರ್.
ಈ ಕಾರ್ಯಾಚರಣೆನ್ ಕುದುರೆಮುಖ ವನ್ಯಜೀವಿ ವಿಭಾಗೊದ ಉಪ ಅರಣ್ಯ ಸಂರಕ್ಷಣಾಧಿಕಾರಿ ಶಿವರಾಮು ಬಾಬು ಮೆರೆನ ನಿರ್ದೇಶನೊಡು, ಸಹಾಯಕ ಅರಣ್ಯ ಸಂರಕ್ಷಣಾಧಿಕಾರಿ ಸತೀಶ್ ಎನ್ ಮೆರೆನ ಮಾರ್ಗದರ್ಶನೊಡು ಕಾರ್ಲ ವನ್ಯಜೀವಿ ವಲಯ ಅರಣ್ಯಾಧಿಕಾರಿ ಶಶಿಧರ ಗೌಡ ಪಾಟೀಲ್ ಮೆರೆನ ಮುತಾಲಿಕೆಡ್ ಕಾರ್ಯಾಚರಣೆ ನಡತ್ಂಡ್.
ಕಾರ್ಯಾಚರಣೆಡ್ ಉಪ ವಲಯ ಅರಣ್ಯಾಧಿಕಾರಿ ರಾಜು ಎಲ್ ಜೆ, ಅಧಿಕಾರಿಲಾಯಿನ ಅಭಿಲಾಷ್ ಎಸ್ ಬಿ, ಗಸ್ತು ಅರಣ್ಯ ರಕ್ಷಕೆರಾಯಿನ ಫಕೀರಪ್ಪ ಬೊಕ್ಕ ಮಲ್ಲಯ್ಯ, ಬೋಂಟೆ ನಿಗ್ರಹ ರಕ್ಷಕೆರಾಯಿನ ಹರೀಶ್ ಎಂ, ನಿತಿನ್ ಬೊಕ್ಕ ಅಜಿತ್, ಡ್ರೈವರ್ ದಾಮೋದರ್ ಬೊಕ್ಕ ನಿತಿನ್ ಜೆ ಹೆಗಡೆ ಸೇರ್ದ್ ಬೇತೆ ಸಿಬ್ಬಂದಿಲು ಪಾಲ್‌ಪಡೆದಿತ್ತೆರ್.