ಕಾಂಗ್ರೆಸ್ ಸರ್ಕಾರೊಗು ತಾಕತ್ ಇತ್ತ್ಂಡ ಸುರುಕು ಆ ಬೇಲೆನ್ ಮುಲ್ಪ ಮಲ್ತ್ ತೂಪಾವಡ್ – ಶಾಸಕೆ ವೇದವ್ಯಾಸ್ ಕಾಮತೆರ್

Last updated on February 10th, 2025 at 09:22 am

ಕುಡ್ಲ: ಕುದ್ರೋಳಿಡ್ ಅಕ್ರಮವಾದ್ ನಡತೊಂದಿತ್ತಿನ ಕಸಾಯಿಖಾನೆಗ್ ಮೇಯರ್ ಮನೋಜ್ ಕುಮಾರ್ ಮೇರ್ ಒರರ್ದ್ ಒರಾನೆ ದಾಳಿ ಮಲ್ದಿನವು ಪುಗರೊಡಾಯಿನ ಪನ್ದ್ ಶಾಸಕೆ ವೇದವ್ಯಾಸ ಕಾಮತೆರ್ ಪನ್ಡೆರ್.

ಸಚಿವೆ ಮಂಕಾಳ ವೈದ್ಯೆರ್, ಅಕ್ರಮವಾದ್ ಕೈಕಂಜಿಲೆನ್ ಕಡ್ಪುನಕ್ಲೆನ್ ಶೂಟ್ ಮಲ್ತ್ ಕೆರೊಡು ಪನ್ದ್ ಪನ್ತೆರ್, ಕಾಂಗ್ರೆಸ್ ಸರ್ಕಾರೊಗು ತಾಕತ್ ಇತ್ತ್ಂಡ ಸುರುಕು ಆ ಬೇಲೆನ್ ಮುಲ್ಪ ಮಲ್ತ್ ತೂಪಾವಡ್. ವಾಸ್ತವಡ್ ಪಾಲಿಕೆ ಸೀಮೆಡ್ ಅಧಿಕೃತವಾದ್ ಒಂಜೇ ಒಂಜಿ ಕಸಾಯಿಖಾನೆ ಇಜ್ಜಿ. ಆಂಡಲಾ ದಿನೋಲಾ ಪೆತ್ತದ ಮಾಸ ತಿಕ್ಕೊಂದಿತ್ತ್ಂಡಲಾ ಅಕ್ರಮ ಕಸಾಯಿಖಾನೆಲೆನ ಮಿತ್ತ್ ದಾಳಿ ಮನ್ಪುನ ತಂಕೊನು ಪೊಲೀಸ್ ಇಲಾಖೆ ತೋಜವೊಂದಿಜ್ಜಿ. ಮುಲ್ಪ ರಾಜ್ಯ ಸರ್ಕಾರೊನೇ ಅಕ್ರಮೊಗು ತಾಂಗ್ ಕೊರ್ದು ಪೊಲೀಸೆರೆ ಕೈಕಟ್ಟ್‌ದ್ ಪಾಡ್ದಿನ ಸ್ಪಷ್ಟ ತೋಜೊಂದುಂಡು ಪನ್ದ್ ಪನ್ಡೆರ್.

ಅಕ್ರಮ ಕಸಾಯಿಖಾನೆಲೆನ ಮಿತ್ತ್ ಕ್ರಮ ಗೆತೊನುನ ಕಾಲಿ ಮಹಾನಗರ ಪಾಲಿಕೆದ  ಜಬದ್ದರಿ ಅತ್ತ್. ಜಿಲ್ಲಾಡಳಿತ ಅಂಚೆನೇ ಪೊಲೀಸ್ ಇಲಾಖೆಗ್ಲಾ ಜಬದ್ದರಿ ಉಂಡು. ಉಂದೆಕ್ ದುಂಬು ಬಿಜೆಪಿ ಸರ್ಕಾರೊದ ಪೊರ್ತುಡು ಅಕ್ರಮವಾದ್ ಕೈಕಂಜಿಲೆನ್ ಕೆರ್ಪುನಕ್ಲೆನ ಆಸ್ತಿನ್ ಮುಟ್ಟುಗೋಲ್ ಮಲ್ತೊನುನ ಕಾನೂನುಲೆನ್ ಕನತಿನೆರ್ದಾವರ ಅಕ್ರಮೊಲು ಅಂಕೆಗ್ ಬತ್ತ್‌ದಿತ್ತ. ಅಂಚಾದ್ ಅಂಚಿನ ಕಾನೂನುಲು ಕುಡ ಜಾರಿಗ್ ಬರೊಡು ಪನ್ದ್  ಆಗ್ರಹ ಮನ್ತೊಂದುಲ್ಲೆ. ಇಜಿಂಡ ದುಂಬಗ್ ದಾರ ಅನಾಹುತೊಲು ನಡತ್ಂಡ ರಾಜ್ಯ ಕಾಂಗ್ರೆಸ್ ಸರ್ಕಾರೊನೇ ತರೆ ಕೊರೊಡು ಪನ್ದ್ ಶಾಸಕೆರ್ ಪನ್ಡೆರ್.