Last updated on February 18th, 2025 at 12:18 pm
ಒಡಿಪು: ತುಳುನಾಡ್- ಮಹಾರಾಷ್ಟ್ರ ನಡುಟು ಬಲಿಪುನ ಮತ್ಸ್ಯಗಂಧ ಎಕ್ಸ್‌ಪ್ರೆಸ್ ರೈಲ್‌ಗ್ ಪೊಸ ತಂತ್ರಜ್ಞಾನೊಲು ಇತ್ತಿನ LHB ಕೋಚ್‌ಲೆನ್ ಗೋಡ್ಯಾದಿತ್ತ್‌ದ್ ಉಂದೆಕ್ ಸೋಮಾರ ಸಂಸದೆ ಕೋಟ ಶ್ರೀನಿವಾಸ ಪೂಜಾರ್ಲು ಇಂದ್ರಾಳಿ ರೈಲ್ ಉಂತಡೆಡ್ ಚಾಲನೆ ಕೊರ್ಯೆರ್.
ಕುಡ್ಲರ್ದ್ ಬೊಂಬೈಗ್ ಪಿದಡ್ದಿತ್ತಿನ ಈ ರೈಲ್‌ನ್ ಇಂದ್ರಾಳಿಡ್ ಸಂಸದೆರ್ ಎದುಕೊಂದು, ಅಲ್ತ್‌ರ್ದ್ ಕುಂದಾಪುರ ಮುಟ್ಟಲಾ ಅವ್ವೇ ರೈಲ್‌ಡ್ ಪೋಯೆರ್.
ಮತ್ಸ್ಯಗಂಧ ರೈಲು ತೋರೊಂದುಪ್ಪುನ ಬಗೆಟ್ ಪ್ರಯಾಣಿಕೆರ್ ಕೊರ್ತಿನ ಒಯಿಲ್‌ನ್ ಆಧರಿತ್‌ದ್ ಪೊಸ ಕೋಚ್ ಗೋಡ್ಯಾಯೆರ ರೈಲ್ವೇ ಅಧಿಕಾರಿಲೆಗ್ ಕೇಂದ್ರ ಸಚಿವೆರ್ ಆದೇಶ ಕೊರ್ತಿನೆರ್ದಾವರ ಬಾರೀ ಬೇಗೊಡೇ ಪೊಸ ಕೋಚ್ ತಿಕ್ಕ್‌ದ್ಂಡ್ ಪನ್ದ್ ಪನ್ಡೆರ್.
ಶಾಸಕೆ ಯಶಪಾಲ್ ಎ. ಸುವರ್ಣೆರ್, ಕೊಂಕಣ ರೈಲ್ವೇದ ಕಾರ್ಯತಂತ್ರ ಯೋಜನೆ ಬೊಕ್ಕ ವ್ಯವಹಾರ ಅಭಿವೃದ್ಧಿ ವಿಭಾಗೊದ ಕಾರ್ಯನಿರ್ವಾಹಕ ನಿರ್ದೇಶಕೆ ಜೋಸೆಫ್ ಇ. ಜಾರ್ಜ್, ಪೆರಿಯ ತಾಂತ್ರಿಕ ವ್ಯವಸ್ಥಾಪಕೆ ದಿಲೀಪ್‌ ಡಿ. ಭರ್, ಕುಡ್ಲ ವಿಭಾಗೊದ ಪಿಆರ್‌ಒ ಸುಧಾ ಕೃಷ್ಣಮೂರ್ತಿ, ಕಾರವಾರ ವಿಭಾಗೊದ ಡಿಸಿಇ ವಿಜಯ ಕುಮಾರ್ ಇತ್ತೆರ್.
ಈ ಪೊರ್ತುಡು ಸಂಸದೆರ್ ತುಳು ಕಂಟೆಂಟ್ ಕ್ರಿಯೇಟರ್ ಧೀರಪ್ಪನ್ ಪುಗರ್ತೆದ ಧೀರಜ್ ಶೆಟ್ಟಿ ಮಿಜಾರ್ ಮೆರೆಗ್ ಶಾಲ್ ಪಾಡ್ದ್ ಮಾನಾದಿಗೆ ಮಲ್ತೆರ್.