Last updated on March 21st, 2025 at 09:30 am
ಕಾರ್ಕಳ: ಕಡತ ಒಯಿಲ್‌ಡ್ ತಿಕ್ಕ್‌ದ್ ಬೂರೊಂದಿನ ಕಡಂದಲೆ ನಿವಾಸಿ ವಿಶ್ವನಾಥ್ ಪನ್ಪಿನಾರ್, ಎನ್ನ ಕಣ್ಣ್‌ಗ್ ಏರಾ ಕೆಂಗುಡೆರ್ ಮುಂಚಿದ ಪೊಡಿ ದಕ್ಕ್‌ದ್ ಎನಡ ಇತ್ತಿನ 70 ಸಾರ ರೂ. ಕಾಸ್ ಕಂಡ್‌ದೆರ್ ಪನ್ದ್ ಕತೆ ಕಟ್ಟಿನ ಪ್ರಕರಣ ಒಂಜಿ ಕಾರ್ಲ ಗ್ರಾಮಾಂತರ ಸ್ಟೇಷನ್ ಸೀಮೆದ ಬೋಳ ಗ್ರಾಮೊದ ಅಂಬರಾಡಿಡ್ ನಡತ್‌ದ್ಂಡ್.
ನಡಕೆದ ಒಲವು
ಮರತ ಬೇಲೆ ಮಲ್ತೊಂದಿತ್ತಿನ ವಿಶ್ವನಾಥ್ ಬುದಾರ ರಾತ್ರೆ ಅಂಬರಾಡಿಡ್ ಸಾದಿ ಬರಿಟ್ ಬೂರ್ದಿತ್ತಿನೆನ್ ತೂದು ಸಾದಿಡೆ ಪೋಪಿನಾರ್ ಒರಿ ಪಾತೆರ್ಪಯೆರ್. ಅಪಗ, ಎಂಕ್ ಏರಾ ಮುಂಚಿದ ಪೊಡಿ ದಕ್ಕ್‌ದ್, ಎನಡ ಇತ್ತಿನ 70 ಸಾರ ರೂ. ಕಂಡ್‌ದೆರ್ ಪನ್ದ್ ವಿಶ್ವನಾಥ್ ತೆರಿಪಾದಿತ್ತೆರ್. ಈ ಬಗೆಟ್ ಜಡ್ತೆ ಸುರು ಮಲ್ತಿನ ಪೊಲೀಸೆರ್ ಸಿಸಿಟಿವಿ ಫೂಟೇಜ್‌ಲೆನ್ ಪರಿಶೀಲನೆ ಮಲ್ದೆರ್.
ಕಂಡ್‌ದಿನ ಸುದ್ದಿ ಒರ್ಮೆಲಾ ತೆರಿದ್ ಜನೊಕುಲ್ಲಾ ಪೋಡಿದಿತ್ತೆರ್. ಜಡ್ತೆ ಮಲ್ತಿನ ಪೊಲೀಸೆರೆಗ್ ವಿಶ್ವನಾಥ್ ಮಲ್ದಿನ ಆರೋಪಗ್ ಪೂರಕ ಆಪಿನ ಒವ್ವೇ ಅಂಶೊಲು ತಿಕ್ಕ್‌ದಿಜ. ಅತ್ತಂದೆ ವಿಶ್ವನಾಥ್‌ನ ಮಿತ್ತ್ ಸಂಶಯ ಬರ್ಪಿನಂಚಿನ ವಿಷಯೊಲೇ ತಿಕ್ಕ್‌ದ. ವಿಶ್ವನಾಥ್ ಒಂಜಿ ಅಂಗಡಿರ್ದ್ ಮುಂಚಿದ ಪೊಡಿ ಗೆತೊಂದಿನ ಪೊಲೀಸೆರೆಗ್ ತೆರೀಂಡ್. ಬೊಕಲಾ ಜೋರುಡು ಜಡ್ತೆ ಮಲ್ತಿನೇ ಬೋಳ ಪಂಚಾಯತ್‌ಡೆ ಆಜ್ ಕಡಂದಲೆಗೆ ಪೋಪಿನ ಪೊರ್ತುಡು ಅಂಬರಾಡಿ ಪರಿಸರೊಡು ವಿಶ್ವನಾಥೆ ತಾನೇ ಮುಂಚಿದ ಪೊಡಿನ್ ಮೈಕ್ ದಕ್ಕೊಂದು, ಕುಂಟು ಪರ್ತೊಂದು ಬೈಕ್‌ದ ಒಟ್ಟುಗು ಸಾದಿಗ್ ಬೂರ್ಲೆಕ ನಾಟಕ ಮಲ್ದಿನ ತೆರಿದ್ಂಡ್. ಈ ಬಗೆಟ್ ಆಯನ ವಿಚಾರಣೆ ಮಲ್ಪುನಗ ಸತ್ಯ ಒತ್ತೊಂದೆ.
ಕಡತ ಒಯಿಲ್‌ಡ್ ಇಪ್ಪುನವೇ ಉಂಬ್ಯೆ ಇಂಚಿನ ನಾಟಕ ಗೊಬ್ಯೆರ ನೆವನ ಪನ್ದ್ ತೆರಿದ್ ಬೈದ್ಂಡ್. ಪೊಲೀಸೆರ್ ವಿಚಾರಣೆ ಮಲ್ತ್‌ದ್, ವಾರ್ನಿಂಗ್ ಕೊರ್ದು ಬುಡ್ತೆರ್. ಪ್ರಕರಣ ದಾಕಲಾತಿಜಿ.