Last updated on March 10th, 2025 at 10:14 am
ಕುಂಬ್ಳೆ, ಮಾ. 10: ಕರಿನ ಒಂಜಿ ತಿಂಗೊಲುರ್ದಿಂಚಿ ನಾಪತ್ತೆ ಆದಿತ್ತಿನ 15 ವರ್ಸ ಪ್ರಾಯೊದ ಪೊಣ್ಣು ಬೊಕ್ಕ 42 ವರ್ಸ ಪ್ರಾಯೊದ ರಿಕ್ಷಾ ಡ್ರೈವರ್‌ನ ಮೃತದೇಹ ಅಲಕ್ಕ ಕುರಿನ ಸ್ಥಿತಿಟ್ ಕುಡಾಲುಮೇರ್ಕಳ ಗ್ರಾಮೊದ ಮಂಡೆಕಾಪುದ ಕಾಡ್‌ಡ್ ತಿಕ್ಕ್‌ದ್ಂಡ್.
ಮಂಡೆಕಾಪುದ ರಿಕ್ಷಾ ಡ್ರೈವರ್ ಪ್ರದೀಪ್‌ (42) ಬೊಕ್ಕ ಬರಿತಿಲ್ಲದ 15 ವರ್ಸ ಪ್ರಾಯೊದ ಹೈಸ್ಕೂಲ್ ವಿದ್ಯಾರ್ಥಿನಿ ಸುಮಾರ್ ಒಂಜಿ ತಿಂಗೊಲುಗು ದುಂಬು ಇಲ್ಲರ್ದ್ ಬಲ್ತಿತ್ತೆರ್. ಮನದಾನಿ ಪೊಣ್ಣನ ಇಲ್ಲದಕುಲು ಕುಂಬ್ಳೆ ಪೊಲೀಸ್‌ ಸ್ಟೇಷನ್‌ಡ್ ನಾಪತ್ತೆದ ಒಯಿಲ್ ಬರೆಪಾದಿತ್ತೆರ್. ಪೊಲೀಸೆರ್ ಪಾಕ ನಾಡ್ಂಡಲ ಆಲೆನ್ ನಾಡ್‌ಪತ್ತೆರೆ ಆದಿಜ್ಜಂಡ್. ಈ ನಡುಟು ಇರ್ವೆರೆ ಮೊಬೈಲ್‌‌ಲಾ ಸ್ವಿಚ್‌ ಆಫ್‌ ಆದಿತ್ತ್ಂಡ್. ಅವೆರ್ದ್ ಬೊಕ್ಕ ಪೊಣ್ಣನ ಇಲ್ಲದಕುಲು ಹೈಕೋರ್ಟ್‌ಡ್ ಹೇಬಿಯಸ್‌ ಕಾರ್ಪಸ್‌ ಅರ್ಜಿ ಪಾಡ್ದಿತ್ತೆರ್.
ಕುಡ ಆ್ಯಕ್ಟಿವ್ ಆಯಿನ ಪೊಲೀಸೆರ್ ವಿಶೇಷ ಕೂಟ ಉಂಡು ಮಲ್ತ್, ಡ್ರೋನ್‌ ಗಲಸ್‌ದ್ ಮುಟ್ಟದಕಲೆನ ಸಹಕಾರೊಡು ನಾಡೊಂದುಪ್ಪುನಗ ಇರ್ವೆರ್ಲಾ ಒಂಜೆ ಮರೊಟು ನೈಲಾನ್‌ ಬಲ್ಲ್‌ಡ್ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದಿನ ತೋಜಿದ್ಂಡ್. ನಾಪತ್ತೆ ಆತಿನ ಒಂತೆ ದಿನೊಟೇ ಅಕುಲು ಆತ್ಮಹತ್ಯೆ ಮಲ್ತೊಂದೆರ್ ಪನ್ದ್ ತೋಜುಂಡು.
ಪ್ರದೀಪ್‌ ಅಪಗಪಗ ಪೊಣ್ಣನ ಇಲ್ಲಗ್ ಬರೊಂದಿತ್ತಿನತ್ತಂದೆ ಆಲೆನ್ ತನ್ನ ರಿಕ್ಷಾಡ್ ಶಾಲೆಗ್ಲಾ ಲೆತೊಂದು ಪೋಪೆದೆಗೆ. ಇರ್ವೆರ್ಲಾ ಎಡ್ಡೆಪುಡು ಇತ್ತ್‌ದ್, ಮದಿಮೆಲಾ ಆಪಿನ ಅಲೆಚನೆಡ್ ಇತ್ತೆರ್‌ಗೆ. ಉಂದೆಕ್ ಇಲ್ಲದಕ್ಲೆನ ವಿರೋಧ ಇತ್ತ್ಂಡ್‌ಗೆ. ಪುನ ತಿಕ್ಕಿನ ಜಾಗೆಡ್ ರಡ್ಡ್ ಮೊಬೈಲ್‌ ಫೋನ್‌ ಬೊಕ್ಕ ಒಂಜಿ ಕತ್ತಿ ತಿಕ್ಕ್‌ದ್ಂಡ್.