Last updated on February 25th, 2025 at 10:28 am
ಪುನಿದಾಂತಿ ಕಂಡ ಪಡ್ಡಾಯಿ ಕಡಲುರ್ದ್, ಇನೆದಾಂತಿ ಬಾರಿಮಲೆ ಮೂಡಾಯಿ ಗಟ್ಟೊದ ಬರಿ ಮುಟ್ಟಗ್ ನಾಗರಖಂಡ ದಿಂಜುಲ್ಲ ನಾಡ್ ಪುಣ್ಯುಲ್ಲ ರಾಜ್ಯಡ್, ಸತ್ಯ ನೆಗಪಾವೊಂದು ಧರ್ಮ ಮೆರೆಪಾವೊಂದು, ಗಂದ ಪಾಡಾದ್ ಮುಂಡ ಒರಿಪಾದ್, ಪಾಂಪು ಪಾಡ್ದ್ ನೂಲಕೈಸಾಂಗುಡ್ ಪಾಡಾದ್, ಮೋವಡ್ ಮಟ್ಟೆಲ್ಡ್ ಕಾತೊಂದು ಬರ್ಪುನಕ್ಲು ನಮ್ಮ ಸಾರಮಾನ್ಯ ದೈವೊಲು. ಅಂಚಿತ್ತಿ ಸಾರಮಾನ್ಯ ಬೂತೋಕುಲೆಡ್ ನೂತ್ರಮಾನಿ ಗಂಡಗನೊಕುಲೆಡ್ ಮೇಲಾಯಿ ಸತ್ಯೊಲು ಒರಿ ಬೆಮ್ಮೆರ್ ಮೂವೆರ್ ಚಿತ್ತೊಲು ಐವೆರ್ ಸತ್ಯೊಲು ಮೆರೆಪಿ ಪುಣ್ಯತ್ತಿ ನಡೆ ಪಟ್ಟೋರಿ.
ಉಳ್ಳಾಲ ತಾಲೂಕು ಸೋಮೇಶ್ವರ ಮಾಗಣೆ ಕೊಣಾಜೆ ಗ್ರಾಮದ ಪಟ್ಟೋರಿ ಪನ್ಪಿ ನೆಲ ಪತ್ತೊಕ್ಕೆಲ್ ಕೂಡಿನ ಧರ್ಮದ ಕಲ. ಆನಾದಿಡ್ ಬಂಗರಸೆರೆ ರಾಜ್ಯ, ಇನವಳ್ಳಿ ಬಲ್ಲಾಳೆರೆ ಅರಸೊತ್ತಿಗೆ, ಇಕ್ಕೇರಿಗ್ ಸಂಬಂಧ ಉಂದು ಮಾತ ತನ್ನ ಇತಿಹಾಸದ ಪುಟೊಕ್ಲೆಡ್ ಜಿಂಜಾವೊಂದು ಬುಲೆದಿನ ಗ್ರಾಮ ಪಟ್ಟೋರಿ. ಇಂಚಿತ್ತಿ ಸತ್ಯದ ಜಾಗೆಗ್ ಒಂಜಿ ಕಾಲೊಡು ಕೂಟಾಜೆ ಜನನಂದ ಬೂಡುದ ಅಪ್ಪೆ ಪಟ್ಟಮ್ಮ ದೈಯ್ಯಾರೆನ(ಉಲ್ಲಾಲ್ದಿ) ಮಗೆ ಕುಮಾರೆ(ಅರಸು ಬಂಟಜಾವದೆ) ತನ್ಕ್ ಪುದರ್ ಪುರಾಪು ಲೆಪ್ಪಾವೊಡುಂದ್ ಮಂಗ್ಳೂರ ಕರ್ತುಲಡೆಗ್ ದಂಡಿಗೆ ಏರೊಂದು ಸಾರ ಬಿರ್ದ್ ಸಾತ್ರ ಮಿನದನಟ್ ಪಿದಡುನ ವೇಳ್ಯ. ಪಡಿಕಲ್ಲ ಅಣೆ, ಧರ್ಮದ ಪಡ್ಪು, ಮರಿ ಪರಪಿ ಪಾದೆ, ಮಲ್ಯಾಲ್ದಿ ಕಾಡ್,ಲಾಡದ ಅಣೆ, ಲಾಡದ ಪಾಂಪು ಕಡತ್ತುದ್ ಪಟ್ಟೋರಿದ ಮಣ್ಣುಗ್ ಪಜ್ಜೆ ದೀವೊಂಡೆರ್. ತಿರ್ತ ಕಲಾಯಿ, ಮಿತ್ತ ಕಲಾಯಿ, ಪಟ್ಟೋರಿ ಕೊಣಾಜೆದ ಬೂಡು, ಕಿಲ್ಲಂಬಳೆ ಜನನ, ಕೋಡಿಬೊಟ್ಟಿ ಸ್ಥಳ ಆವೊಂದು ಬೊಳ್ಮ ಇರ್ಂದಾಲ ಪಟ್ಟ, ಕೋರಿಕಟ್ಟಿ ಪಿಲನವುಲು ಆವೊಂದು ಮಂಗ್ಳೂರ ಕರ್ತುಲಡೆಗ್ ಪೋದು ಬಂಟಾಳ್ವೆ ಪನ್ಪಿ ಪುರಾಪು ಪಡೆಯೆರ್ಂದ್ ಅರಸು ಬಂಟಜಾವದೆಲೆ ಸಂದಿಡ್ ನಮಕ್ ತೆರಿದ್ ಬರ್ಪುಂಡು. ಆತೆ ಅತ್ತಂದೆ ದುಂಬಗ್ ಕಣಂದೂರ ಧರ್ಮರಸು ತೋಡಕುಕ್ಕಿನಾರೆರ್ಲ ಕೂಟಾಜೆ ಅಪ್ಪೆ ಉಲ್ಲಾಲ್ದಿಲ ಪಡ್ಡಾಯಿ ಕಡಲ್ ಮೀಯೊಡುಂದು ಅವ್ವೇ ತಾದಿಡೆ ಬತ್ತುದು ಪಟ್ಟೋರಿದ ಧರ್ಮದ ಮಣ್ಣುಗ್ ಬತ್ತಿನ ಕಥೆಲಾ ಉಂಡು. ಇಂಚ ಮೂಜೂರು ಐನ್ ಗ್ರಾಮೊಡು ಮೂಜಿಪಕ್ಕ ಮೂಲೊಳಿಗೆ ಸ್ಥಳಟ್ ವಳಕ್ಕುಂಜ ಮಾಡ, ಪಡಿಕಲ್ಲ ಮಾಡ, ಬದ್ಯಾರ ಮಾಡ ಕಟ್ಟಾವೊಂದು ಮೆರೆಯಿ ಮೂವೆರ್ ದೈಯ್ಯೊಂಗುಲು ಒರ್ತಿ ಉಲ್ಲಾಲ್ದಿ ಪಟ್ಟೋರಿ ದೈಯ್ಯೆರೆ ಬನೊಟು ನಾಗಬೆಮ್ಮೆರೆ ನಿಲೆಟ್ ಬದಿಮಾಡ ಕಟ್ಟಾವೊಂದು, ಜೋಡು ಲಿಂಗದ ಒರುಟು ಅರಸುಲು ನೆಲೆ ಆವೊನ್ವೆರ್. ಮಿತ್ತ ಉಪ್ಪರಿಗೆಡ್ ಉಲ್ಲಾಲ್ದಿ ಉಜ್ಜಾಲ್ದ್ ತೂಕೊಂದು, ಮೂಡಾಯಿ ಕುಡುಮದ(ಧರ್ಮಸ್ಥಳ) ವಾಕ್ ಪುಂಡಿಪನವು ಪಟ್ಟಪರಕೆ ಇತ್ತುಂಡ ಇಡೆಗೆ ಸಂದಡುಂದ್ ಕಟ್ಟ್ ಮಲ್ತುದ್ ಧರ್ಮಸ್ಥಳದ ಉಜ್ಜಾಲ್ ಪಂದೇ ಪುರಾಪು ಪಡೆಪೆರ್. ಅಂಚೇನೆ ನನ ತನ್ಕ್ ಉಚ್ಚಯ ಆವೊಡು, ಪತಿಮಾಡ ಕಟ್ಟಾವೊಡು ಪಂಡೊಂದು ಕೊಣಾಜೆದ ಬೂಡು, ಪಟ್ಟೋರಿ ಪತ್ತೊಕ್ಕೆಲ್ದ ಮಂದೆಲೆನ್ ಕೂಡಾದ್ ನಾಗಬೆಮ್ಮೆರೆ ಮಾಡ ಇತ್ತಿ ದೈಯ್ಯೆರೆ ಬನತ ಅಡಿನಿರೆಲ್ಡ್ ಪತಿಮಾಡಡ್ ಮುಂಡ್ಯೆ ಪಾಡಾದ್ ನೆತ್ತೆರಚಂದನದ ಮುಗ ದೀಪಾದ್, ತೋಡಾಯಿ ಕೆರೆಟ್ ಕೆರೆನೇಮ ತುಡರಬಲಿ ಕೈಕೊಂದು, ದೈಯ್ಯೆರೆ ಕಂಡೊಡು ಮಾಮಲ್ಲ ಬಿರ್ದುದ ವಲಸರಿ ನೇಮ ಕೈಕೊನ್ವೆರ್ ಅಪ್ಪೆ ಉಲ್ಲಾಲ್ದಿ. ದುಂಬಗ್ ಕಾಲ ಪಿಜಿರೊಂದು ಬನ್ನಗ ಜೋಗಿ ಪುರ್ಸೆರೆ ಬೆರಿಬತ್ತಿ ಒರಿ ಪಟ್ಟೋರಿದಾಯೆ, ಒರಿ ಬಾಲೊಲಿ ದೈವ ಪಿಲ್ಚಂಡಿ, ಪುನ್ಕೆಮಜಲ ಸ್ಥಾನದ ಒರಿ ದೈವ ಮಲರಾಯೆ, ನಟ್ಟಿಲ್ಲ ಜುಮಾದಿ, ಕಲಾಯಿದ ಪಂಜುರ್ಲಿ ಒತ್ತಟಿಗೆ ಆವೊಂದು ಮಿತ್ತ ನಾಗಬೆಮ್ಮೆರ್ ಧರ್ಮರಸುಲೆ ಮಾಡೊದ ಗೋಪುರಡ್ ಕಿನ್ನಿ ಮುಂಡ್ಯೆ ಪಾಡಾದ್ ಅಪ್ಪೆ ಉಲ್ಲಾಲ್ದಿನ ಪ್ರಧಾನಿಲು ಐವೆರ್ ಸತ್ಯೊಲಾದ್ ಮೆರೆಯೊಂದು ಬರ್ಪೆರ್.
ಆಂಡ ಕಾಲಬಂಡಿದ ಚಕ್ರೊ ತರೆನಗ, ಇತ್ತಿ ಕಟ್ಟ್ ಕಬ್ಬೆ ಬೂರೊನ್ನ ವೇಳ್ಯ ಕೂಡುದು ಬರ್ಪುಂಡು. ಅಂದಾಜಿ 490 ವರ್ಸೊದ ಪಿರವುಡು ಕೊಣಾಜೆ ಬೂಡು, ಗ್ರಾಮ ಮನೆತನೊಲೆಡಿತ್ತಿ ಜೈನ ಬಾರಿ ಕರ್ತವೆರೆಗ್ ದಿಕ್ಕ್ ಮುತ್ತುದ್ ದಿಸೆ ಅಲಿದ್ ಪೋನಗ, ಈ ರಾಜ್ಯ ಬುಡ್ದು ಪೋಪಿ ಪೊರ್ತುಡು ದೈಯ್ಯೊಂಗುಲೆ ಭಂಡಾರ ಮುತ್ತುಂಡು, ಮಾಡಡ್ ತುಂಬೆನೆಕ್ಕಿ ಕೊಡಿತ್ದ್ ಅರಾರಿ ಆಂಡು, ಕೆರೆ ಬತ್ತುಂಡು, ನೇಮ ನೆರಿ ಉಂತುದು ಪೋಂಡು. ಅಂಚ ಅರಾರಿ ಆಯಿ ಮಾಡನ್ ಊರು ಕೂಡುದ್ ಎಡ್ಡೆ ಮಲ್ತೊಂದು ನಿಚ್ಚ ಬೊಲ್ಪು ಅರ್ಲಾವೊಂದು, ದರ್ಪಣ ಬಿಂಬಡ್ ಉಲ್ಲಾಲ್ದಿನ ಆರಾಧನೆ ಮಲ್ಪುವೆರ್. ಆಂಡ ಉಲ್ಲಾಲ್ದಿ ಅಪ್ಪೆನ ಮೆಚ್ಚಿ ನೇಮದ ಕಟ್ಟ್ ಅಂಚೆನೇ ಒರಿದ್ ಪೋಪುಂಡು. ಗ್ರಾಮಗ್ ಆ ವೇಳ್ಯಡ್ ಅಧಿಕಾರದ ರಾಜನ್ ದೈವ ಆದ್ ಮೆರೆದ್ ಬರ್ಪಿನ ಸತ್ಯ ಪಟ್ಟೋರಿದಾಯಗ್ ಕಾಲಾದಿದ ಬೊಟ್ಟೆದಾಯನ ಸಾನದಾಯನ ಗ್ರಾಮ ಕೂಡುದು ಗರ್ದುಡೇ ನಡಪುಂಡು. ಬೀರಿ ಪೋತಿ ಗುಡ್ಡೆಡ್ ಪೊತ್ತು ಪೋತಿ ಕುತ್ತಿದಂಚ ಇತ್ತಿ ನೆಲೆ ಆಂಡಲಾ ಪಟ್ಟೋರಿದ ಮಂದೆಲು ಚಿತ್ತೊಲ್ನ ಗುರ್ತ ಮದತಿಜೆರ್. ದೈಯ್ಯೆರೆ ಬನ, ದೈಯ್ಯೆರೆ ಕಾಡ್ ಪಂಡುದು ಪ್ರಕೃತಿದ ನಡುವರ ಮೂವೆರೆ ಆರಾಧನೆ ನಡಪಾವೊಂದೆ ಬತ್ತೆರ್. ಅಂಚಾದೆ ಕುಡ ಒರ ತನ್ನ ಐಸ್ರೊನು ನೆಗಪಾಯೆರೆ ಎಚ್ಚನಿಪ್ವೆರ್ ಅಪ್ಪೆ ಉಲ್ಲಾಲ್ದಿ. ಆ ನಿಟ್ಟುಡೇ ಈ ವರ್ಷಗ್ 800 ವರ್ಷದ ಇತಿಹಾಸ ಇತ್ತಿ ಈ ಪಟ್ಟೋರಿದ ಮಾಡೊಡು 490 ವರ್ಷ ಕರಿದ್ ಈ ಮಾಮಲ್ಲ ಸುವರ್ಣ ಘಳಿಗೆನ್ ತೂವರೆಗ್ ನಂಕ್ ಮಾತ ಭಾಗ್ಯ ಒದಗುದ್ ಬೈದ್ಂಡ್.
ಅಲವೊಲಿ ಪಂಚಾಂಗ ಬಲ್ಯಾಯ ಪ್ರಶ್ನಾ ಚಿಂತನೆಡ್ ಸತ್ಯ ದೈಯ್ಯೊಂಗುಲು ಅಪ್ಪೆ ಉಲ್ಲಾಲ್ದಿನ ಮಾಡದ ಗತಕಾಲದ ಆರಾಧನೆ ಕುಡ ನೆಗತುದ್ ಗರ್ದುಡ್ ನೇಮನೆರಿ ನಡಪೊಡುಂದು ತೋಜಿದ್ ಬರ್ಪುಂಡು. ಅಂಚ ಗ್ರಾಮ ಪ್ರಮುಖೆರ್, ಕ್ಷೇತ್ರದ ತಂತ್ರಿದಾರ್, ಕೊಣಾಜೆ ಬೂಡು, ಪಟ್ಟೋರಿ ಪತ್ತ್ ವರ್ಗ ಮನೆತನೊಲು, ಊರ ಪರವೂರ ಮಂದೆಲೆನ ಕೂಡುವಿಕೆಡ್ ಮಾಮಲ್ಲ ವೈಭವಡ್ ಅಪ್ಪೆ ಉಲ್ಲಾಲ್ದಿವ ಪೊರ್ಲ ಮಾಡೊಡು ಪೊಸಮುಗ ಕಿರುವಾಳ್ ಭಂಡಾರ ಮಲ್ಪಾವೊಂದು, ಇನಿವರ ಮುಟ್ಟ ಕಣ್ಣಾರೆ ತೂವಂದಿನ ಕೆಬಿಯಾರೆ ಕೇನಂದಿನಂಚಿತ್ತಿ ಧರ್ಮನಡಾವಳಿ ಉಚ್ಚಯ ನಡಪೊಡುಂದು ದುಂಬಾಂಡೆರ್. ಅಂಚಾದೆ ತಂತ್ರಿಲು ದೀಯಿ ದಿನಮಾನ ಪ್ರಕಾರ ಮಾರ್ಚ್ ತಿಂಗೊಲುದ 17-18 ತಾರೀಕುಗ್ ಈ ಪುಣ್ಯ ಕಜ್ಜ ನಡಪೊಡುಂದು ಊರು ಸೇರ್ದ್ ನಿಚ್ಚಯ ಮಲ್ಪುವೆರ್.ಅಂಚ ಮಾರ್ಚ್ 16ಕ್ ಪುದೆಕಾಣಿಕೆ ಮೆರೆವಣಿಗೆ, 17ಕ್ ಚಿತ್ತೊಲೆ ಪೊಸ ಭಂಡಾರ ಪ್ರತಿಷ್ಠೆ, ಬೂತ ನಾಗನ ಪ್ರತಿಷ್ಠೆ, ಚಿತ್ತೊಲೆ ಕಲಶ ತಂಬಿಲ. 18ಗ್ ಕಲ್ತೆಗ್ ಭಂಡಾರ ಏರ್ದ್ ಮಧ್ಯಾಹ್ನ ಧರ್ಮರಸುಲೆ ನೇಮ, ರಾತ್ರೆ ಬಂಟಜಾವದೆ ಅರಸುಲೆ ನೇಮ ಆದ್ ಅಪ್ಪೆ ಉಲ್ಲಾಲ್ದಿನ ವಿಶೇಷ ಕೆರೆನೇಮ, ವಲಸರಿ ಉಚ್ಚಯ ನಡಪರೆ ಉಂಡು .
ಮಲ್ಲಿಗೆದ ಪೂಮುಡಿಟ್ ಬೊಲ್ಲಿನ್ನ ಮುಗ ಏರೊಂದು, ಕೈಟ್ ಮೆಂಚಿನ್ನ ತೂಟೆ ಪತೊಂದು, ಕಂಚಿನ್ನ ಜೀಟಿಗೆದ ಬೊಲ್ಪುಡು, ರಾಜಾಂಗಣೊಡು ಪಾಡಿ ದೊಂಪಂದ ಐನ್ ನಿಲೆತ ಸಿಂಗದನೆತ ಎದುರಪ್ಪ ಜೋಗಡಾವೊಂದು, ಪತ್ತೊಕ್ಕೆಲ್ ರಾಜ್ಯನ್ ದಿಬ್ಬಾನ ಮಲ್ತೊಂದು, ಉಲ್ಲಾಲ್ದಿ ವಲಸರಿ ಕೈಕೊಂದು, ತೋಡಾಯಿ ಸುದ್ದದ ಕೆರೆಟ್ ಪಂಚಸುತ್ತುದ ಪೊರ್ಲುನು ಕೈಕೊಂದು ದರಿತುಡರ ಐಸ್ರಡ್ ಮೆನ್ಕೊಂದು, ನಡಿರ್ಲ ಜಾಮೊಡುಲ ನೇಸರನಂಚ ಗಮನಿತೊನ್ನ ಅಪ್ಪೆ ಉಲ್ಲಾಲ್ದಿನ ಪೊರ್ಲು ತೂಯರೆ ಸಾರಕಣ್ಣ್ ಇತ್ತುಂಡಲ ಯಾವಂದ್.. ಬಲೆ ಈ ಅಪ್ಪೆನ ಮಾಮಲ್ಲ ವೈಭವದ, ಬಲು ಅಪರೂಪದ 490 ವರ್ಷ ಕರಿದ್ ನಡಪಿ ಈ ಧರ್ಮನಡಾವಳಿನ್ ಕಣ್ಣಾರೆ ತೂದು, ಚಿತ್ತೊಲೆನ್ ಉಡಲಾರೆ ನೆನೆತೊಂದು, ಸಿರಿಮುಡಿತ ಗಂದ ಪುರ್ಸಾದ ಪಡೆಯೊನೆರೆ ಈ ಪಟ್ಟೋರಿದ ಮಣ್ಣುಗ್ ಬತ್ತ್ ಸೇರೊನುಗ..
ಮಾತೆರೆಗ್ಲ ಮೋಕೆದಿಂಜಿ ಲೆಪ್ಪೋಲೆ🙏✨
ವಿಜೇತ್ ಎಂ. ಶೆಟ್ಟಿ ಮಂಜನಾಡಿ.
