Last updated on March 12th, 2025 at 07:29 pm
ಬೆಂಗಳೂರು, ಮಾ.12: ಅಪ್ಪೆ-ಅಮ್ಮನ ಅಂಚೆನೇ ಪೆರಿಯಕ್ಲೆನ ಆರೈಕೆ ಮಲ್ತಿಜಿಂಡ, ತನ್ನ ಜೋಕುಲೆಗ್ ಅತ್ತ್ಂಡ ಸಂಬಂಧಿಕೆರೆಗ್ ಅಕುಲು ಬರೆತಿನ ವಿಲ್ ಅತ್ತ್ಂಡ ದಾನಪತ್ರೊನು ಕ್ಯಾನ್ಸಲ್ ಮನ್ಪುನ ಅವಕಾಶೊನು ಕೇಂದ್ರ ಸರ್ಕಾರೊದ ಪೋಷಕ ಬೊಕ್ಕ ಪೆರಿಯ ನಾಗರಿಕೆರೆ ನಿರ್ವಹಣೆ ಬೊಕ್ಕ ಕಲ್ಯಾಣ ಕಾಯ್ದೆ 2007 ಕೊರ್ತುಂಡು ಪನ್ದ್ ಸಚಿವೆ ಕೃಷ್ಣ ಬೈರೇಗೌಡೆ ತೆರಿಪಾದೆರ್.
ಈ ಬಗೆಟ್ ವಿಧಾನ ಪರಿಷತ್‌ಡ್ ಪಾತೆರ್ನ ಆರ್, ಇಂಚಿಪ್ಪೊದ ದಿನೊಟು ಜೋಕುಲು ತನ್ಕುಲೆ ಅಪ್ಪೆ-ಅಮ್ಮನೇ ತೂವೊನಂದಿನ ಪಾಕ ಪ್ರಕರಣೊಲು ತೂಯೆರ ತಿಕ್ಕ್‌ದ. ಓಲ್ಲಾ ಜೋಕುಲು ಅತ್ತ್ಂಡ ಸಂಬಂಧಿಕೆರ್ ತನ್ಕುಲೆ ಆರೈಕೆ ಮಲ್ತಿಜೆರ್ನ್ಡ ಅಕ್ಲೆನ ಪುದರ್‌ಗ್ ಬರೆತಿನ ವಿಲ್ ಅತ್ತ್ಂಡ ದಾನಪತ್ರೊನು ಕ್ಯಾನ್ಸಲ್ ಮನ್ಪುನ ಅಧಿಕಾರ ಪೆರಿಯ ನಾಗರಿಕೆರೆಗ್ ಉಂಡು ಪನ್ದ್ ಪನ್ಡೆರ್.
2007 ರ್ದೇ ಈ ಕಾನೂನು ಉಂಡು. ಆಂಡ ಎಚ್ಚಿನಕ್ಲೆನ್ ಅವೆತ ಬಗೆಟ್ ತೆರಿದಿಜಿ. ಆಂಚಾದ್ ಈ ಕಾಯ್ದೆದ ಬಗೆಟ್ ಪನೊಂದುಲ್ಲೆ. ಈ ಕಾಯ್ದೆದ ಪ್ರಕಾರ ಜೋಕುಲು ಬೊಕ್ಕ ಸಂಬಂಧಿಕೆರ್ ಪೆರಿಯ ನಾಗರಿಕೆರೆನ ಆರೈಕೆ ಮನ್ಪೊಡು, ಮರ್ದ್‌ದ ಕರ್ಚಿಗ್ ಕಾಸ್ ಕೊರೊಡು. ಓಲ್ಲಾ ಆರೈಕೆ ಮಲ್ತಿಜೆರ್ನ್ಡ, ಕಾಸ್ ಕೊರ್ಜೆರ್ನ್ಡ ಸೆಕ್ಷನ್ 9 ದ ಪ್ರಕಾರ ಒಯಿಲ್ ಬರೆಪಾವೊಲಿ ಪನ್ದ್ ಪನ್ಡೆರ್.