ತುಳುಭಾಷೆನ್ ರಾಜ್ಯೊದ ರಡ್ಡನೇ ಅಧಿಕೃತ ಭಾಷೆ ಮನ್ಪುನ ಬಗೆಟ್ ಆಂಧ್ರ ಪ್ರದೇಶೊದ ಅಧ್ಯಯನೊಗು ಅಧಿಕಾರಿನ್ ನೇಮಕ ಮಲ್ತಿನ ಸರ್ಕಾರ

Last updated on March 26th, 2025 at 04:28 pm

ಬೆಂಗಳೂರು: ತುಳು ಭಾಷೆನ್ ಕರ್ನಾಟಕ ರಾಜ್ಯೊಡು ಅಧಿಕೃತ ಭಾಷೆ ಮನ್ಪೊಡು ಪನ್ಪಿನ ಬುಲಿಪು ಇನಿ ಕೋಡೆದ ಅತ್ತ್. ಕರ್ನಾಟಕ ರಾಜ್ಯೊಗು ತುಳುನಾಡ್‌ದ ಒಂಜಿ ಭೂಭಾಗೊನು ಗೋಡ್ಯಾಯಿನಾನಿರ್ದ್ ಇನಿ ಮುಟ್ಟಲಾ ತುಳುವೆರ್ ಕೇನ್ಡೊಂನ್ದೇ ಬರೊಂದುಪ್ಪುನ ವಿಷಯ ಉಂದು. ಇಂಚಿಪ್ಪೊದ ದಿನೊಟು ತುಳು ಭಾಷೆಗ್ ಮಾನ್ಯತೆ ಕೊರ್ಪಿನ ಬಗೆಟ್ ಎಚ್ಚಿನ ರಾಜಕಾರಣಿಲು ಪ್ರತೀ ಅಧಿವೇಶನೊಡು ಪಾತೆರೊಂದುಪ್ಪುನವು ಎಡ್ಡೆ ಸಂಗತಿ. ಪ್ರತಿ ಸರ್ತಿಲಾ ‘ಪರಿಶೀಲನೆ ಮಾಡುತ್ತೇವೆ’ ಪನೊಂದಿತ್ತಿನ ಸರ್ಕಾರ ಈ ಸರ್ತಿ ‘ಅಧ್ಯಯನ’ ಗ್ ಬೇತೆ ರಾಜ್ಯೊಗು ಅಧಿಕಾರಿನ್ ಕಡಪುಡ್ಯೆರ ಪಿದಡ್ದ್ಂಡ್. ಆ ಪ್ರಕಾರೊಡು ಒರಿ ಅಧಿಕಾರಿನ್ ನೇಮಕಲಾ ಮಲ್ದ್ಂಡ್.

ರಾಜ್ಯೊಡು ತುಳು ಭಾಷೆನ್ ರಡ್ಡನೇ ಅಧಿಕೃತ ಭಾಷೆ ಆದ್ ಘೋಷಣೆ ಮಲ್ಪುನ ಬಗೆಟ್ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆ, ಸಿಬ್ಬಂದಿ ಬೊಕ್ಕ ಆಳ್ಮೆ ಸುಧಾರಣೆ ಇಲಾಖೆ ಅಂಚೆನೇ ಕಾನೂನು ಇಲಾಖೆದ ಅಧಿಕಾರಿಲು ಇತ್ತಿನ ಕೂಟೊನು ಆಂಧ್ರ ಪ್ರದೇಶ ರಾಜ್ಯೊಗು ನಿಯೋಜನೆ ಮನ್ಪೆರ ಸರ್ಕಾರೊದ ಎದುರು ಪ್ರಸ್ತಾವನೆ ಬತ್ತಿತ್ತ್ಂಡ್. ಆ ಪ್ರಸ್ತಾವನೆನ್ ಪರಿಶೀಲನೆ ಮಲ್ತಿನ ಸರ್ಕಾರ ಈ ಅಧ್ಯಯನ ಕೂಟೊಗು ಸಿಬ್ಬಂದಿ ಬೊಕ್ಕ ಆಳ್ಮೆ ಸುಧಾರಣೆ ಇಲಾಖೆರ್ದ್ ಸರ್ಕಾರೊದ ಜಂಟಿ ಕಾರ್ಯದರ್ಶಿ ಆದುಪ್ಪುನ ಶ್ರೀ ಚಂದ್ರಶೇಖರ್ ಬಿ ಎಂ ಮೆರೆನ್ ನೇಮಕ ಮಲ್ತ್ ಆದೇಶ ಕೊರ್ತುಂಡು.