Last updated on March 4th, 2025 at 06:59 pm
ವಿಟ್ಲ ಮಾ. 04: ಕುಡ್ಲ ಜಿಲ್ಲೆದ ಕಪ್ಪು ಕಲ್ಲ್ ಗಣಿಗಾರಿಕೆದ ಪ್ರದೇಶ ಪನ್ದೇ ಪುದರಾತಿನ ವಿಟ್ಲದ ಮಾಡತ್ತಡ್ಕ ಪನ್ಪಿನಲ್ಪ ಭಾರೀ ಸ್ಪೋಟ ಆತ್ಂಡ್. ಇನಿ ಮಧ್ಯಾಹ್ನ ಸುಮಾರ್ 1.30 ಯ ಅಂದಾಜಿಗ್ ಈ ಸ್ಫೋಟ ನಡತಿತ್ತ್‌ದ್, ಸ್ಫೋಟದ ಬರಸ್‌ಗ್ ಐನ್ ಗ್ರಾಮೊಲೆನ ಜನ ಪೋಡಿದ್ ಪೋತೆರ್. ಮುಲ್ಪದ ಕಪ್ಪು ಕಲ್ಲ್ ಗಣಿಗಾರಿಕೆಗ್ ಸೇರ್ದಿನ ಕಾರ್ಮಿಕೆರ್ ಓಪನ್ ಜಾಗೆಡ್ ನೂದೆರ್ದ್‌ಲಾ ಎಚ್ಚ ಜಿಲಿಟಿನ್ ಕಡ್ಡಿ, 50 ರ್ದ್‌ಲಾ ಎಚ್ಚ ಡಿಟೋನೇಟರ್ ಲೆನ್ ಗೋಸ್ಮರಿಡ್ ದೀತಿನೆರ್ದಾವರ ದೊಂಬುದ ಪೆಟ್ಟ್‌ಗ್ ಉಂದು ಬ್ಲಾಸ್ಟ್ ಆದಿತ್ತ್‌ದ್, ಮುಟ್ಟದ ಸುಮಾರ್ 12 ರ್ದ್‌ಲಾ ಎಚ್ಚ ಇಲ್ಲಲೆಗ್ ಹಾನಿಯಾತ್ಂಡ್.
ಮುಲ್ಪ ಸುಮಾರ್ 12 ವರ್ಸೊರ್ದಿಂಚಿ ಕಪ್ಪು ಕಲ್ಲ್‌ದ ಗಣಿಗಾರಿಕೆ ಮಲ್ತೊಂದುಪ್ಪುನ ಎನ್.ಎಸ್ ಕ್ರಶರ್ ಪನ್ಪಿನ ಸಂಸ್ಥೆಗ್ ಸೇರ್ದಿನ ಸ್ಫೋಟಕೊಲು ಉಂದಾದಿತ್ತ್‌ದ್, ದೈವೊಲೆಗ್ ಸೇರ್ದಿನ ಜಾಗೆಡ್ ಅಕ್ರಮವಾದ್ ಈ ಸ್ಫೋಟಕೊಲೆನ್ ದೀದಿತ್ತೆರ್.
ದೊಂಬುದ ಎರಿಕ್ ಈ ಸ್ಫೋಟಕೊಲು ಪುಡತಿನೆರ್ದಾವರ, ಸ್ಫೋಟ ಆತಿನ ಜಾಗೆ ಅಲಕ್ಕ ಚಿಪ್ಪ್‌ಡ್‌ಚೀರ್ ಆತ್ಂಡ್. ಸ್ಫೋಟದ ಶಾಕ್‌ವೇವ್‌ಗ್ ಸುಮಾರ್ 20 ಮೀಟರ್ ದೂರೊಡಿತ್ತಿನ ಇಲ್ಲ್‌ಲೆನ ಮದೆಲ್‌ಲೆಡ್ ಕ್ರ್ಯಾಕ್, ಕಂಡಿದ ಗ್ಲಾಸ್‌ಲ್ ಪೊಡಿ ಆದಿತ್ತ್‌ದ್, ಮುಚ್ಚಿಗೆ ಜರಿದ್ ಬೂರ್ದ್ಂಡ್. ಸುಮಾರ್ 12 ಇಲ್ಲ್‌ಲೆಗ್ ಎಚ್ಚಿನ ಹಾನಿ ಆದಿತ್ತ್‌ದ್, ನಡಕೆಡ್ ಏರೆನಲಾ ಜೂವೊಗು ಸಂಚಿಕಾರ ಬೈಜಿ.
ಸ್ಫೋಟ ಆತಿನ ಜಾಗೆದ ಸುಮಾರ್ ಇರ್ನೂದು ಮೀಟರ್ ಸುತ್ತದ ಮರದೈಕ್ಲೆನ ಇರೆಕುಲು ಚೂರು ಚೂರಾದ್ ಬೂರ್ದಿನ ಸ್ಫೋಟದ ತೀವ್ರತೆನ್ ತೋಜಾವುಂಡು. ಸ್ಫೋಟದ ಜಾಗೆಡ್ ಸೂ ಲಕ್ಕ್‌ದಿತ್ತ್‌ದ್, ಮುಟ್ಟದಕುಲು ನೀರ್ ಚೇತ್‌ದ್ ಸೂ ತೆಕ್ಕಾದೆರ್. ಸ್ಫೋಟಕೊಲೆನ್ ಅಕ್ರಮವಾದ್, ಗೋಸ್ಮರಿಡ್ ರಾಶಿ ದೀತಿನ ಸಂಸ್ಥೆದ ಮಿತ್ತ್ ಪೋಲೀಸೆರ್ ಪ್ರಕರಣ ದಾಕಲ್ತೊಂದೆರ್. ಕ್ರಶರ್‌ಗ್ ಸಂಬಂಧಿತಿನ ಮೆಷಿನ್‌ಲೆನ್ ವಶೊಕು ಗೆತೊನರೆ ಪೋಲೀಸೆರ್ ಪಿದಡ್ದೆರ್.
ನಡಕೆ ನಡತಿನ ಜಾಗೆಗ್ ಬತ್ತಿನ ಅಧಿಕಾರಿಲೆನ ಮಿತ್ತ್ ಅಲ್ಪದ ಜನೊಕುಲು ತನ್ಕುಲೆ ಪಿಸ್‌ರ್ ತೂಪಾಯೆರ್. ಒಕ್ಕೆಲ್ ಇಪ್ಪುನ ಜಾಗೆರ್ದ್ ಕಾಲಿ 30 ಮೀಟರ್ ದೂರೊಡು ಸ್ಪೋಟಕೊಲೆನ್ ಪುಡತ್‌ದ್ ಈ ಜಾಗೆಡ್ ಗಣಿಗಾರಿಕೆ ಮಲ್ತೊಂದಿತ್ತ್‌ದ್, ಸಂಬಂಧಿತಿನ ಇಲಾಖೆಲು ಕಣ್ಣ್‌ಗ್ ಕುಂಟು ಕಟೊಂದ ಪನ್ಪಿನೆಕ್ ಪುರಾಪು ಆದುಂಡು.