Last updated on March 8th, 2025 at 03:30 pm
ಕುಂದಾಪುರ, ಮಾ.08: ಅಕ್ರಮವಾದ್ ಪೆತ್ತೊದ ಕಂಜಿನ್ ಕೊನೊವೊಂದಿತ್ತಿನ ಕಾರ್ ಒಂಜಿ ಪಿಕಪ್‌ಗ್ ಎಡ್ತ್‌ದಿತ್ತ್‌ದ್, ಪೋಡಿದ್ ಕಾರ್‌ನ್ ನಡುರೋಡ್‌ಡ್ ಬುಡ್ದು ಪದ್ರಾಡಾತಿನ ಆರೋಪಿಲೆನ್ ಪೊಲೀಸೆರ್ ಪತ್ತ್‌ದಿನ ನಡಕೆ ಗಂಗೊಳ್ಳಿ ಪೊಲೀಸ್ ಸ್ಟೇಶನ್ ಸೀಮೆದ ಗುಡ್ಡಮ್ಮಾಡಿ ಕ್ರಾಸ್ ದಲ್ಪ ನಡತ್‌ದ್ಂಡ್.
ಕೈದಾತಿನ ಆರೋಪಿಲೆನ್ ಭಟ್ಕಳ ಗುಲ್ಮಿ ನಿವಾಸಿ ಮುಹಮ್ಮದ್ ಅಬೀದ್ (18), ಮೂಡುಗೋಪಾಡಿ ನಿವಾಸಿ ಮುಹಮ್ಮದ್ ಅಬಾನ್ ಅಲಿಯಾಸ್ ಕಾಕಿ ಮಿಂಡಾ (19) ಬೊಕ್ಕ ಗುಲ್ವಾಡಿ ನಿವಾಸಿ ಮೊಹಮ್ಮದ್ ಶಿನಾನ್ ಅಲಿಯಾಸ್ ಚಿನ್ನು (19) ಪನ್ದ್ ಗುರ್ತ ಪತ್ತ್‌ದೆರ್. ಕುಡೊರಿ ಆರೋಪಿ ತೌಹೀದ್ ಸುದೆಕ್ ಲಾಗಿದ್ ಪದ್ರಾಡಾತೆ. ಬಂಟ್ವಾಡಿರ್ದ್ ಆಲೂರು ದಂಚಿ ಪೋವೊಂದಿತ್ತಿನ ಪಿಕಪ್‌ಗ್ ಎದುರುರ್ದ್ ಬತ್ತಿನ ಸ್ವಿಫ್ಟ್ ಕಾರ್ ಎಡ್ತ್‌ದ್ಂಡ್. ಪರಿಶೀಲನೆ ಮನ್ಪುನಗ ಕಾರ್‌ಡ್ ಅಕ್ರಮವಾದ್ ಬೋರಿ ಕಂಜಿ ಒಂಜೆನ್ ಕೊನೊವೊಂದುಪ್ಪುನ ತೋಜಿದ್ ಬೈದ್ಂಡ್.
ಎಡ್ತ್‌ದ್ ಬೊಲ್ಚಿನ ಆರೋಪಿಲು ಕಾರ್‌ನ್ ನಡು ರೋಡ್‌ಡೇ ಬುಡ್ದು ಸೌಪರ್ಣಿಕಾ ಸುದೆಕ್ ಲಾಗಿದ್ ತಪ್ಪಾವೊನೆರ ತೂತೆರ್. ಒಲವು ತಿಕ್ಕ್‌ದ್ ಜಾಗೆಗ್ ಬತ್ತಿನ ಪೊಲೀಸೆರ್ ಅಲ್ಪದಕ್ಲೆನ ಸಕಾಯೊಡು ಮೂವೆರ್ ಆರೋಪಿಲೆನ್ ಪತ್ತ್‌ದೆರ್. ಗಂಗೊಳ್ಳಿ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.