ಪುತ್ತೂರು: “ಅಶೋಕ್ ರೈಕುಲೇ ಇಲ್ಲ್ ಪೊಡಿ ಮಲ್ಪಾದಿನ ಈರೇ, ಈರೆಗ್ ಧಿಕ್ಕಾರ” – ವಿಧಾನ ಪರಿಷತ್ ಪದುಕೆ ಕಿಶೋರ್ ಕುಮಾರ್

Last updated on February 6th, 2025 at 08:01 am

ಪುತ್ತೂರು: ಪುತ್ತೂರುಡ್ ಇತ್ತೆ ಕಾಂಗ್ರೇಸ್ ಶಾಸಕೆರ್ ಗೂಂಡಾ ರಾಜಕಾರಣ ಮಲ್ತೊಂದುಲ್ಲೆರ್ ಪನ್ದ್ ಪುತ್ತೂರುಡ್ ವಿಧಾನ ಪರಿಷತ್ ಪದುಕೆ ಕಿಶೋರ್ ಕುಮಾರ್ ಪುತ್ತೂರು
ಆರೋಪ ಮಲ್ದೆರ್. ಬಿಜೆಪಿ ಮುಖಂಡೆ ರಾಜೇಶ್ ಬನ್ನೂರು ಮೆರೆನ ಇಲ್ಲ್ ಪೊಡಿ ಮಲ್ತಿನ ವಿಚಾರೊಗು ಸಂಬಂಧಿತ್‌ದ್ ಮಾಧ್ಯಮೊಲೆಡ ಪಾತೆರ್ನ ಆರ್ ಪುತ್ತೂರ್‌ಡ್ ಕರಿನ 20 ವರ್ಸೊಗು ದುಂಬು ಗೂಂಡಾ ರಾಜಕಾರಣ ಇತ್ತ್ಂಡ್, ಆಂಡ ಇತ್ತೆ ಕಾಂಗ್ರೆಸ್ ಅಧಿಕಾರೊಗು ಬತ್ತಿ ಬೊಕ್ಕ ಪುತ್ತೂರ್‌ಡ್ ಕಾಂಗ್ರೆಸ್ ಶಾಸಕೆ ಕುಡ ಗೂಂಡಾ ರಾಜಕಾರಣ ಸುರು ಮಲ್ದೆರ್ ಪನ್ದ್ ಪನ್ಡೆರ್.

ಬುಲೆಚ್ಚಿಲ್‌ದ ವಿಚಾರೊಡು ಬಿಜೆಪಿ ಏಪೊಲಾ ಅಡ್ಡ ಬರ್ಪುಜಿ, ಆಂಡ ಮೊಕುಲು ನಡತೊಂಡಿನ ರೀತಿ ಸಮ ಇಜ್ಜಿ, ರಾಜೇಶ್ ಬನ್ನೂರು ಮೆರೆನ ಇಲ್ಲ್‌ನ್ ಅಕ್ರಮವಾದ್ ಧ್ವಂಸ ಮಲ್ದೆರ್. ಮೋನೆಗ್ ಕುಂಟು ಮುಚೊಂದು ಬತ್ತಿನಕುಲು ರಾಜೇಶ್ ಬನ್ನೂರ್‌ರೆನ್ ಬಲವಂತವಾದ್ ಪತೊಂದು ಇಲ್ಲ್‌ನ್ ಪೊಡಿ ಮಲ್ದೆರ್, ಅತ್ತಂದೆ ಈ ಪೊರ್ತುಡು ಸುಮಾರ್ ನಾಲ್ ನಾಯಿದ ಕಿನ್ನಿಲೆನ್ ಮಣ್ಣ್‌ದಡಿಕ್ ಪಾಡ್ದ್ ಕೆರ್ತೆರ್ ಪನ್ದ್ ಆರೋಪ ಮಲ್ದೆರ್. ಶಾಸಕೆ ಅಶೋಕ್ ರೈ ಮಾನವೀಯತೆದಾಂತಿಲೆಕ ನಡತೊಂದುಲ್ಲೆರ್ ಪನ್ದ್ ಪಿನ್ಪಿಜ್ಜಂಡ್, ಅಶೋಕ್ ರೈಕ್ಲೆನ ಮಿತ್ತ್ ಇತ್ತಿನ ಗೌರವ ಇನಿಕ್ ಮುಗಿದ್ ಪೋಂಡು ಪನ್ದ್ ಪನ್ಡೆರ್.

ಎಂಕ್ಲೆನ ಸರ್ಕಾರೊದ ಪೊರ್ತುಡು ಮಾಜಿ ಶಾಸಕೆ ಸಂಜೀವ ಮಠಂದೂರು ಮಲ್ದಿನ ಬೇಲೆಲೆನ್ ಅಶೋಕ್ ರೈ ಮಲ್ದಿನ ಪನ್ದ್ ಪನೊಂದು ತಿರ್ಗೊಂದುಲ್ಲರ್, ಮಿತ್ತರ್ಮೆಡ್ ಬೋಡಾಯಿಲೆಕ ಪಾತೆರುವರ್, ಅಶೋಕ್ ರೈಕುಲೇ ಈರೆಗ್ ದಾದ ಆತ್ಂಡ್? ದೇಬೆರೆಡ ಅಶೋಕ್ ರೈಕುಲು ಸಮ ಆವಡ್ ಪನ್ದ್ ನಟ್ಟೊನುವೆ, ಈರೆರ್ದ್ ದುಂಬುದಕ್ಲೆಗ್ ಬುದ್ಧಿ ಕಲ್ಪಾದ, ಈರೆಗ್ ಬುದ್ಧಿ ಕಲ್ಪಾಯೆರ ಎಂಕ್ಲೆರ್ದ್ ಬಲ್ಲಿಯಾ? ಪನ್ದ್ ಎಚ್ಚರಿತೆರ್. ಅಶೋಕ್ ರೈಕುಲೇ ಇಲ್ಲ್ ಪೊಡಿ ಮಲ್ಪಾದಿನ ಈರೇ, ಅಶೋಕ್ ರೈಕುಲೇ ಈರೆಗ್ ಧಿಕ್ಕಾರ ಪನ್ದ್ ಪುತ್ತೂರುಡು ವಿಧಾನ ಪರಿಷತ್ ಪದುಕೆ ಕಿಶೋರ್ ಪುತ್ತೂರು ಪನ್ಡೆರ್.