Last updated on February 8th, 2025 at 06:37 am
ಬೆಂಗಳೂರು, ಫೆ.07: ಭಾರತೊದ ಎಡ್ಡೇನ ತೆನಸ್ ಬೊಕ್ಕ ಪಾನೀಯೊಲೆನ್ ನಾಡ್ದ್, ಗೌರವ ಕೊರ್ಪುನ ಫುಡ್ ಕನೋಸರ್ಸ್ ಇಂಡಿಯಾ ಅವಾರ್ಡ್ಸ್ ದ ಏಳನೇ ಆವೃತ್ತಿಡ್ ಕುಡ್ಲದ ಮಾಸ್ಟರ್ ಶೆಫ್ ಮಹಮ್ಮದ್ ಆಶಿಕ್ ಮೆರೆಗ್ ‘ಸೌತ್ ಇಂಡಿಯಾ ಯಂಗ್ ಶೆಫ್ ಆಫ್ ದಿ ಇಯರ್’ ಪ್ರಶಸ್ತಿ ತಿಕ್ಕ್‌ದ್ಂಡ್.
ಈ ಪ್ರಶಸ್ತಿ ಕೊರ್ಪುನ ಕಾರ್ಯಕ್ರಮ ಬೆಂಗಳೂರುದ ತಾಜ್ ಯಶವಂತಪುರ ಹೋಟೆಲ್ ಸಭಾಂಗಣೊಡು ನಡತ್ಂಡ್. ಈ ಕಾರ್ಯಕ್ರಮೊಡು ದೇಶೊದ ಬೇತೆ ಬೇತೆ ರಾಜ್ಯೊಲೆರ್ದ್ ಬತ್ತಿನ ಮಲ್ಲ ಮಲ್ಲ ಶೆಫ್‌ನಕುಲು, ರೆಸ್ಟೋರೆಂಟ್ ಬೊಕ್ಕ ಫುಡ್ ಬ್ರಾಂಡ್‌ಲು ಪಾಲ್‌ಗೆತೊಂದಿತ್ತ. ಕುಡ್ಲದ ಪ್ರತಿಭೆ ಮಾಸ್ಟರ್ ಶೆಫ್ ಮಹಮ್ಮದ್ ಆಶಿಕ್ ಈ ಪ್ರಶಸ್ತಿ ಗೆತೊನುನ ಮುಕೇನ ತುಳುನಾಡ ಜಿಲ್ಲೆ ಕುಡ್ಲದ ಪುದರ್‌ನ್ ಅಂತಾರಾಷ್ಟ್ರೀಯ ಮಟ್ಟೊಡು ಕುಡೊರ ದೆರ್ತ್ ತೋಜಾದೆರ್.
ಈ ಕಾರ್ಯಕ್ರಮೊದ ಮುಕೇನ ಭಾರತೊದ ವೈವಿಧ್ಯಮಯ ಆಹಾರ ಸಂಸ್ಕೃತಿ ಬೊಕ್ಕ ಚಾತುರ್ಪುದ ಶೆಫ್‌ಲೆನ ಸಾಧನೆಲೆಗ್ ಗೌರವ ಸಂದಾಯೆರ್.