Last updated on March 21st, 2025 at 11:34 am
ಉಬಾರ್, ಮಾ. 21: 34ನೇ ನೆಕ್ಕಿಲಾಡಿಡ್ ಇತ್ತಿನ ಬಿಹಾರ ಮೂಲೊದ ಕಾರ್ಮಿಕೆರೆ ಮಿತ್ತ್ ಹೋಳಿ ಪರ್ಬದಾನಿ ಒಂಜಿ ಕೂಟದಕ್ಲು ಹಲ್ಲೆ ಮಲ್ದಿನ ನಡಕೆ ಕಡೆಸ್ಸ್‌ದ್ ಬೊಲ್ಪುಗು ಬೈದ್ಂಡ್. ಪೆಟ್ಟ್ ತಿನ್ತಿನ ಕಾರ್ಮಿಕೆರ್ ಇಲ್ಲ್ ಬುಡ್ದ್ ಪೋತಿನೆರ್ದಾವರ ಅಕ್ಲೆನೇ ನಂಬುದು ನಡತೊಂದಿತ್ತಿನ ಬೇಲೆಲು ಅಲಕ್ಕ ಉಂತುದು ಪೋತ.
34ನೇ ನೆಕ್ಕಿಲಾಡಿ ಗ್ರಾಮೊಡು ಇತ್ತಿನ ಸುಮಾರು 40ರ್ದ್‌ಲಾ ಎಚ್ಚ ಬಿಹಾರ ಮೂಲೊದ ಕಾರ್ಮಿಕೆರ್ ಕರಿನ ಶುಕ್ರವಾರ ಹೋಳಿ ಪರ್ಬ ಕರಿತೊಂದಿತ್ತೆರ್. ಈ ಪೊರ್ತುಡು ಅವೆಟ್ ಒಂತೆ ಜನ ಮದರಸರ್ದ್ ಬರೊಂದಿತ್ತಿನ ಇರ್ವೆರ್ ಆಣುಲೆಗ್ బణ్ణ ಪೂಜಿದೆರ್ ಪನ್ಪಿನ ನೆವನೊಗು ಒಂಜಿ ಕೂಟದಕ್ಲು ಕಾರ್ಮಿಕೆರ್ ಇತ್ತಿನಡೆ ಬತ್ತ್‌ದ್ ದಾಳಿ ಮಲ್ತ್‌ದ್, ಅಲ್ಪ ಹೋಳಿದ ಗಮ್ಮತ್‌ಡ್ ಇತ್ತಿನಕ್ಲೆಗ್ ತಾರಾಮರ ಆಕ್‌ದೆರ್ ಪನ್ದ್ ಆರೋಪ ಕೇನ್ದ್ ಬೈದ್ಂಡ್.
ಪೆಟ್ಟ್ ತಿನ್ದ್‌ದ್ ಬಲ್ತಿನ ಕಾರ್ಮಿಕೆರ್ ದೂರ ಪೋತೆರ್ ಪನ್ದ್ ತೆರಿದ್ ಬೈದಿಜಿ. ಕಾರ್ಮಿಕೆರ್ ತನ್ಕುಲೆ ಇಲ್ಲಡ್ ಪರ್ಬೊಗು ಮಲ್ದಿನ ವನಸ್ ತೆನಸ್ ಮಾತಾ ಇಡೀಕ ಬೂರ್ದಿತ್ತ್‌ದ್, ಕಾರ್ಮಿಕೆರೆಗ್ ಪರ್ಬದ ವನಸ್ ಮನ್ಪೆರಲಾ ಬುಡ್ತುಜೆರ್ ಪನ್ದ್ ಆರೋಪ ಉಂಡು. ಈ ಹಲ್ಲೆ ಮಲ್ದಿನಕುಲು ಉತ್ತರ ಭಾರತೀಯೆರೆ ಮಿತ್ತ್ ನನಲ ಹಲ್ಲೆ ಮಲ್ಪುನ ಪೋಡಿಗೆಡ್ ಬೇತೆ ಉಬಾರ್‌ದ ಸುತ್ತ ಮುತ್ತ ಇತ್ತಿನ ಕಾರ್ಮಿಕೆರ್‌ಲಾ ಮಾತಾ ಬುಡ್ದು ಪೋತೆರ್‌ಗೆ. ಹಲ್ಲೆ ಮಲ್ತಿನಕ್ಲೆನ ಮಿತ್ತ್ ಸಾರ್ವಜನಿಕೆರ್ ಅಸಮಾಧಾನ ತೂಪಾದೆರ್. ಕಾಂಕ್ರೀಟ್, ಕಟ್ವಾನ ಬೇಲೆ ಸೇರ್ದ್ ಬೇತೆ ಬಂಙೊದ ಬೇಲೆಲೆಗ್ ಊರ್ದಕಲೆರ್ದ್ ಕಮ್ಮಿ ಸಂಬಲೊಗು ಬೆನೊಂದಿತ್ತಿನ ಈ ಕಾರ್ಮಿಕೆರೆನ್ ನಂಬುದಿತ್ತಿನ ಕೆಲ ಬೇಲೆಲು ಇತ್ತೆ ನಡತೊಂದಿಜ್ಜ.
ಈ ಲಡಯಿನ್ ಪೋಲೀಸೆರ್ ಬತ್ತ್‌ದ್ ಬುಡ್ಪದಿತ್ತೆರ್ನ್ಡಲಾ, ಏರ್ಲಾ ಇದಮುಟ್ಟ ಒಯಿಲ್ ಬರೆಪಾದಿಜೆರ್ ಪನ್ದ್ ಪನ್ತೆರ್.