Last updated on March 3rd, 2025 at 06:30 pm
ಅಪ್ಪೆಬಾಸೆ ಪನ್ಪಿನವು ಪ್ರತಿಯೊರಿ ವ್ಯಕ್ತಿ ಸುರೂಕು ಕಲ್ಪುನ, ಪಾತೆರುನ ಬಾಸೆ. ಪ್ರತೀ ಬಾಲೆದ ಸಾಮಾನ್ಯ ಪಾತೆರ, ಕಲ್ಪಟಿಗೆ ತೊಡಂಗುನ ಅಪ್ಪೆ ಬಾಸೆದ ಮುಕೇನನೇ ಆದುಪ್ಪುಂಡು. ಆಂಡ ಲೋಕೊದ ಶೇಕಡಾ 40 ದಾತ್ ಜನೊಕುಲು ತನ್ಕುಲು ಪಾತೆರುನ, ಅರ್ಥ ಮಲ್ತೊನುನ ಅಪ್ಪೆಬಾಸೆಡ್ ಶಿಕ್ಷಣ ಕಲ್ಪೆರ ಆವೊಂದಿಜ್ಜಿ ಪನ್ದ್ ಯುನೆಸ್ಕೋದ ಜಾಗತಿಕ ಶಿಕ್ಷಣ ನಿರ್ವಹಣಾ ಕೂಟ ಪನ್ತ್ಂಡ್.
ಪಾಕ ದೇಶೊಲೆಡ್ ಅಪ್ಪೆಬಾಸೆಡ್ ಶಿಕ್ಷಣೊದ ಬಗೆಟ್ ಅರಿಮೆ ಬೊಕ್ಕ ಜಾಗೃತಿ ಕಾರ್ಯಕ್ರಮೊಲು ಎಚ್ಚ ಆವೊಂದಿತ್ತ್ಂಡಲಾ ಉಂದೆಕ್ ಸಂಬಂಧಿತ್‌ದ್ ಒವ್ವೇ ರೀತಿದ ನೀತಿ ನೇಮೊಲು ಜಾರಿ ಆತಿನ ಕಾಲಿ ಲೆಕ್ಕೊದ ದೇಶೊಲೆಡ್ ಮಾತ್ರ.
ಜಗತ್ತ್‌ಡ್ ಸುಮಾರ್ 25 ಕೋಟಿ ಜನ ಅಪ್ಪೆಬಾಸೆಡ್ ಶಿಕ್ಷಣೊದ ಕುದೆಲ್‌ಡ್ ಉಲ್ಲೆರ್. ಅವೆಟ್ಲಾ ಕೆಲ ಕಮ್ಮಿ ಬೊಕ್ಕ ಮಧ್ಯಮ ಪ್ರಮಾಣೊದ ಆದಾಯ ಇಪ್ಪುನ ದೇಶೊಲೆಡ್ ಅಪ್ಪೆಬಾಸೆಡ್ ಶಿಕ್ಷಣೊದ ಕುಂದೆಲ್ ಶೇಕಡಾ 90 ಮುಟ್ಟಲಾ ಉಲ್ಲ. ಅಂಚಾದ್ ಮಾತೆರೆಗ್ಲಾ ಪ್ರೇಜನ ಆಪಿನಂಚಿನ ಶಿಕ್ಷಣ ವ್ಯವಸ್ಥೆನ್ ಉಂಡು ಮನ್ಪುನ ಈಡ್‌ದೊಟ್ಟುಗು ಬಹುಭಾಷಾ ನೀತಿ ಬೊಕ್ಕ ಪದ್ಧತಿನ್ ಜಾರಿಗ್ ಕನವೊಡು ಪಂದ್ ಈ ಕೂಟ ಶಿಫಾರಸ್ ಮಲ್ದ್ಂಡ್. 25ನೇ ವರ್ಸೊದ ಅಂತರಾಷ್ಟ್ರೀಯ ಅಪ್ಪೆಬಾಸೆ ದಿನೊತಾನಿ ಬುಡುಗಡೆ ಮಲ್ದಿನ ವರದಿಡ್ ಈ ಅಂಶೊನು ವಿವರಿತ್‌ದೆರ್.
ಭಾರತೊಡು ತುಳುವೆರೆಗ್, ತುಳುವ ಜೋಕುಲೆಗ್ ಅಪ್ಪೆಬಾಸೆ ತುಳುಟು ಶಿಕ್ಷಣ ನನಲಾ ಕನ ಆದುಂಡು. ವರ್ಸ ವರ್ಸ ಪೊಸ ಪೊಸ ಕಾನೂನು ಕನತ್‌ದ್ ಕನ್ನಡೊದ ಪುದೆ ತುಂಬಾವುನ ಸರ್ಕಾರ ಇಪ್ಪುನೇಟ ಈ ಕನ ಕನ ಆದೇ ಒರಿವ ದಾನ್ನ. ಇತ್ತೆ ನಿಕ್ಲೆನ ಅಪ್ಪೆಬಾಸೆ ಒವ್ವು ಕೇನ್ಡ ಅವೇತ್ ತುಳುವೆರ್ ಕನ್ನಡ ಪನ್ಪೆರಾ ದಾನ್ನ! ನನ ಆಂಡಲಾ ತುಳುವ ಅಪ್ಪೆಅಮ್ಮೆ ಲಕ್ಕೊನೊಡು ಶಾಲೆಡ್ ಎಂಚಲಾ ಇಜ್ಜಿ, ಇಲ್ಲಡ್ ಆಂಡಲಾ ತನ್ಕುಲೆ ಜೋಕುಲೆಡ ತುಳುಟು ಪಾತೆರ್ದ್, ಬರ್ಪೀನ ತರೆಮಾರ್‌ಗ್ ತುಳುತ ತಿಗತ ನೆಯಿತ ಸೆಬಿ ತಿಕ್ಕುಲೆಕ ಮನ್ಪೊಡು.